ຕົວເລກຜູ້ຕິດເຊື້ອໂຄວິດ – 19 ທົ່ວໂລກ ທະລຸ 40 ລ້ານຄົນແລ້ວ

366

ຈາກສະພາບການແຜ່ລະບາດຂອງພະຍາດໂຄວິດ – 19 ທີ່ເລີ່ມມາແຕ່ໄລຍະທ້າຍປີ 2019 ຮອດປັດຈຸບັນ ທົ່ວໂລກມີຕົວເລກຜູ້ຕິດເຊື້ອສະສົມທະລຸ 40 ລ້ານຄົນແລ້ວ, ໃນນີ້ເສຍຊີວິດ 1 ລ້ານກວ່າຄົນ; ສ່ວນ ສປປ ລາວ ແມ່ນມີການກວດພົບເຊື້ອພະຍາດໂຄວິດ – 19 ຄັ້ງທຳອິດໃນໄລຍະທ້າຍເດືອນມີນາ 2020 ແລະ ເຮັດໃຫ້ມີຜູ້ຕິດເຊື້ອສະສົມມາເຖິງປັດຈຸບັນແມ່ນ 23 ຄົນ ແລະ ຕິດຕາມປິ່ນປົວກໍລະນີທີ 23 ທີ່ໂຮງໝໍມິດຕະພາບ.

ໃນວັນທີ 19 ຕຸລາ 2020 ທີ່ກະຊວງສາທາລະນະສຸກ ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ລາຍງານວ່າ: ສະພາບການໃນທົ່ວໂລກ ມີການລາຍງານການລະບາດ ທັງໝົດ 214 ( ປະເທດ/ເຂດ ) ເຊິ່ງມີ ການຢັ້ງຢືນຜູ້ຕິດເຊື້ອພະ   ຍາດໂຄວິດ – 19 ແມ່ນ 40.245.960 ຄົນ; ເສຍຊີວິດ 1.117.913 ຄົນ ເຊິ່ງກວມເອົາ 2,77% ຂອງຜູ້ຕິດເຊື້ອທັງໝົດ, ປິ່ນປົວດີ 30.064.289 ຄົນ ເຊິ່ງກວມເອົາ 74,7% ຂອງຜູ້ຕິດເຊື້ອທັງໝົດ ໂດຍປະເທດທີ່ມີການລາຍງານການຕິດເຊື້ອ ແລະ ເສຍຊີວິດຫຼາຍກວ່າໝູ່ແມ່ນສະຫະລັດອາເມຣິກາ ເຊິ່ງມີຜູ້ຕິດເຊື້ອສະສົມ 8.386.148 ຄົນ, ເສຍຊີວິດ 224.726 ຄົນ; ສ່ວນຢູ່ໃນຂົງເຂດອາຊີກໍແມ່ນປະເທດອິນເດຍ  ທີ່ມີທ່າອ່ຽງໃນການຕິດ ເຊື້ອໂຄວິດ – 19 ເພີ່ມຂຶ້ນ ເຊິ່ງມີຜູ້ຕິດເຊື້ອສະສົມ 7.547.762 ຄົນ ແລະ ໃນບັນດາກຸ່ມປະເທດອາຊຽນ. ມາຮອດວັນທີ 19 ຕຸລາ 2020 ມີການຢັ້ງຢືນຜູ້ຕິດເຊື້ອພະຍາດໂຄວິດ – 19 ແມ່ນ 838.192 ຄົນ ແລະ ເສຍຊີວິດ 20.355 ຄົນ.

ไม่มีคำอธิบาย

ທ່ານຍັງໄດ້ກ່າວຕື່ມວ່າ: ສໍາລັບການເຝົ້າລະວັງ     ໂຄວິດ – 19 ຢູ່ ສປປ ລາວ ຮອດຕອນແລງຂອງວັນທີ 18 ຕຸລາ 2020 ມີຜູ້ເດີນທາງຈາກຈຸດຜ່ານແດນຕ່າງໆທັງໝົດ 1.256 ຄົນ, ໃນນັ້ນຈຸດຜ່ານດ່ານ ລາວ – ໄທ 512 ຄົນ ( ແຮງງານລາວກັບມາແຕ່ໄທ 84 ຄົນ ); ຈຸດຜ່ານດ່ານ ລາວ – ຈີນ 109 ຄົນ, ໃນນັ້ນແຮງງານລາວ 7 ຄົນ, ແຮງງານຈີນ 92 ຄົນ ຜ່ານດ່ານບໍ່ເຕັນ ແຂວງຫຼວງນ້ຳທາ, ເຫຼືອນັ້ນແມ່ນຄົນຂັບລົດ ສົ່ງສິນຄ້າ; ຈຸດຜ່ານດ່ານ ລາວ – ຫວຽດນາມ 507 ຄົນ ເຊິ່ງເຂົ້າມາໂດຍຖືກອະນຸຍາດຈາກຄະນະສະເພາະກິດ, ໃນນັ້ນມີນັກສຶກສາ 9 ຄົນ, ແຮງງານຫວຽດນາມ 178 ຄົນ ເຫຼືອນັ້ນແມ່ນຄົນຂັບລົດສົ່ງສິນຄ້າ ແລະ ຜູ້ຕິດຕາມ ເຊິ່ງສ່ວນຫຼາຍແມ່ນເຂົ້າມາປ່ຽນຖ່າຍສິນຄ້າ ແລະ ປ່ຽນຜູ້ຂັບລົດຢູ່ດ່ານ; ຈຸດຜ່ານດ່ານ ລາວ – ກຳປູເຈຍ ທັງໝົດ 4 ຄົນ;  ເດີນທາງຜ່ານສະໜາມບິນສາກົນວັດໄຕ ທັງໝົດ 124 ຄົນ ( ລາວ 99 ຄົນ, ຄົນຕ່າງປະເທດ 25 ຄົນ ); ທຸກຄົນແມ່ນໄດ້ວັດແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ( ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ປັດຈຸບັນທົ່ວປະເທດ ມີສູນຈໍາກັດບໍລິເວນທີ່ຍັງເປີດຢູ່ທັງໝົດ 35 ສູນ, ມີຜູ້ຖືກຈຳກັດບໍລິເວນຢູ່ສູນ 2.475 ຄົນ ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ; ສ່ວນການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ. ໃນວັນທີ 18 ຕຸລາ 2020 ໄດ້ເກັບຕົວຢ່າງມາກວດວິເຄາະທັງໝົດ 332 ຄົນ, ໃນນັ້ນມີແຮງງານລາວມາແຕ່ໄທ 102 ຕົວຢ່າງ, ແຮງງານຈີນ 5 ຕົວຢ່າງ, ແຮງງານຫວຽດນາມ 188 ຕົວຢ່າງ, ແຮງງານໄທ 2 ຕົວຢ່າງ, ບຸກຄົນທົ່ວໄປທີ່ບໍ່ມີອາການ 34 ຕົວຢ່າງ ແລະ ບຸກຄົນທົ່ວໄປທີ່ມີອາການ 1 ຕົວຢ່າງ; ຜົນກວດວິເຄາະທັງໝົດແມ່ນບໍ່ພົບເຊື້ອ, ໝາຍ ຄວາມວ່າໃນວັນທີ 18 ຕຸລາ 2020 ບໍ່ມີຜູ້ຕິດເຊື້ອໃໝ່; ສັງລວມການກວດວິເຄາະ ແຕ່ເດືອນມັງກອນ ຮອດວັນທີ 18 ຕຸລາ 2020 ໄດ້ເກັບຕົວຢ່າງມາກວດທັງໝົດ 60.565 ຕົວຢ່າງ, ກວດພົບເຊື້ອສະສົມ 23 ຄົນ. ປັດຈຸບັນຄົນເຈັບທີ່ຕິດເຊື້ອພະຍາດໂຄວິດ – 19 ກໍລະນີທີ 23 ແມ່ນຍັງສືບຕໍ່ປິ່ນປົວຢູ່ໂຮງໝໍມິດຕະພາບ.