ເປີດໂຄງການວຽງຈັນສະອາດ ຊ່ວຍກັນຫຼຸດຜ່ອນການນຳໃຊ້ຖົງຢາງພລາສຕິກ

391

ໂຄງການວຽງຈັນສະອາດ ຫວັງໃຫ້ທຸກຄົນໃນນະຄອນຫຼວງຫຼຸດການນຳໃຊ້ຖົງຢາງພລາສຕິກ ເພື່ອຮັກສາສິ່ງແວດລ້ອມ, ເປັນການຜັນຂະຫຍາຍນະໂຍບາຍ 6 ສ ຂອງນະຄອນຫຼວງວຽງຈັນ ໂດຍໄລຍະທຳອິດຈະມີສູນການຄ້າ 7 ແຫ່ງ ແລະ ຕະຫຼາດ 2 ແຫ່ງເຂົ້າຮ່ວມ.

ໃນວັນທີ 17 ຕຸລາ 2020 ທີ່ສະໂມສອນເມືອງໄຊທານີ ນະຄອນຫຼວງວຽງຈັນ ( ນວ ) ໄດ້ຈັດພິທີເປີດໂຄງການວຽງຈັນສະອາດ, ຊ່ວຍກັນຫຼຸດຜ່ອນການນຳໃຊ້ຖົງຢາງພລາສຕິກຮັກສາສິ່ງແວດລ້ອມ ຮັກ ນວ ພ້ອມກັນຫຼຸດຜ່ອນການນຳໃຊ້ຖົງຢາງພລາສຕິກ ໂດຍການເປັນປະທານຂອງ ທ່ານ ແອງພອນ ແພງສຸວັນ ຮັກສາການຫົວໜ້າພະແນກຊັບພະຍາ ກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ    ( ພຊສ.ນວ ) ເປັນກຽດເຂົ້າຮ່ວມຂອງ ທ່ານ ສິນລະວົງ ຄຸດໄພທູນ ເຈົ້າຄອງ ນວ, ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍພາກສ່ວນທີ່ກ່ຽວເຂົ້າຮ່ວມ.

ໃນພິທີ ທ່ານ ແອງພອນ ແພງສຸວັນ ໄດ້ກ່າວວ່າ: ໂຄງການວຽງຈັນສະອາດ ຈັດຕັ້ງປະຕິບັດຂຶ້ນເພື່ອຊ່ວຍກັນຫຼຸດຜ່ອນການນຳໃຊ້ຖົງຢາງພລາສຕິກ ຜັນຂະຫຍາຍມາຈາກມະຕິຕົກລົງຂອງອົງການປົກຄອງ ນວ ກ່ຽວກັບແຜນວຽກ ແລະ ມາດຕະການຈັດຕັ້ງປະຕິບັດໂຄງການວຽງຈັນສະອາດ ສະບັບເລກທີ 03/ອປຄ.ນວ ລົງວັນທີ 25 ກັນຍາ 2015 ທັງເປັນການຈັດຕັ້ງປະຕິບັດນະໂຍບາຍ 6 ສ ຂອງ ນວ ໂດຍສະເພາະແມ່ນ  ສ ສະອາດ. ພ້ອມດຽວກັນນັ້ນ, ເປັນການຈັດຕັ້ງຜັນຂະຫຍາຍຍຸດທະສາດ ສິ່ງແວດລ້ອມຂຽວສະອາດງາມຕາ ຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍອີງໃສ່ທິດຊີ້ນຳຂອງຂັ້ນເທິງ ພະແນກ ພຊສ.ນວ ຈຶ່ງໄດ້ຊີ້ນຳ – ນຳພາຂະແໜງສິ່ງແວດລ້ອມສ້າງແຜນງານໂຄງການວຽງຈັນສະອາດ ຊ່ວຍຫຼຸດຜ່ອນການນຳໃຊ້ຖົງຢາງພລາສ ຕິກ ນັບແຕ່ເດືອນມັງກອນ 2020 ເປັນຕົ້ນມາ ເຊິ່ງການຈັດຕັ້ງປະຕິບັດໂຄງການນີ້ໃນໄລຍະທຳອິດປີ 2021 ຈະມີ 7 ສູນການຄ້າ ແລະ 2 ຕະຫຼາດເຂົ້າຮ່ວມ ຄື: ສູນການຄ້າບາຊາບີ, ສູນການຄ້າພາກຊັນ, ສູນການຄ້າໄອເຕັກ  ມໍ, ສູນການຄ້າວິວ ມໍ, ຮ້ານຊຸບເປີມາເກັດເຈມາກ, ໂຊກທະວີ ແລະ ມາໂກໂຕະ. ນອກຈາກນັ້ນ, ຍັງມີຕະຫຼາດໜອງຈັນ ແລະ ຕະຫຼາດໂພນສະຫວ່າງ.

ການຈັດຕັ້ງປະຕິບັດໂຄງການໃນໄລຍະທຳອິດນີ້ ແມ່ນນັບຈາກນີ້ເປັນຕົ້ນໄປຄະນະຮັບຜິດຊອບໂຄງການຈະລົງໂຄສະນາເຄື່ອນທີ່ ແລະ ໂຄສະນາຜ່ານສື່ມວນຊົນຕ່າງໆເປັນເວລາ 3 ເດືອນ ເພື່ອສະໜອງຂໍ້ມູນໃຫ້ພໍ່ແມ່ປະຊາຊົນ ແລະ ທົ່ວສັງຄົມເຂົ້າໃຈແຈ້ງຕໍ່ການຫຼຸດຜ່ອນການນຳໃຊ້ຖົງຢາງ ພລາສຕິກ, ຫຼັງຈາກນັ້ນບັນດາຫ້າງຮ້ານ, ສູນການຄ້າ ແລະ ຕະຫຼາດເຂົ້າຮ່ວມໂຄງການຈະເລີ່ມຈັດຕັ້ງການຢຸດແຈກຖົງຢາງພລາສຕິກໃຫ້ລູກຄ້າໃນທຸກໆວັນພຸດ ນັບແຕ່ເດືອນມັງກອນ 2021 ເປັນຕົ້ນໄປ ບັນດາຫົວໜ່ວຍທຸລະກິດທີ່ເຂົ້າຮ່ວມໂຄງການ ຈະຕ້ອງນຳຖົງຜ້າ, ຖົງເຈ້ຍ ແລະ ຖົງທີ່ເຮັດດ້ວຍວັດສະດຸທີ່ຍ່ອຍສະຫຼາຍໄດ້ງ່າຍໄວ້ບໍລິການລູກຄ້າ.

ສຳລັບລູກຄ້າທ່ານໃດທີ່ເຂົ້າຊື້ສິນຄ້າຢູ່ຫົວໜ່ວຍທຸລະກິດທີ່ເຂົ້າຮ່ວມໂຄງການໃນຈຳນວນ 9 ຫົວໜ່ວຍນັ້ນ ຖ້າຕ້ອງການນຳໃຊ້ຖົງຢາງພລາສຕິກ ແມ່ນຈະຕ້ອງໄດ້ຊື້ນຳທາງຮ້ານ ເພາະໃນທຸກໆວັນພຸດ ຮ້ານຄ້າແມ່ນຈະຢຸດແຈກຖົງຢາງພລາສ ຕິກ ເຊິ່ງກົນໄກໃນຮູບແບບນີ້ຖືກຈັດຕັ້ງປະຕິບັດຢູ່ໃນຫຼາຍປະເທດໃນໂລກ ລວມທັງ ສປ ຈີນ ແລະ ສສ ຫວຽດນາມ. ສະນັ້ນ, ເຖິງເວລາແລ້ວທີ່ ສປປ ລາວເຮົາ ເວົ້າສະເພາະແມ່ນ ນວ ໃນຖານະເປັນເມືອງເອກຂອງປະເທດຈະຕ້ອງໄດ້ຊ່ວຍກັນເປັນເຈົ້າການຫຼຸດຜ່ອນການນຳໃຊ້ຖົງຢາງ ພລາສຕິກ ເພື່ອແກ້ໄຂບັນຫາຜົນກະທົບຕໍ່ສິ່ງແວດລ້ອມ ແລະ ສັງຄົມ ສ້າງສະພາບແວດລ້ອມທີ່ດີໃຫ້ລູກຫຼານພວກເຮົາໃນ ອະນາຄົດ, ສ້າງ ນວ ໃຫ້ມີຄວາມຈົບງາມໄປຕາມທິດສີຂຽວ ຍືນຍົງ ແລະ ເປັນເມືອງທີ່ໜ້າຢູ່.

ຂໍ້ມູນໃຫ້ຮູ້ວ່າ: ໃນນະຄອນຫຼວງວຽງຈັນ ໄດ້ມີຂີ້ເຫຍື້ອເກີດຂຶ້ນປະມານ 600 ໂຕນຕໍ່ມື້ ແລະ ໃນນັ້ນ ປະມານ 10% ຫຼື 60 ໂຕນ ແມ່ນເປັນຢາງພລາສຕິກ ເຊິ່ງການບໍລິຫານຈັດການຂີ້    ເຫຍື້ອ ດັ່ງກ່າວສາມາດເກັບມ້ຽນໄດ້ພຽງເຄິ່ງໜຶ່ງ ສ່ວນທີ່ເຫຼືອກໍແມ່ນການຈູດ ແລະ ຖິ້ມຊະຊາຍ ເຊິ່ງມັນໄດ້ສົ່ງຜົນກະທົບຕໍ່ສະພາບອາກາດ ແລະ ສິ່ງແວດລ້ອມ. ສະນັ້ນ, ການເປີດໂຄງການວຽງຈັນສະອາດ ຊ່ວຍກັນຫຼຸດຜ່ອນການນຳໃຊ້ຖົງຢາງ ພລາສ ຕິກ ກໍຈະຊ່ວຍເຮັດໃຫ້ຈຳນວນຂີ້ເຫຍື້ອພລາສຕິກຫຼຸດລົງໄດ້.