ບໍລິສັດ ອີທີແອລ ຈໍາກັດ ແລະ ຊຽວໝີ ຈັບມືເດີນໜ້າຮ່ວມທຸລະກິດນໍາກັນ

671

ບໍລິສັດ ອີທີແອລ ແລະ ຊຽວໝີ ຕົກລົງເຮັດສັນຍາຮ່ວມມືເພື່ອຊຸກຍູ້ສົ່ງເສີມເຊິ່ງກັນ ແລະ ກັນ. ໃນນັ້ນ, ອີທີແອລ ຈະສະໜອງບໍລິການທີ່ຮອບດ້ານກວ່າເກົ່າ ສ່ວນຊຽວໝີ ຈະຕີຕະຫຼາດລາວໃຫ້ມີລັກສະນະກວ້າງຂວາງກວ່າເກົ່າ.

ວັນທີ 16 ຕຸລາ ປີ 2020, ບໍລິສັດ ອີທີແອລ ຈໍາກັດ ແລະ ບໍລິສັດຊຽວໝີ ໄດ້ມີພິທີເຊັນສັນຍາຮ່ວມມືທາງດ້ານທຸລະກິດຢູ່ສໍານັກງານໃຫຍ່ ບໍລິສັດ ອີທີແອລ ຈໍາກັດ ທີ່ນະຄອນຫຼວງວຽງຈັນ ເຊິ່ງແມ່ນ ທ່ານ ຮວງ ສູຢຸນ ຜູ້ອໍານວຍການໃຫຍ່ຂອງ ບໍລິສັດ ອີທີແອລ ຈໍາກັດ ແລະ ທ່ານ ວັງລີນ ຈາກບໍລິສັດຊຽວໝີ ເປັນຜູ້ຕາງໜ້າລົງນາມສັນຍາ.

ໃນພິທີເຊັນສັນຍາຮ່ວມມືຄັ້ງນີ້ ກໍໄດ້ເປີດຕົວໂທລະສັບມືຖືຊຽວໝີລຸ້ນໃໝ່ ພ້ອມ function 4 ຢ່າງ ແລະ ແພັກແກັດຂອງໂທລະສັບຊຽວໝີ ທີ່ນຳສະເໜີໂດຍ ທ່ານ ນາງ ຮວງຟັນຊີງ ຜູ້ຕາງໜ້າບໍລິສັດ ຊຽວໝີ ຢູ່ ສປປ ລາວ.

ທ່ານ ຮວງ ສູຢຸນ ໄດ້ກ່າວວ່າ: ບໍລິສັດ ອີທີແອລ ຈຳກັດ ເປັນບໍລິສັດທີ່ໃຫ້ບໍລິການດ້ານການໂທລະຄົມ ເຊິ່ງຮ່ວມທຶນລະ ຫວ່າງ ລາວ – ຈີນ, ມີເງື່ອນໄຂຄົບຖ້ວນດ້ານເຄືອຂ່າຍໂທລະຄົມມະນາຄົມ ແລະ ເຄືອຂ່າຍໄດ້ປົກຄຸມທົ່ວປະເທດ. ທຸລະກິດໄດ້ກວມເອົາໂທລະສັບມືຖື, ໂທລະສັບຕັ້ງໂຕະ, ອິນເຕີເນັດ ແລະ ບໍລິການເສີມຕ່າງໆ; ສັນຍານ 4G ໄດ້ທົ່ວເຖິງທຸກເມືອງທຸກແຂວງຂອງປະເທດລາວ. ສໍາລັບສັນຍານ 4,5G ໄດ້ກວມເຖິງເມືອງທີ່ສໍາຄັນຂອງນະຄອນຫຼວງວຽງຈັນ, ແຂວງສະຫວັນນະເຂດ, ແຂວງຫຼວງພະບາງ, ແຂວງຈຳປາສັກ. ການຮ່ວມມືລະຫວ່າງ ບໍລິສັດ ອີທີແອລ ຈໍາກັດ ແລະ ບໍລິສັດຊຽວໝີ ຈະເປັນໃບໜ້າໃໝ່ໃນການພັດທະນາຂອງບໍລິສັດ, ຜ່ານການຮ່ວມມືລະຫວ່າງທັງສອງຝ່າຍ ທາງບໍລິສັດ ອີທີແອລ ຈຳກັດ ຈະສະໜອງບໍລິການທີ່ຮອບດ້ານກວ່າເກົ່າ, ຜະລິດຕະພັນທີ່ສົມບູນກວ່າເກົ່າ, ສ້າງຄວາມຮູ້ສຶກແບບພິເສດກວ່າເກົ່າໃຫ້ແກ່ລູກຄ້າທັງສອງຝ່າຍ; ໃນການຮ່ວມມືລະຫວ່າງທັງສອງຝ່າຍໃນຄັ້ງນີ້ ແມ່ນຈະເສີມຂະຫຍາຍຍີ່ຫໍ້ໂທລະສັບຊຽວໝີ ໃຫ້ເປັນທີ່ນິຍົມ ແລະ ກວ້າງຂວາງ ເພື່ອໃຫ້ບັນລຸເປົ້າໝາຍທີ່ວາງໄວ້.

ທ່ານ ວັງລີນ ໄດ້ປະກອບຄໍາເຫັນວ່າ: ໂທລະສັບຍີ່ຫໍ້ຊຽວໝີ ໄດ້ເຂົ້າສູ່ຕະຫຼາດ ສປປ ລາວ ຢ່າງເປັນທາງການ ໃນວັນທີ 23 ກັນຍາ ປີ 2018, ປະເທດລາວເປັນປະເທດທີ 17 ທີ່ຍອດຈໍານວນການຂາຍເຂົ້າເປັນໜຶ່ງໃນອັນດັບ 5 ທໍາອິດຂອງຍີ່ຫໍ້ຊຽວໝີ, ປະລິມານການເປີດນໍາໃຊ້ສະມາດໂຟນໃໝ່ໄດ້ບັນລຸເຖິງ 500 ກວ່າໜ່ວຍຕໍ່ມື້. ໃນໄລຍະ 2 ປີຜ່ານມາ ບໍລິສັດ ຊຽວໝີ ໄດ້ເປີດຮ້ານຈຳໜ່າຍໂທລະສັບແຫ່ງທໍາອິດໃນ ສປປ ລາວ. ພ້ອມກັນນັ້ນ, ໄດ້ລົງທຶນສ້າງ ຊຽວໝີ Park ແລະ ເປີດຮ້ານໂຊປິນອອນລາຍ Mimall.la. ມາຮອດປີ 2020 ມີແຜນການດໍາເນີນທຸລະກິດ ດ້ວຍຮູບແບບ E-commerce+Physical store ເພື່ອເຮັດໃຫ້ສີສັນພິເສດ E-commerce ຂອງຊຽວໝີ ສາມາດເຈາະຖານລູກຄ້າໃນຕະຫຼາດລາວໄດ້.

ບໍລິສັດ ອີທີແອລ ຈໍາກັດ ແລະ ບໍລິສັດ ຊຽວໝີ ໄດ້ຮ່ວມກັນຕອບສະໜອງຜະລິດຕະພັນຊຸດສະມາດໂຟນຊຽວໝີ ທີ່ມີຄຸນນະພາບທີ່ເປັນທີ່ນິຍົມໃຊ້ຂອງລູກຄ້າເພື່ອໃຫ້ເຂົ້າກັບເຄືອຂ່າຍ 4.5G ຂອງ ບໍລິສັດ ອີທີແອລ ເພື່ອໃຫ້ລູກຄ້າສາມາດເລືອກສິນຄ້າທີ່ມີຄຸນນະພາບ, ລາຄາຖືກ ແລະ ທັນສະໄໝ, ທ່ານ ວັງລີນ ກ່າວ.