ອຸດົມໄຊ ເນັ້ນເລື່ອງການຄວບຄຸມລາຄາ ຊຸກຍູ້ລາວທ່ຽວລາວ

365

ຮອງຫົວໜ້າພະແນກ ຖວທ ອຸດົມໄຊ ຍອມຮັບການທ່ອງທ່ຽວຢູ່ແຂວງໄດ້ຮັບຜົນກະທົບຮ້າຍແຮງຈາກໂຄວິດ – 19 ໂດຍສະເພາະຫົວໜ່ວຍທຸລະກິດທີ່ເນັ້ນໃຫ້ບໍລິການທ່ອງທ່ຽວຕ່າງປະເທດໂດຍກົງ. ດັ່ງນັ້ນ, ເພື່ອເປັນການຊຸກຍູ້ໃຫ້ການທ່ອງທ່ຽວຢູ່ແຂວງອຸດົມໄຊ ມີບັນຍາກາດດີຂຶ້ນ ທາງແຂວງໄດ້ເລັ່ງຄວບຄຸມລາຄາການບໍລິການດ້ານໂຮງແຮມ, ເຮືອນພັກ ແລະ ຮ້ານອາຫານ ເພື່ອດຶງດູດນັກທ່ອງທ່ຽວ.

ທ່ານ ບຸນກວມ ມິດເມືອງໄຊ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງອຸດົມໄຊ ກ່າວວ່າ: ອີງໃສ່ຄາດໝາຍ 2020 ອຸດົມໄຊ ຈະສູ້ຊົນດຶງດູດເອົານັກທ່ອງທ່ຽວມາທ່ຽວແຂວງໃຫ້ໄດ້ 3 ແສນກວ່າຄົນ, ແຕ່ຍ້ອນມີການລະບາດຂອງພະຍາດໂຄວິດ – 19 ອັນໄດ້ສົ່ງຜົນກະທົບຫຼາຍດ້ານ ເຮັດໃຫ້ຈຳນວນນັກທ່ອງທ່ຽວຫຼຸດລົງຫຼາຍ. ແນວໃດກໍຕາມ, ພວກເຮົາກໍໄດ້ມີການປັບປຸງພື້ນຖານໂຄງລ່າງ, ສ້າງສິ່ງອຳນວຍຄວາມສະດວກ ເປັນຕົ້ນແມ່ນການສ້າງເສັ້ນທາງໄປຫາຖໍ້າຈອມອອງ ປັດຈຸບັນສຳເລັດ 99% ເຊິ່ງແມ່ນທຶນຊ່ວຍເຫຼືອຈາກທະນາຄານພັດທະນາອາຊີ ( ADB ).

ພ້ອມນີ້, ທາງພະແນກພວກເຮົາກໍໄດ້ຈັດກອງປະຊຸມປຶກສາຫາລື ຮ່ວມກັບ ພາກທຸລະກິດພາຍໃນແຂວງ ເພື່ອຫາທາງອອກໃນການຮອງຮັບນັກທ່ອງທ່ຽວພາຍໃນ ເປັນຕົ້ນແມ່ນສຸມໃສ່ການພັດທະນາບຸກຄະລາກອນໃຫ້ມີຄວາມພ້ອມໃນການບໍລິການນັກທ່ອງທ່ຽວພາຍໃນປະເທດເຮົາ.

ທ່ານກ່າວວ່າ: ບັນດາສະຖານທີ່ທ່ອງທ່ຽວຫຼາຍບ່ອນ ເຊັ່ນ: ນໍ້າກັດຢໍລະປ່າ, ວັດພະເຈົ້າສິງຄຳ, ຖໍ້າຈອມອອງ ໃນປັດຈຸບັນນີ້ກໍຖືວ່າມີບັນຍາກາດດີຂຶ້ນ ເພາະມີນັກທ່ອງທ່ຽວທີ່ເປັນຄົນລາວມາທ່ຽວ. ທ່າມກາງສະພາບຄວາມຫຍຸ້ງຍາກດ້ານການທ່ອງທ່ຽວຄືປັດຈຸບັນນີ້ ເພື່ອເຮັດແນວໃດໃຫ້ການບໍລິການທ່ອງທ່ຽວ ສາມາດດຳເນີນໄປຕໍ່ໄດ້ຢູ່ພາຍໃນແຂວງອຸດົມໄຊ ຈຶ່ງໄດ້ເນັ້ນການຄວບຄຸມລາຄາ.

ແນວໃດກໍຕາມ ກໍຂໍເຊີນຊວນບັນດາທ່ານທີ່ຢູ່ພາກກາງ ແລະ ພາກໃຕ້ ໃຫ້ຂຶ້ນມາທ່ຽວຢູ່ພາກເໜືອ ໂດຍສະເພາະແມ່ນແຂວງອຸດົມໄຊ, ມາຮຽນຮູ້ມາສຳຜັດກັບອາກາດ, ວິຖີຊີວິດ ແລະ ອາຫານການກິນທີ່ແຕກຕ່າງຈາກແຂວງ ຫຼື ທ້ອງຖິ່ນຂອງທ່ານ, ອຸດົມໄຊມີດີຫຼາຍຢ່າງລໍຖ້າໃຫ້ທ່ານມາສຳຜັດ, ທ່ານ ບຸນກວມ ມິດເມືອງໄຊ ກ່າວ.