ຄະນະສະເພາະກິດເລັ່ງແກ້ໄຂບັນຫາຫວຍເຖື່ອນ

457

ປັດຈຸບັນການຂາຍຫວຍບໍ່ຖືກຕ້ອງ ( ຫວຍເຖື່ອນ ) ໄດ້ແຜ່ລາມເປັນວົງກວ້າງ ເຊິ່ງໄດ້ສ້າງ ຄວາມບໍ່ເປັນລະບຽບ ແລະ ກາຍເປັນປາກົດການຫຍໍ້ ທໍ້ໃນສັງຄົມ. ນອກນັ້ນ, ສົ່ງຜົນກະທົບຕໍ່ການບໍລິຫານຄຸ້ມຄອງຂອງລັດ, ລັດວິ ສາຫະກິດຫວຍພັດທະນາ ໄດ້ຮັບຜົນກະທົບຕໍ່ການດຳເນີນກິດຈະການ ແລະ ລາຍຮັບເຂົ້າງົບປະມານແຫ່ງລັດ.

ໃນວັນທີ 12 ຕຸລາ 2020 ຜ່ານມານີ້ ທີ່ຫ້ອງປະຊຸມໃຫຍ່ກະຊວງການເງິນ, ຄະນະກໍາມະການສະເພາະກິດຮັບຜິດຊອບ, ຕິດຕາມ, ກວດກາ, ແກ້ໄຂ, ສ້າງນິຕິກໍາທີ່ກ່ຽວຂ້ອງ ເພື່ອຕ້ານ ແລະ ສະກັດກັ້ນລະບົບຫວຍເຖື່ອນ ຕາມຂໍ້ຕົກລົງຂອງຮອງນາຍົກລັດຖະມົນຕີ ລັດຖະມົນຕີກະຊວງການເງິນ ສະບັບເລກທີ 1441/ກງ ລົງວັນທີ 08 ມິຖຸນາ 2020 ຈຶ່ງໄດ້ຈັດກອງປະຊຸມປຶກສາຫາລືປັບປຸງວຽກງານໃນຄະນະ, ເຜີຍແຜ່ຂໍ້ຕົກລົງ, ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ຮ່າງນິຕິກຳ ຄຳສັ່ງວ່າດ້ວຍການເພີ່ມທະວີຄວາມເຂັ້ມງວດໃນການກວດກາ, ສະກັດກັ້ນການຂາຍຫວຍເຖື່ອນ ຈຸດປະສົງເພື່ອຕ້ານ ແລະ ສະກັດກັ້ນ, ຕີຖອຍ, ທັບມ້າງລະບົບຫວຍເຖື່ອນຢ່າງຈິງຈັງ ແຂງແຮງ ແລະ ມີປະສິດທິຜົນໄວ.

ໂດຍການເປັນປະທານຂອງ ທ່ານ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ທັງເປັນຫົວໜ້າຄະນະສະເພາະກິດ ຕາມຂໍ້ຕົກລົງສະບັບເລກທີ 1441/ກງ, ມີຄະນະສະເພາະກິດ, ຄະນະອຳນວຍ ການບໍລິສັດ ລັດວິສາຫະກິດຫວຍພັດທະນາ, ຄະນະກໍາມະການສະເພາະກິດ, ພະນັກງານວິຊາການຂອງກະຊວງການເງິນ ແລະ ບັນດາກະຊວງອ້ອມຂ້າງເຂົ້າຮ່ວມ.

ໂອກາດດັ່ງກ່າວ, ທ່ານ ບຸນເຫຼືອ ສິນໄຊວໍຣະວົງ ໃຫ້ຮູ້ວ່າ: ການແກ້ໄຂການຂາຍຫວຍບໍ່ຖືກຕ້ອງ ( ຫວຍເຖື່ອນ ) ໄດ້ມີການເຮັດຂໍ້ຕົກລົງສະບັບເລກທີ 5004/ກງ ລົງວັນທີ 18 ທັນວາ 2019, ແຕ່ເນື່ອງຈາກວ່າໄດ້ມີການສັບປ່ຽນໝູນວຽນກົງຈັກການຈັດຕັ້ງພາຍໃນກະຊວງການເງິນ ແລະ ບັນດາກະຊວງອ້ອມຂ້າງ ຈຶ່ງໄດ້ມີການສະເໜີອອກຂໍ້ຕົກລົງໃໝ່ປ່ຽນແທນ.

ເຖິງຢ່າງໃດກໍຕາມ, ຜ່ານມາກໍດຳເນີນການວຽກງານດັ່ງກ່າວຢ່າງຕັ້ງໜ້າ ແລະ ເຮັດໃຫ້ສາມາດກວດພົບເຫັນການຂາຍຫວຍເຖື່ອນມີຫຼາຍກໍລະນີ ແລະ ໄດ້ດຳເນີນການຕາມລະບຽບກົດໝາຍແຕ່ລະໄລຍະ ແລະ ກອງປະຊຸມຄັ້ງນີ້ ເພື່ອຮັບຟັງການຜ່ານຂໍ້ຕົກລົງ ສະບັບເລກທີ 1441/ກງ, ແຈ້ງການສະບັບເລກທີ 2253/ຫສນຍ ລົງວັນທີ 25 ທັນວາ 2019, ຜ່ານຮ່າງນິຕິກໍາຕ່າງໆທີ່ຕິດພັນກັບວຽກງານຕ້ານ ແລະ ສະກັດກັ້ນລະບົບຫວຍເຖື່ອນ, ຮັບຟັງການລາຍງານການຈັດຕັ້ງປະຕິບັດການອອກເລກລາງວັນ ແລະ ການຄຸ້ມຄອງການຈຳໜ່າຍຫວຍພັດທະນາຜ່ານມາ ເພື່ອໃຫ້ໄດ້ເຂົ້າໃຈເຖິງກົນໄກ ແລະ ພາບລວມການຄຸ້ມຄອງວຽກງານຫວຍພັດທະນາ, ພ້ອມທັງຮັບຟັງການລາຍງານການຈັດຕັ້ງປະຕິບັດການຕິດຕາມກວດກາ, ຕ້ານ ແລະ ສະກັດກັ້ນການຂາຍຫວຍເຖື່ອນໃນໄລຍະຜ່ານມາ ແລະ ການແບ່ງຄວາມຮັບຜິດຊອບພາຍໃນຄະນະ, ແຜນວຽກ ແລະ ແຜນງົບປະມານ.

ອີງຕາມການລາຍງານຂອງ ທ່ານ ສຸບັນ ເພຍສັກຂາ ຮອງຜູ້ອຳນວຍການ ບໍລິສັດ ລັດວິສາຫະກິດ ຫວຍພັດທະນາ ໃຫ້ຮູ້ວ່າ: ການດໍາເນີນທຸລະກິດໃນໄລຍະ 5 ປີຜ່ານມາ ນັບແຕ່ 2015 – 2019 ສາມາດປະຕິບັດລາຍຮັບໄດ້ 501,24 ຕື້ ກວ່າກີບ ສະເລ່ຍຕໍ່ປີເທົ່າກັບ 100,24 ຕື້ກວ່າກີບ, ກໍາໄລສຸດທິ ເທົ່າກັບ 255,84 ຕື້ກວ່າກີບ ສະເລ່ຍຕໍ່ປີເທົ່າກັບ 51,17 ຕື້ ກວ່າກີບ, ມອບພັນທະງົບປະມານໃຫ້ລັດເທົ່າກັບ 328,03 ຕື້ກວ່າກີບ ສະເລ່ຍຕໍ່ປີເທົ່າກັບ 65,61 ຕື້ກວ່າກີບ.

ສໍາລັບການດຳເນີນທຸລະກິດໃນ 09 ເດືອນປີ 2020 ລວມຍອດລາຍຮັບປະຕິບັດໄດ້ 67,07 ຕື້ກວ່າກີບ ເທົ່າກັບ 104,61% ຂອງແຜນການ, ກໍາໄລລວມປະຕິບັດໄດ້ 48,73 ຕື້ກວ່າກີບ ເທົ່າກັບ 113,64% ຂອງແຜນການ, ມອບພັນທະງົບປະມານມອບໃຫ້ລັດ ປະຕິບັດໄດ້ 39,58 ຕື້ກວ່າກີບ ເທົ່າກັບ 113,13% ຂອງແຜນການ. ນອກນັ້ນ, ຍັງໄດ້ຊື້ພັນທະບັດນໍາຄັງເງິນແຫ່ງຊາດ ເພື່ອດຸນດ່ຽງງົບປະມານໃຫ້ລັດ ຈໍານວນ 110 ຕື້ກີບ.

ທ່ານ ວັນເຮືອງ ຈັນທະພອນ ຮອງຫົວໜ້າກົມເສດຖະກິດ ກະຊວງປ້ອງກັນຄວາມສະຫງົບ ໄດ້ລາຍງານສະພາບການຈັດຕັ້ງປະຕິບັດການຕິດຕາມກວດກາ, ສະກັດກັ້ນການຂາຍຫວຍເຖື່ອນໃນໄລຍະຜ່ານມາ ເຊິ່ງການຂາຍຫວຍເຖື່ອນ ( ທີ່ບໍ່ໄດ້ຮັບອະນຸຍາດ ) ຢູ່ສປປ ລາວ ແມ່ນມີຫວຍໄທ, ຫວຍຫວຽດນາມ, ຫວຍມາເລເຊຍ ແລະ ຫວຍຈີນ ທີ່ມີການຈໍາໜ່າຍໃນລາວ ເຊິ່ງການຂາຍແບບຈົດ, ຂາຍທາງໂທລະສັບ, ເຟສບຸ໊ກ, ວັອດແອັບ, ວີແຊັດ, ລາຍ ແລະ ເອົາໃບຫວຍຈາກປະເທດໄທມາວາງຂາຍບາງຈຸດຢູ່ນະຄອນຫຼວງ ວຽງຈັນ ແລະ ຕ່າງແຂວງ ( ສະເພາະຫວຍໄທ ).

ຕໍ່ກັບບັນຫາດັ່ງກ່າວກົມຕໍາຫຼວດເສດຖະກິດ ໄດ້ອອກຂໍ້ຕົກລົງເພື່ອແຕ່ງຕັ້ງຄະນະຮັບຜິດຊອບໃນການແກ້ໄຂ, ອອກຄໍາແນະນໍາ, ແຈ້ງການ ແຈ້ງເຖິງທຸກພາກສ່ວນໃນຂອບເຂດທົ່ວປະເທດ ໃຫ້ຮັບຊາບຕໍ່ຜູ້ທີ່ລະເມີດການຂາຍຫວຍເຖື່ອນ ແລະ ທຸກກິດຈະການຕ່າງໆທີ່ຜິດກົດໝາຍໃຫ້ຢຸດເຊົາ ຖ້າບໍ່ຢຸດແມ່ນຈະໄດ້ປະຕິບັດແກ້ໄຂຕາມລະບຽບກົດໝາຍຢ່າງເຂັ້ມງວດ ແລະ ເດັດຂາດ.

ຜ່ານການຈັດຕັ້ງປະຕິບັດໄລຍະຜ່ານມາ ສາມາດສະກັດກັ້ນ ແລະ ແກ້ໄຂເປົ້າໝາຍໄດ້ ຄື: ໄດ້ຂຶ້ນເປົ້າໝາຍຫຼິ້ນຫວຍເຖື່ອນຢູ່ພາຍໃນ ແລະ ນໍາມາຈາກຕ່າງປະເທດມີທັງໝົດ 420 ຄົນ ຍິງ 290 ຄົນ, ເປັນຄົນຫວຽດນາມ 2 ຄົນ ໄດ້ສຶກສາອົບຮົມກ່າວເຕືອນ 79 ຄົນ ຍິງ 38 ຄົນ, ດໍາເນີນຄະດີ 2 ຄົນ ເປັນເພດຍິງ ແລະ ຢຶດໃບຫວຍໄທໄດ້ 134 ໃບ.

ນອກນັ້ນ, ຍັງໄດ້ລົງກວດບຸກຄົນທີ່ຂາຍຫວຍດິຈິຕອນ ສາຂາຫວຍພັດທະນາ ຄື: 1, 5, 6, 7 ແລະ 8 ເຄື່ອງທີ່ບໍ່ໄດ້ຢູ່ໃນການຄວບຄຸມຂອງບໍລິສັດ ລັດວິສາຫະກິດ ຫວຍພັດທະນາລາວ ແລະ ສາມາດຢຶດໄດ້ເຄືອຂ່າຍຫວຍດິຈິຕອນ ແລະ ປຶ້ມຈົດຂາຍແບບເກົ່າໄດ້ອີກດ້ວຍ.