ຄະນະສະເພາະກິດອອກຂໍ້ແນະນຳຜ່ອນຜັນການຈຳກັດບໍລິເວນ

575

ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ – 19 ໄດ້ອອກຄຳແນະນຳເລກທີ 3053/ສພກ ລົງວັນທີ 14 ຕຸລາ 2020 ກ່ຽວກັບການປະຕິບັດມາດຕະການຜ່ອນຜັນການຈໍາກັດບໍລິເວນຜູ້ທີ່ເດີນທາງມາຈາກປະເທດທີ່ບໍ່ມີການລະບາດຂອງພະຍາດໂຄວິດ – 19 ໃນຊຸມຊົນ.

ອີງຕາມຄໍາສັ່ງຂອງທ່ານນາຍົກລັດຖະມົນຕີ ວ່າດ້ວຍການເພີ່ມທະວີມາດຕະການສະກັດກັ້ນ, ກັນລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ ໂຄວິດ – 19 ສະບັບເລກທີ 06/ນຍ ລົງວັນທີ 29 ມີນາ 2020; ອີງຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1049/ຫສນຍ ລົງວັນທີ 30 ກັນຍາ 2020; ອີງຕາມຜົນກອງປະຊຸມຂອງກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ – 19 ຄັ້ງວັນທີ 7 ຕຸລາ 2020 ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ – 19 ອອກຄໍາແນະນໍາສໍາລັບຜູ້ທີ່ຈະເດີນທາງມາຈາກປະເທດທີ່ບໍ່ມີການລະບາດຂອງພະຍາດໂຄວິດ – 19 ໃນຊຸມຊົນດັ່ງລຸ່ມນີ້:

1 ຕ້ອງມີໃບຢັ້ງຢືນຜົນກວດໂຄວິດ – 19 ພາຍໃນ 72 ຊົ່ວໂມງ ກ່ອນການເດີນທາງ, ເວລາເຂົ້າມາຕ້ອງໄດ້ກວດຫາເຊື້ອ ແລະ ຈໍາກັດບໍລິເວນຢູ່ສະຖານທີ່ທີ່ຄະນະສະເພາະກິດກໍານົດໄວ້ ເພື່ອລໍຖ້າຜົນກວດ 48 ຊົ່ວໂມງ ຫຼື ຈົນກວ່າໄດ້ຮັບຜົນກວດ, ຄະນະສະເພາະກິດຈະພິຈາລະນາຕາມສະພາບການລະບາດຂອງປະເທດຕົ້ນທາງ ເພື່ອອະນຸຍາດໃຫ້ໄປສືບຕໍ່ຈໍາກັດບໍລິເວນຢູ່ເຮືອນ, ສະຖານທີ່ເຮັດວຽກ ຫຼື ໂຮງແຮມ ຈົນຄົບ 14 ວັນ.

ກ ກໍລະນີບໍ່ພົບເຊື້ອ:

1 ສໍາລັບພົນລະເມືອງລາວ: ເມື່ອໄດ້ຮັບອະນຸຍາດໃຫ້ໄປສືບຕໍ່ຈໍາກັດບໍລິເວນຢູ່ເຮືອນຂອງຕົນແລ້ວ ມອບໃຫ້ອົງການປົກຄອງທ້ອງຖິ່ນ, ຄອບຄົວຮັບຜິດຊອບຕິດຕາມ ໃຫ້ຜູ້ກ່ຽວປະຕິບັດຕາມຄໍາແນະນໍາຂອງຄະນະສະເພາະກິດວາງອອກຢ່າງຖືກຕ້ອງ ແລະ ເຂັ້ມງວດຈົນຄົບ 14 ວັນ ເປັນຕົ້ນ: ຕິດຕາມແທກອຸນຫະພູມແຕ່ລະວັນ, ໝັ່ນລ້າງມືດ້ວຍນໍ້າສະອາດ, ໃສ່ສະບູ ຫຼື ເຈວລ້າງມືຂ້າເຊື້ອ, ບໍ່ໃຫ້ເດີນທາງອອກໄປຂ້າງນອກ, ບໍ່ໃຫ້ໃກ້ຊິດກັບຄົນອື່ນ, ຮັກສາມາລະຍາດໃນການໄອ ແລະ ຈາມ, ເປີດປ່ອງຢ້ຽມ ເພື່ອລະບາຍອາກາດພາຍໃນຫ້ອງໃຫ້ຖ່າຍເທ, ຖ້າວ່າຮູ້ສຶກບໍ່ສະບາຍໃຫ້ໂທຫາສາຍດ່ວນ 165, 166.

ไม่มีคำอธิบาย

2 ສໍາລັບຕົ້ນຕ່າງປະເທດ: ເມື່ອໄດ້ຮັບອະນຸຍາດໃຫ້ໄປສືບຕໍ່ຈໍາກັດບໍລິເວນຢູ່ເຮືອນພັກຂອງຕົນ, ສະຖານທີ່ເຮັດວຽກ ຫຼື ໂຮງແຮມ, ຖ້າບ່ອນເຮັດວຽກບໍ່ແອອັດ ແມ່ນອະນຸຍາດໃຫ້ເຮັດວຽກໄດ້ ມອບໃຫ້ບໍລິສັດຮັບຜິດຊອບຕິດຕາມ ແລະ ລາຍງານໃຫ້ອົງການປົກຄອງທ້ອງຖິ່ນເປັນແຕ່ລະໄລຍະ, ໃຫ້ພວກກ່ຽວປະຕິບັດຕາມຄໍາແນະນໍາຂອງຄະນະສະເພາະກິດວາງອອກຢ່າງຖືກຕ້ອງ ແລະ ເຂັ້ມງວດຈົນຄົບ 14 ວັນ ເປັນຕົ້ນ: ຕິດຕາມແທກອຸນຫະພູມແຕ່ລະວັນ, ໝັ່ນລ້າງມືດ້ວຍນໍ້າສະອາດ, ໃສ່ສະບູ ຫຼື ເຈວລ້າງມືຂ້າເຊື້ອ, ບໍ່ໃຫ້ເດີນທາງອອກໄປຂ້າງນອກ, ບໍ່ໃຫ້ໃກ້ຊິດກັບຄົນອື່ນ, ຮັກສາມາລະຍາດໃນການໄອ ແລະ ຈາມ, ເປີດປ່ອງຢ້ຽມ ເພື່ອລະບາຍອາກາດພາຍໃນຫ້ອງໃຫ້ຖ່າຍເທ, ຖ້າວ່າຮູ້ສຶກບໍ່ສະບາຍໃຫ້ໂທຫາສາຍດ່ວນ 165, 166.

3 ສໍາລັບນັກທ່ອງທ່ຽວເປັນກຸ່ມ: ຕ້ອງມີເອກະສານຢັ້ງຢືນການຈໍາກັດບໍລິເວນ 14 ວັນ ແລະ ໃບຢັ້ງຢືນຜົນກວດໂຄວິດ – 19 ພາຍໃນ 7 ຊົ່ວໂມງ ກ່ອນການເດີນທາງຈາກປະເທດຕົ້ນທາງ, ຖ້າກວດບໍ່ພົບເຊື້ອ ສາມາດໄປເຄື່ອນໄຫວຕາມແຜນການທ່ອງທ່ຽວທີ່ໄດ້ກໍານົດໄວ້ ໂດຍມອບໃຫ້ສະມາຄົມ ແລະ ບໍລິສັດທ່ອງທ່ຽວຕິດຕາມ ໃຫ້ພວກກ່ຽວປະຕິບັດຕາມຄໍາແນະນໍາຂອງຄະນະສະເພາະກິດວາງອອກຢ່າງຖືກຕ້ອງ ແລະ ເຂັ້ມງວດ.

ຂ ກໍລະນີພົບເຊື້ອ:

1 ທຸກຄົນທີ່ເດີນທາງເຂົ້າມາ ສປປ ລາວ ຖ້າກວດພົບເຊື້ອ ຈະຖືກນໍາສົ່ງໄປແຍກປ່ຽວ ແລະ ປິ່ນປົວຢູ່ໂຮງໝໍທີ່ໄດ້ກໍານົດໄວ້.

2 ຜູ້ເດີນທາງຈາກປະເທດທີ່ມີລາຍງານການລະບາດຂອງໂຄວິດ – 19 ໃນຊຸມຊົນ ແມ່ນໃຫ້ຈໍາກັດບໍລິເວນຢູ່ສະຖານທີ່ຄະນະສະເພາະກິດໄດ້ກໍານົດໄວ້ ຈົນຄົບ 14 ວັນ.

ຄໍາແນະນໍາສະບັບນີ້ມີຜົນບັງຄັບໃຊ້ນັບແຕ່ມື້ລົງລາຍເຊັນເປັນຕົ້ນໄປ ຈົນກວ່າຈະມີສະບັບໃໝ່ປ່ຽນແທນ.