ຜູ້ຕິດເຊື້ອໂຄວິດ – 19ນໍ້າເບີ 23 ຍັງສືບຕໍ່ປິ່ນປົວຢູ່ໂຮງໝໍ

331

ສປປ ລາວ ບໍ່ພົບຜູ້ຕິດເຊື້ອໂຄວິດ – 19 ເພີ່ມ, ສ່ວນຜູ້ຕິດເຊື້ອກໍລະນີທີ 23 ແມ່ນຍັງກວດພົບເຊື້ອຢູ່. ສ່ວນສະພາບການຂອງໂລກຍອດຕິດເຊື້ອລາຍວັນຍັງເພີ່ມຂຶ້ນສູງ.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ – 19 ທັງໃນລາວ ແລະ ທົ່ວໂລກ ໃນວັນທີ 12 ຕຸລາ ວ່າ: ມາຮອດວັນທີ 12 ຕຸລາ 2020 ທົ່ວໂລກມີການລາຍງານການລະບາດ ທັງໝົດ 214 ( ປະເທດ/ເຂດ ) ເຊິ່ງມີການຢັ້ງຢືນຜູ້ຕິດເຊື້ອໂຄວິດ – 19 ແມ່ນ 37.729.729 ຄົນ, ເສຍຊີວິດ 1.081.119 ຄົນ ເຊິ່ງກວມເອົາ 2,86% ຂອງຜູ້ຕິດເຊື້ອທັງໝົດ, ປິ່ນປົວດີ 28.332.354 ຄົນ ເຊິ່ງກວມເອົາ 75% ຂອງຜູ້ຕິດເຊື້ອທັງໝົດ.

ສໍາລັບການເຝົ້າລະວັງໂຄວິດ – 19 ຢູ່ ສປປ ລາວ ຮອດ 17:00 ໂມງ ຂອງວັນທີ 11 ຕຸລາ 2020, ການຕິດຕາມຜູ້ເດີນທາງຈາກຈຸດຜ່ານແດນຕ່າງໆທົ່ວປະເທດມີຜູ້ເດີນທາງເຂົ້າມາທັງໝົດ 1.216 ຄົນ ເຊິ່ງທຸກຄົນແມ່ນໄດ້ແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ( ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ໃນວັນທີ 11 ຕຸລາ 2020 ໄດ້ເກັບຕົວຢ່າງມາກວດວິເຄາະທັງໝົດ 156 ຄົນ, ໃນນັ້ນມີແຮງງານລາວມາແຕ່ໄທ 107 ຕົວຢ່າງ, ແຮງງານໄທ 5 ຕົວຢ່າງ, ບຸກຄົນທົ່ວໄປທີ່ບໍ່ມີອາການ 41 ຕົວຢ່າງ, ບຸກຄົນທົ່ວໄປທີ່ມີອາການ 2 ຕົວຢ່າງ ແລະ ຜູ້ຕິດເຊື້ອນ້ຳເບີ 23 ມາກວດຄືນ 1 ຕົວຢ່າງ ເຊິ່ງຜົນກວດວິເຄາະແມ່ນບໍ່ພົບຜູ້ຕິດເຊື້ອເພີ່ມ, ໝາຍຄວາມວ່າໃນວັນທີ 11 ຕຸລາ 2020 ບໍ່ມີຜູ້ຕິດເຊື້ອໃໝ່. ສຳລັບຜູ້ຕິດເຊື້ອນ້ຳເບີ 23 ແມ່ນຍັງພົບເຊື້ອຢູ່.

ສັງລວມການກວດວິເຄາະແຕ່ເດືອນມັງກອນ ຮອດວັນທີ 11 ຕຸລາ 2020 ໄດ້ເກັບຕົວຢ່າງມາກວດທັງໝົດ 58.078 ຕົວຢ່າງ, ກວດພົບເຊື້ອສະສົມ 23 ຄົນ.

ສ່ວນການຕິດຕາມປິ່ນປົວຄົນເຈັບຢູ່ໂຮງໝໍປັດຈຸບັນ, ຄົນເຈັບຕິດເຊື້ອພະຍາດໂຄວິດ – 19 ນໍ້າເບີ 23 ແມ່ນຍັງສືບຕໍ່ປິ່ນປົວຢູ່ໂຮງໝໍມິດຕະພາບ ແລະ ບໍ່ມີອາການຜິດປົກກະຕິຫຍັງ.

ທ່ານ ດຣ. ສີສະຫວາດ ສຸດທານີລະໄຊ ຕື່ມວ່າ: ບັນຫາສຳຄັນແມ່ນການລາຍງານຈຳນວນຜູ້ຕິດເຊື້ອ ແລະ ຜູ້ເສຍຊີວິດຈາກທົ່ວໂລກຍັງມີທ່າອ່ຽງ ເພີ່ມສູງຂຶ້ນຢ່າງຕໍ່ເນື່ອງ ຈຶ່ງຂໍຮຽກຮ້ອງຈາກທຸກພາກສ່ວນໃນສັງຄົມຈົ່ງພ້ອມໃຈກັນປົກປ້ອງຕົນເອງ ແລະ ຄົນໃນຄອບຄົວຂອງທ່ານ ໂດຍການປະຕິບັດມາດຕະການປ້ອງກັນການຕິດເຊື້ອຢ່າງເຄັ່ງຄັດ ເປັນຕົ້ນການລ້າງມືເລື້ອຍໆ ໂດຍໃຊ້ສະບູ ແລະ ນ້ຳສະອາດ ຫຼື ເຈວລ້າງມືທີ່ປະສົມເຫຼົ້າ, ຮັກສາໄລຍະຫ່າງໃນສັງຄົມ, ໃສ່ຜ້າອັດປາກດັງ ເມື່ອໄປສະຖານທີ່ທີ່ມີຜູ້ຄົນແອອັດ, ບໍ່ເອົາມືສຳຜັດຕາ, ດັງ ຫຼື ປາກ, ເມື່ອທ່ານ ໄອ – ຈາມ ຄວນໃຊ້ແຂນພັບຂໍ້ສອກອັດປາກ, ກິນຮ້ອນໃຊ້ບ່ວງກາງ ແລະ ໄປພົບແພດ ເມື່ອທ່ານຮູ້ສຶກບໍ່ສະບາຍ, ການປະຕິບັດທັງໝົດນີ້ກໍແມ່ນເພື່ອຫຼຸດຜ່ອນ ແລະ ສະກັດກັ້ນການລະບາດບໍ່ໃຫ້ຂະຫຍາຍເປັນວົງກວ້າງ.