ຄູໃນສະຕະວັດທີ 21 ຕ້ອງສອນວິຊາສະເພາະ ໃຫ້ຕິດພັນການນຳໃຊ້ຕົວຈິງໃນຍຸກ ໄອຊີທີ

499

ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ໄດ້ມີຄໍາເຫັນໃນໂອກາດສະເຫຼີມສະຫຼອງວັນຄູແຫ່ງຊາດ ວັນທີ 7 ຕຸລາ ໂດຍເນັ້ນຄູ – ອາຈານໃນຂອບເຂດທົ່ວປະເທດ ຕະຫຼອດຮອດຜູ້ບໍລິຫານການສຶກສາ ແລະ ກີລາທຸກຂັ້ນເອົາໃຈໃສ່ຄົ້ນຄວ້າລົງເລິກວິຊາທີ່ຕົນຮັບຜິດຊອບ, ການສອນວິຊາສະເພາະຕ້ອງຕິດພັນກັບການນຳໃຊ້ຕົວຈິງໃນຊີວິດສັງຄົມ ຄູລາວໃນສະຕະວັດທີ 21 ນີ້ ຈະຕ້ອງເປັນຜູ້ທີ່ມີຈັນຍາບັນອັນໜັກແໜ້ນ, ມີຈິດວິນຍານຂອງຄວາມເປັນຄູຢ່າງເລິກເຊິ່ງ.

ວັນຄູແຫ່ງຊາດ ວັນທີ 7 ຕຸລາ ເຊິ່ງເປັນວັນປະຫວັດສາດທີ່ສໍາຄັນໜຶ່ງຂອງຊາດລາວເຮົາ ໄດ້ໝູນວຽນມາບັນຈົບຄົບຮອບ 26 ປີ ( ວັນທີ 7 ຕຸລາ 1994 ຫາວັນທີ 7 ຕຸລາ 2020 ), ຂ້າພະເຈົ້າ ຕາງໜ້າໃຫ້ຄະນະພັກ, ຄະນະນໍາກະຊວງສຶກສາທິການ ແລະ ກີ ລາ ຂໍສະແດງຄວາມຢື້ຢາມຖາມຂ່າວ, ຄວາມສາມັກຄີຮັກແພງອັນອົບອຸ່ນ ມາຍັງເພື່ອນໆ ຄູ – ອາຈານ ໃນຂອບເຂດທົ່ວປະເທດ ຕະຫຼອດຮອດຜູ້ບໍລິຫານການສຶກສາ ແລະ ກີລາທຸກຂັ້ນ.

ພັກ ແລະ ລັດຖະບານ ເວລາໃດກໍໄດ້ໃຫ້ຄວາມສໍາຄັນ ແລະ ເອົາໃຈໃສ່ຕໍ່ວຽກງານການສຶກສາຄູ ແລະ ຖືເອົາຄູສອນເປັນກົກ ໃນການຍົກສູງຄຸນນະພາບຂອງການສຶກສາ ກໍຄືການພັດທະນາຊັບພະຍາກອນມະນຸດ; ຄູໄດ້ມີບົດບາດສໍາຄັນໃນການສ້າງອະນາຄົດໃຫ້ຄົນແຕ່ລະຮຸ່ນ ແລະ ໃນພາລະກິດສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ ຈົນຖືກສັງຄົມຂະໜານນາມວ່າ: ຄູແມ່ນຄົນຂອງພັກ, ຄູແມ່ນວິສະວະກອນແຫ່ງດວງວິນຍານ, ຄູແມ່ນແມ່ພິມຂອງຊາດ, ຄູແມ່ນພໍ່ແມ່ຜູ້ທີສອງຂອງເດັກ, ຄູແມ່ນຜູ້ທີ່ມີຄວາມຮູ້ ແລະ ປະສົບການທີ່ສາມາດຖ່າຍທອດໃຫ້ແກ່ຜູ້ອື່ນ, ຄູຄືຜູ້ນໍາພາການປ່ຽນແປງໃໝ່ ແລະ ອື່ນໆ.

ເມື່ອທົບທວນເບິ່ງແລ້ວຈະເຫັນວ່າພາລະໜ້າທີ່ຂອງຄູ ແມ່ນມີຄວາມສໍາຄັນ, ໜັກໜ່ວງ ແລະ ມີຂອບເຂດ ກວ້າງຂວາງຫຼາຍ ໃນການດໍາເນີນພາລະກິດການສຶກສາຂອງພັກ ແລະ ລັດຖະບານ ກໍຄືການຈັດຕັ້ງຜັນຂະຫຍາຍແຜນພັດທະນາການສຶກສາ ແລະ ກີລາ ໂດຍສະເພາະແມ່ນການຮັບປະກັນການສະໜອງການສຶກສາໃຫ້ມີຄຸນນະພາບ ແລະ ປະຊາຊົນບັນດາເຜົ່າສາມາດເຂົ້າເຖິງ. ສຳລັບການສະເຫຼີມ ສະຫຼອງວັນຄູແຫ່ງຊາດ ປີ 2020 ນີ້ ສອດຄ່ອງກັບວັນຄູສາກົນ ຄືວັນທີ 5 ຕຸລາ 2020 ເຊິ່ງປີນີ້ໃສ່ຫົວຂໍ້ວ່າ “ ຄູເປັນຜູ້ນຳພາຜ່ານຜ່າວິກິດ ພິຊິດອະນາຄົດທີ່ກ້າວໜ້າ ”, ອົງການອຸຍແນັສໂກເວົ້າວ່າ ວັນຄູສາກົນປີນີ້ເປັນໂອກາດສະເຫຼີມສະຫຼອງຜົນງານການສິດສອນຂອງຄູໃນທົ່ວໂລກ, ເປັນໂອກາດສັງລວມບັນດາຜົນສຳເລັດທີ່ປະຕິບັດໄດ້ດີໃນປີຜ່ານມາ ແລະ ເພີ່ມ ຄວາມເອົາໃຈໃສ່ໃນການຮັບຟັງຄຳຄິດເຫັນຂອງຄູ ຜູ້ເປັນຫົວໃຈແຫ່ງຄວາມສຳເລັດຂອງເປົ້າໝາຍການສຶກສາໃນທົ່ວໂລກ.

ສຳລັບ ສປປ ລາວ ຂອງພວກເຮົາ ໃນໄລຍະ 26 ປີທີ່ຜ່ານມາ ເຖິງວ່າສະພາບເສດຖະກິດໄດ້ພົບກັບຄວາມຫຍຸ້ງຍາກຫຼາຍປະການ ສະເພາະປີນີ້ພັດມີການລະບາດຂອງເຊື້ອພະຍາດໂຄວິດ – 19 ເຊິ່ງມີຜົນກະທົບໂດຍກົງຕໍ່ການຈັດການຮຽນ – ການສອນ, ແຕ່ດ້ວຍຄວາມເຊື່ອໝັ້ນຕໍ່ອຸດົມການຂອງພັກ, ຄູ – ອາຈານ ແລະ ຜູ້ບໍລິຫານການສຶກສາໄດ້ອຸທິດສະຕິປັນຍາ – ເຫື່ອແຮງຕໍ່ການປະຕິບັດໜ້າທີ່ການສອນຂອງຕົນດ້ວຍຄວາມພາກພຽນ ແລະ ມານະອົດທົນ ອັນໄດ້ເຮັດໃຫ້ວຽກງານພັດທະນາການສຶກສາໄດ້ຂະຫຍາຍຕົວ ນັບແຕ່ສູນກາງຮອດທ້ອງຖິ່ນ; ຕານ່າງການສຶກສາໄດ້ຂະຫຍາຍໄປທົ່ວປະເທດ, ເຂດຫ່າງໄກສອກຫຼີກທຸກແຫ່ງລ້ວນແຕ່ເຂົ້າເຖິງການຮຽນ – ການສອນ, ຄູ – ອາຈານ ຫຼາຍໆຄົນກາຍເປັນຄູສອນ ດີ – ສອນເກັ່ງ, ກາຍເປັນຄູຊ່ຽວຊານ, ຄູປະສົບການ, ຄູຊໍານານງານ, ຜູ້ຊ່ວຍອາຈານ, ອາຈານ, ຮອງສາດສະດາຈານ ແລະ ສາດສະດາຈານ ທັງມີສະຖານະພາບ ແລະ ມີບົດບາດສູງຂຶ້ນໃນສັງຄົມ.

ຕາງໜ້າໃຫ້ການນໍາຂອງພັກ ແລະ ລັດຖະບານ, ຂ້າພະເຈົ້າຂໍສະແດງຄວາມກະຕັນຍູ, ຮູ້ບຸນຄຸນ ແລະ ຍ້ອງຍໍຊົມເຊີຍຕໍ່ຄຸນງາມຄວາມດີຂອງຄູ – ອາຈານ. ພ້ອມກັນ ນີ້, ກໍຂໍສະແດງຄວາມຂອບໃຈມາຍັງທຸກພາກສ່ວນໃນທົ່ວສັງຄົມທີ່ໄດ້ມີສ່ວນຮ່ວມ ແລະ ໃຫ້ການຊ່ວຍເຫຼືອຄູ – ອາຈານ ແລະ ຜູ້ບໍລິຫານການສຶກສາໃນຊຸມປີຜ່ານມາ ເປັນການປະກອບສ່ວນຍົກສູງຄຸນນະພາບການສຶກສາຂອງປະເທດເຮົາໃຫ້ເທົ່າທຽມກັບພາກພື້ນ ແລະ ສາກົນດີຂຶ້ນເປັນກ້າວໆ, ພັກ ແລະ ລັດຖະບານ ຕີລາຄາສູງຕໍ່ຜົນງານການປະກອບສ່ວນຂອງຄູ – ອາຈານເຂົ້າໃນການພັດທະນາເສດຖະກິດ – ສັງຄົມຂອງປະເທດ ໂດຍສະເພາະແມ່ນການກໍ່ສ້າງ ແລະ ການພັດທະນາຊັບພະຍາກອນມະນຸດ/ພັດທະນາຄົນ ນັບແຕ່ຊັ້ນເດັກກ່ອນໄວຮຽນຈົນຮອດມະຫາວິທະຍາໄລ.

ໃນປະຫວັດແຫ່ງການຕໍ່ສູ້ ແລະ ການສ້າງສາພັດທະນາປະເທດຊາດ ບໍ່ວ່າຍຸກໃດສະໄໝໃດ ມັນຮຽກຮ້ອງໃຫ້ມີຊັບພະຍາກອນມະນຸດທີ່ມີຄວາມຮູ້, ຄວາມສາມາດ, ມີແບບແຜນການດຳລົງຊີວິດທີ່ປອດໃສ, ມີຄຸນສົມບັດທີ່ໜັກແໜ້ນ; ຢາກເຮັດໄດ້ຄືແນວນັ້ນ ຄູ – ອາຈານຂອງພວກເຮົາທີ່ຢູ່ຕາມສະຖານການສຶກສາໃນໂຮງຮຽນ, ນອກໂຮງຮຽນ ແລະ ຕາມອັດທະຍາໄສ ຍິ່ງຈະຕ້ອງໄດ້ເສີມຂະຫຍາຍການຮຽນຮູ້ຂອງຕົນເອງ ໃຫ້ກ້າວທັນການປ່ຽນແປງຂອງສາກົນກວ່າເວລາໃດໝົດ.

– ທາງດ້ານຄວາມຮູ້: ຈະຕ້ອງໄດ້ຄົ້ນຄວ້າລົງເລິກວິຊາທີ່ຕົນຮັບຜິດຊອບໃຫ້ເລິກເຊິ່ງ, ການສອນວິຊາສະເພາະຕ້ອງຕິດພັນກັບການນຳໃຊ້ຕົວຈິງກັບຊີວິດສັງຄົມ ສາມາດປະສົມປະສານແຫຼ່ງການຮຽນຮູ້ທີ່ມີຢ່າງຫຼາກຫຼາຍໃນປັດຈຸບັນໃຫ້ເກີດປະໂຫຍດສູງສຸດໃນການຮຽນຂອງນັກຮຽນ ແລະ ນັກສຶກສາ. ນອກຈາກຈະມີວິຊາສະເພາະແລ້ວຕ້ອງຮຽນຮູ້ບັນ ດາທັກສະ ສະຕະວັດທີ 21 ເຊັ່ນ: ການນຳໃຊ້ເຕັກໂນໂລຊີຂໍ້ມູນຂ່າວສານ ( ICT Literacy ), ທັກສະການຮຽນດ້ວຍຕົນເອງ, ທັກສະທາງດ້ານສັງຄົມ ( Soft Skills ), ຮູ້ນຳໃຊ້ພາສາຕ່າງປະເທດ ແລະ ອື່ນໆ.

– ທາງດ້ານຄວາມສາມາດ: ຕ້ອງເປັນຜູ້ນຳພາເຮັດຕົວຈິງໃນທຸກພາລະກິດທີ່ ພັກ – ລັດມອບໝາຍໃຫ້ສຳເລັດ, ມີຄຸນນະພາບ ແລະ ດ້ວຍຄວາມຮັບຜິດຊອບສູງ ເຊັ່ນ: ຜັນຂະຫຍາຍຈິດໃຈ 3 ລັກສະນະ ແລະ 5 ຫຼັກມູນຂອງຂະແໜງສຶກສາ ແລະ ກີລາ ຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາ ແລະ 3 ຂໍ້ແຂ່ງຂັນ ຂອງຂະແໜງການ ຄື: ສອນດີ – ຮຽນເກັ່ງ, ຕ້ານປາກົດການຫຍໍ້ທໍ້ ແລະ ສ້າງສະພາບແວດລ້ອມທີ່ດີໃນສະຖານການສຶກສາໃຫ້ເປັນຮູບປະທຳ.

– ທາງດ້ານຄຸນສົມບັດ: ບໍ່ສວຍໃຊ້ໜ້າທີ່ຕໍາແໜ່ງໄປໃນທາງທີ່ບໍ່ຖືກຕ້ອງ, ການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ – 19 ນີ້ ຍັງໄດ້ເພີ່ມຄວາມທ້າທາຍໃໝ່ຕໍ່ຂະແໜງການສຶກສາ ແລະ ກີລາ ກວ່າເວລາໃດໝົດ. ພຽງແຕ່ລຳພັງຄູກໍບໍ່ສາມາດຮັບມືກັບການປ່ຽນແປງນີ້, ທົ່ວສັງຄົມຈະຕ້ອງໄດ້ໃຫ້ການຮ່ວມມື ແລະ ເຮັດວຽກຮ່ວມກັບຄູ ໂດຍສະເພາະແມ່ນໃນການປ້ອງກັນ ແລະ ຄວບຄຸມການລະບາດໂຄວິດ – 19 ໃຫ້ທັນການ, ການສ້າງ ຄວາມເຂັ້ມແຂງໃຫ້ແກ່ຄູໃນການສອນທາງໄກ – ອອນລາຍ, ສົ່ງເສີມການເປີດຮຽນຄືນໃຫ້ມີຄວາມປອດໄພ ແລະ ຮັບປະກັນວ່າ ນັກຮຽນທີ່ຮຽນອ່ອນ-ຮຽນບໍ່ທັນໝູ່ ຈະໄດ້ຮັບການບຳລຸງຄືນ.

ສຸດທ້າຍນີ້, ຂ້າພະເຈົ້າຂໍອວຍພອນໄຊອັນປະເສີດມາຍັງບັນດາເພື່ອນໆຄູ – ອາຈານສອນ, ຜູ້ບໍລິຫານການສຶກສາ, ຜູ້ປະກອບການ, ຕະຫຼອດຮອດປະຊາຊົນລາວບັນດາເຜົ່າ ຈົ່ງມີສຸຂະພາບເຂັ້ມແຂງ, ມີພະລະນາໄມສົມບູນ, ມີຄວາມສຸກຄວາມຈະເລີນ ແລະ ປະສົບຜົນສໍາເລັດໃນການປະຕິບັດໜ້າທີ່ວຽກງານຂອງຕົນ.