ລັດເຫັນດີເປີດຖ້ຽວບິນເໝົາລໍາ – ຮັບນັກທ່ອງທ່ຽວເປັນກຸ່ມຈາກປະເທດທີ່ບໍ່ມີການແຜ່ລະບາດຂອງພະຍາດໂຄວິດ – 19

489

ລັດຖະບານສືບຕໍ່ອອກມາດຕະການຜ່ອນຜັນໃນການປ້ອງກັນ, ຄວບຄຸມ ພະຍາດໂຄວິດ – 19 ໃນ 1 ເດືອນຕໍ່ໜ້າ ເຫັນດີດ້ານຫຼັກການໃຫ້ເປີດການທ່ອງທ່ຽວເປັນກຸ່ມ, ເຫັນດີດ້ານຫຼັກການໃຫ້ເປີດຖ້ຽວບິນເໝົາລໍາ ສໍາລັບປະເທດທີ່ບໍ່ມີການລະບາດຂອງພະຍາດໂຄວິດ – 19 ຢູ່ພາຍໃນ ເພື່ອໃຫ້ມີການເຄື່ອນໄຫວທາງດ້ານທຸລະກິດ ພ້ອມໃຫ້ສືບຕໍ່ປີດຮ້ານຄາຣາໂອເກະ ແລະ ຮ້ານບັນເທີງ.

ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳຄະນະສະເພາະກິດຄວບຄຸມໂຄວິດ – 19 ຖະແຫຼງຂ່າວຕໍ່ສື່ມວນຊົນ ໃນວັນທີ 1 ຕຸລາ 2020 ວ່າ: ຫ້ອງວ່າການສໍານັກງານນາຍົກລັດຖະມົນຕີ ໄດ້ອອກແຈ້ງການເລກທີ 1049/ຫສນຍ ວັນທີ 30 ກັນຍາ 2020 ເລື່ອງການສືບຕໍ່ປະຕິບັດບັນດາມາດຕະການຜ່ອນຜັນ, ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ – 19 ໃນໄລຍະວັນທີ 1 ຫາ 31 ຕຸລາ 2020 ຕາມການຊີ້ນໍາຂອງທ່ານນາຍົກລັດຖະມົນຕີ ດັ່ງນີ້:

1 ເຫັນດີໃຫ້ສືບຕໍ່ປະຕິບັດບັນດາມາດຕະການຜ່ອນຜັນ, ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ – 19 ຄືກັນກັບມາດຕະການທີ່ໄດ້ປະຕິບັດໃນເດືອນກັນຍາ 2020 ຜ່ານມາ ຕາມທີ່ໄດ້ລະບຸໃນແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 806/ຫສນຍ ລົງວັນທີ 29 ກໍລະກົດ 2020 ແລະ ສະບັບເລກທີ 838/ຫສນຍ ລົງວັນທີ 07 ສິງຫາ 2020 ຢ່າງເຂັ້ມງວດ. ໃນນັ້ນ, ສະເພາະມາດຕະການທີ່ສືບຕໍ່ປິດມີດັ່ງນີ້:

1 ສືບຕໍ່ປິດດ່ານປະເພນີ ແລະ ດ້ານທ້ອງຖິ່ນ ສໍາລັບການເຂົ້າ – ອອກຂອງບຸກຄົນທົ່ວໄປ ແລະ ການຂົນສົ່ງສິນຄ້າ, ຍົກເວັ້ນບາງດ່ານປະເພນີ ຫຼື ດ່ານທ້ອງຖິ່ນທີ່ໄດ້ຮັບອະນຸຍາດຈາກລັດຖະບານໃຫ້ລົດຂົນສົ່ງສິນຄ້າເຂົ້າ – ອອກໄດ້. ສ່ວນດ່ານສາກົນສືບຕໍ່ປິດສໍາລັບການເຂົ້າ – ອອກຂອງບຸກຄົນທົ່ວໄປ, ຍົກເວັ້ນພົນລະເມືອງລາວ ແລະ ຊາວຕ່າງປະເທດທີ່ມີຄວາມຈໍາເປັນຮີບດ່ວນໃນການເດີນທາງເຂົ້າ – ອອກ ສປປ ລາວ ທີ່ໄດ້ຮັບອະນຸຍາດຈາກຄະນະສະເພາະກິດ, ສໍາລັບການຂົນສົ່ງສິນຄ້າຜ່ານດ່ານສາກົນ ແມ່ນສາມາດເຂົ້າ – ອອກໄດ້ຕາມປົກກະຕິ.

2 ສືບຕໍ່ໂຈະການອອກວີຊ່າທ່ອງທ່ຽວ ແລະ ຢ້ຽມຢາມ ສໍາລັບບຸກຄົນທີ່ເດີນທາງມາຈາກ ຫຼື ຜ່ານປະເທດທີ່ຍັງມີການລະບາດຂອງພະຍາດໂຄວິດ – 19. ສໍາລັບນັກການທູດ, ພະນັກງານອົງການຈັດຕັ້ງສາກົນ, ຊ່ຽວຊານ, ນັກລົງທຶນ, ນັກທຸລະກິດ, ວິຊາການ ແລະ ແຮງງານຕ່າງປະເທດທີ່ມີ ຄວາມຈໍາເປັນ ແລະ ຮີບດ່ວນ ສາມາດເຂົ້າມາປະຕິບັດວຽກງານຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆໄດ້, ແຕ່ຕ້ອງຜ່ານການພິຈາລະນາເຫັນດີຈາກຄະນະສະເພາະກິດ. ສ່ວນຂັ້ນຕອນໃນການປະຕິບັດຕົວຈິງແມ່ນໃຫ້ສືບຕໍ່ປະຕິບັດຕາມຄໍາແນະນໍາຂອງຄະນະສະເພາະກິດ ສະບັບເລກທີ 2336/ສພກ ລົງວັນທີ 31 ກໍລະກົດ 2020 ສຳລັບຜູ້ທີ່ຈະເດີນທາງເຂົ້າ – ອອກ ສປປ ລາວ ໃນໄລຍະດໍາເນີນມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ – 19 ຢ່າງເຂັ້ມງວດ.
3 ໃຫ້ສືບຕໍ່ປິດຮ້ານຄາຣາໂອເກະ ແລະ ຮ້ານບັນເທີງ.

2 ເຫັນດີອະນຸມັດໃຫ້ຈັດງານບຸນອອກພັນສາປະວໍລະນາ ປະຈໍາປີ 2020, ໃຫ້ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ຮີບຮ້ອນສົມທົບກັບພາກສ່ວນກ່ຽວຂ້ອງ ແລະ ທ້ອງຖິ່ນ ກະກຽມອອກຄໍາແນະນໍາລະອຽດກ່ຽວກັບການຈັດບຸນປະເພນີ ແລະ ງານດອງ.

3 ເຫັນດີດ້ານຫຼັກການໃຫ້ເປີດການທ່ອງທ່ຽວເປັນກຸ່ມ ສໍາລັບນັກທ່ອງທ່ຽວທີ່ມາຈາກປະເທດທີ່ບໍ່ມີການລະບາດຂອງພະຍາດໂຄວິດ-19 ໃນຊຸມຊົນ ເພື່ອຊ່ວຍແກ້ໄຂຜົນກະທົບທາງດ້ານເສດຖະກິດ, ມອບໃຫ້ຄະນະສະເພາະກິດສົມທົບກັບພາກສ່ວນກ່ຽວຂ້ອງ ຄົ້ນຄວ້າມາດຕະການໃນການຈັດຕັ້ງປະຕິບັດໃຫ້ລະອຽດ.

4 ເຫັນດີດ້ານຫຼັກການອະນຸຍາດໃຫ້ເກັບຄ່າໃຊ້ຈ່າຍພື້ນຖານທີ່ຈໍາເປັນໃນການກວດຫາເຊື້ອໂຄວິດ – 19, ໃຫ້ຄະນະສະເພາະກິດສົມທົບກັບພາກສ່ວນກ່ຽວຂ້ອງກໍານົດອັດຕາຄ່າບໍລິການກວດຫາເຊື້ອດັ່ງກ່າວຢ່າງເໝາະສົມ.

5 ເຫັນດີໃຫ້ສືບຕໍ່ປຶກສາຫາລືກັບ ສສ ຫວຽດນາມ ແລະ ສປ ຈີນ ກ່ຽວກັບມາດຕະການໃນການປະຕິບັດຊ່ອງທາງສີຂຽວ ( Fast Track ).

6 ເຫັນດີດ້ານຫຼັກການໃຫ້ເປີດຖ້ຽວບິນເໝົາລໍາ ສໍາລັບປະເທດທີ່ບໍ່ມີການລະບາດຂອງພະຍາດໂຄວິດ – 19 ຢູ່ພາຍໃນ ເພື່ອໃຫ້ມີການເຄື່ອນໄຫວທາງດ້ານທຸລະກິດ ແລະ ການກະກຽມໃຫ້ແກ່ການຈັດຕັ້ງປະຕິບັດນະໂຍບາຍຜ່ອນຜັນກັບປະເທດຍີ່ປຸ່ນ, ໃຫ້ຄະນະສະເພາະກິດກໍານົດມາດຕະການປ້ອງກັນ ແລະ ຈັດຕັ້ງປະຕິບັດໃຫ້ຮັດກຸມ, ເດັດຂາດບໍ່ໃຫ້ມີຄວາມສ່ຽງໃນການນໍາເຊື້ອພະຍາດດັ່ງກ່າວເຂົ້າມາແຜ່ລະບາດຢູ່ພາຍໃນປະເທດ.

7. ເຫັນດີດ້ານຫຼັກການຕໍ່ການສະເໜີປະຕິບັດມາດຕະການຜ່ອນຜັນການຈຳກັດບໍລິເວນ ສໍາລັບຜູ້ທີ່ເດີນທາງມາຈາກປະເທດທີ່ບໍ່ມີການລະບາດຂອງພະຍາດໂຄວິດ – 19 ໃນຊຸມຊົນ ໂດຍເວລາເຂົ້າມາໃຫ້ກວດຫາເຊື້ອ, ລໍຖ້າຜົນກວດ 48 ຊົ່ວໂມງ ຖ້າກວດບໍ່ພົບເຊື້ອສາມາດໄປຈໍາກັດບໍລິເວນຕໍ່ຢູ່ໃນທີ່ພັກຂອງສະຖານທີ່ເຮັດວຽກຂອງເຂົາເຈົ້າ ຫຼື ຈໍາກັດບໍລິເວນຢູ່ເຮືອນຂອງຕົນສໍາລັບພົນລະເມືອງລາວ ຕາມການສະເໜີຂອງຄະນະສະເພາະກິດ. ສໍາລັບເປົ້າໝາຍຜ່ອນຜັນ ແລະ ມາດຕະການຈັດຕັ້ງປະຕິບັດ ໃຫ້ຄະນະສະເພາະກິດສົມທົບກັບພາກສ່ວນກ່ຽວຂ້ອງຄົ້ນຄວ້າ ແລະ ອອກຄໍາແນະນໍາລະອຽດ. ດັ່ງນັ້ນ, ຈຶ່ງແຈ້ງມາເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້ດ້ວຍ.