ທໍາລາຍແກ່ນຕາເວັນ, ແຈ່ວເສສວນ ປອມແປງ – ລະເມີດເຄື່ອງໝາຍການຄ້າ

627

ເຈົ້າໜ້າທີ່ການຄ້າໄດ້ທຳລາຍສິນຄ້າເຄື່ອງບໍລິໂພກປະເພດແກ່ນຕາເວັນ ແລະ ເຄື່ອງປຸງແຕ່ງອາຫານມີເຄື່ອງໝາຍການຄ້າເສສວນ ທີ່ປອມແປງ – ຮຽນແບບ ແລະ ລະເມີດເຄື່ອງໝາຍການຄ້າ ມູນຄ່າຫຼາຍ ກວ່າ 200 ລ້ານກີບ.

ພິທີທຳລາຍສິນຄ້າດັ່ງກ່າວ ມີຂຶ້ນໃນວັນທີ 9 ກັນຍາ 2020 ທີ່ສະໜາມຂີ້ເຫຍື້ອ ຫຼັກ 32, ບ້ານນາຜາສຸກ ເມືອງໄຊທານີ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ມີ ທ່ານ ວິລະໄຊ ເລັ່ງສະຫວັດ ຫົວໜ້າກົມການຄ້າພາຍໃນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ສົມຊາຍ ນົງລາດ ຫົວໜ້າພະແນກກວດກາການຄ້າ, ກົມການຄ້າພາຍໃນ ໄດ້ຜ່ານຂໍ້ຕົກລົງ ວ່າດ້ວຍການທໍາລາຍສິນຄ້າທີ່ປອມແປງ – ຮຽນແບບ ແລະ ລະເມີດເຄື່ອງໝາຍການຄ້າ ວ່າ: ໂດຍປະຕິບັດຕາມພາລະບົດບາດ ແລະ ທິດຊີ້ນຳຂອງຄະນະນໍາກະຊວງອຸດສາຫະກຳ ແລະ ການຄ້າ, ກົມການຄ້າພາຍໃນ ໄດ້ຈັດພິທີທຳລາຍສິນຄ້າປະເພດແກ່ນຕາເວັນອົບແຫ້ງ ຍີ່ຫຍໍ້ GNQ ແລະ ເຄື່ອງປຸງອາຫານປະເພດ    ແຈ່ວເສສວນ ທີ່ບໍ່ໄດ້ຄຸນນະພາບ ແລະ ທໍາການຜະລິດບໍ່ຖືກຕ້ອງຕາມລະບຽບກົດໝາຍ ພ້ອມທັງຊອງເປົ່າ ລວມມູນຄ່າ 208.405.000 ກີບ.

ในภาพอาจจะมี 7 คน, ผู้คนกำลังยืน และสถานที่กลางแจ้ง

ສິນຄ້າດັ່ງກ່າວເຈົ້າໜ້າທີ່ກວດກາການຄ້າໄດ້ລົງຕິດຕາມ, ກວດກາເປົ້າໝາຍພົບທີ່ໂຮງງານອັດຮ່າຍ ແລະ ປຸງແຕ່ງອາຫານຢູ່ບ້ານແກ້ງໄຄ້ ເມືອງໄຊທານີ ແລະ ຮ້ານຈຳໜ່າຍສິນຄ້າຂອງໂຮງງານດັ່ງກ່າວຢູ່ບ້ານຫ້ວຍຫົງ ເມືອງຈັນທະບູລີ ໃນວັນທີ 16 ມິຖຸນາ 2020 ຜ່ານມາ ເຊິ່ງໂຮງງານດັ່ງກ່າວໄດ້ນໍາໃຊ້ໃບທະບຽນວິສາຫະກິດບໍລິສັດຜະລິດຕະພັນອາຫານຢົງລີ ວຽງຈັນ ຈໍາກັດຜູ້ດຽວ ມີການຜະລິດແກ່ນຕາເວັນອົບແຫ້ງ ແລະ ແຈ່ວເສສວນ ໂດຍບໍ່ໄດ້ຮັບອະນຸຍາດການດຳເນີນທຸລະກິດການຜະລິດຈາກຂະແໜງອຸດສາຫະກໍາ, ບໍ່ມີໃບຢັ້ງຢືນ ອຢ ຈາກຂະແໜງສາທາລະນະສຸກ ຈຶ່ງບໍ່ຮັບປະກັນທາງດ້ານຄຸນນະພາບ. ນອກນັ້ນ, ໃນຊອງບັນຈຸແກ່ນຕາເວັນຍັງລະບຸແອບອ້າງຊື່ຂອງບໍລິສັດນຳເຂົ້າອື່ນ ໂດຍບໍ່ໄດ້ຮັບອະນຸຍາດ ແລະ ຊອງບັນຈຸແຈ່ວເສສວນ ກໍໃສ່ຮູບຄືກັບແຈ່ວທີ່ນໍາເຂົ້າ ຈຶ່ງເຮັດໃຫ້ຜູ້ຊົມໃຊ້ເຂົ້າໃຈຜິດແຫຼ່ງທີ່ມາຖືວ່າເປັນການຫຼອກລວງຜູ້ຊົມໃຊ້.

ในภาพอาจจะมี ท้องฟ้า และสถานที่กลางแจ้ง

ສະນັ້ນ, ຄະນະລົງກວດກາ ຈຶ່ງໄດ້ຢຶດສິນຄ້າ ແລະ ຂອງກາງທັງໝົດ ປະກອບມີ:

ແກ່ນຕາເວັນອົບແຫ້ງຍີ່ຫໍ້ ( GNQ ) ທີ່ໄດ້ບັນຈຸໃນແກັດ ຈໍານວນ 219 ແກັດ.

ເຄື່ອງປຸງອາຫານປະເພດແຈ່ວເສສວນ 201 ແກັດ.

ແກ່ນຕາເວັນຍັງບໍ່ທັນບັນຈຸ 105 ກິໂລ.

ຖົງເປົ່າບັນຈຸແກ່ນຕາເວັນ ແລະ ແຈ່ວເສສວນ 22 ເປົາ.

ລວມມູນຄ່າທັງໝົດ ປະມານ 208.405.000 ກີບ ໄດ້ທຳລາຍຖິ້ມຕາມລະບຽບການ; ສ່ວນໂຮງງານດັ່ງກ່າວທາງເຈົ້າໜ້າທີ່ກ່ຽວຂ້ອງໄດ້ໃສ່ມາດຕະການຕາມລະບຽບກົດໝາຍ.