ຈະສຸມໃສ່ການສົ່ງເສີມນັກຄົ້ນຄວ້າພັດທະນາວິທະຍາສາດ ແລະ ເຕັກໂນໂລຊີ ຂອງ ສປປ ລາວ

395

ລັດຖະບານ ໄດ້ເອົາໃຈໃສ່ຢ່າງຈົດຈໍ່ເພື່ອຊຸກຍູ້ສົ່ງເສີມການຄົ້ນຄວ້າພັດທະນາ ແລະ ນຳໃຊ້ວິທະຍາສາດ ແລະ ເຕັກໂນໂລຊີຢູ່ປະເທດເຮົາ ເຊິ່ງໃນປີ 2013 ສະພາແຫ່ງຊາດໄດ້ຮັບຮອງ ແລະ ປະກາດໃຊ້ກົດໝາຍ ວ່າດ້ວຍວິທະຍາສາດ ແລະ ເຕັກໂນໂລຊີ ຂອງ ສປປ ລາວ ເປັນຄັ້ງທຳອິດ ເພື່ອເປັນການຄຸ້ມຄອງ, ຊຸກຍູ້ສົ່ງເສີມການຄົ້ນຄວ້າພັດທະນາ, ນຳໃຊ້ວິທະຍາສາດ ແລະ ເຕັກໂນໂລຊີ ເຂົ້າໃນການພັດທະນາເສດຖະກິດ-ສັງຄົມ ເພື່ອຜັນຂະຫຍາຍ ແລະ ຈັດຕັ້ງປະຕິບັດກົດໝາຍດັ່ງກ່າວ ເປັນຕົ້ນແມ່ນມາດຕາ 32 ໝວດ 2 ວ່າດ້ວຍສະພາວິທະຍາສາດຂະແໜງການໃຫ້ປະກົດຜົນເປັນຈິງ.

ຫຼ້າສຸດ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ເປີດກອງປະຊຸມທາບທາມຄຳເຫັນໃສ່ຮ່າງດຳລັດ ວ່າດ້ວຍການຄຸ້ມຄອງ, ສົ່ງເສີມນັກຄົ້ນຄວ້າພັດທະນາວິທະຍາສາດ ແລະ ເຕັກໂນໂລຊີ  ພ້ອມທັງເຜີຍແຜ່ບົດແນະນຳສ້າງຕັ້ງ ແລະ ການເຄື່ອນໄຫວຂອງສະພາວິທະຍາສາດ ພາຍໃຕ້ການເປັນປະທານຂອງ ທ່ານ ບໍ່ວຽງຄຳ ວົງດາລາ ລັດຖະມົນຕີ ກວຕ ທັງເປັນປະທານສະພາວິທະຍາສາດແຫ່ງຊາດ, ມີບັນດາທ່ານຮອງລັດຖະມົນຕີ, ຫ້ອງການ, ກົມ, ສະຖາບັນ, ມະຫາວິທະຍາໄລ, ສະຖາບັນການຄົ້ນຄວ້າ ແລະ ແຂກຖືກເຊີນຈາກກະຊວງທີ່ກ່ຽວຂ້ອງເຂົ້າຮ່ວມ ຈໍານວນ 90 ກວ່າທ່ານ.

ຈຸດປະສົງຂອງກອງປະຊຸມຄັ້ງນີ້ ແມ່ນປຶກສາຫາລືແລກປ່ຽນຄຳຄິດເຫັນໃສ່ຮ່າງດຳລັດ ວ່າດ້ວຍການຄຸ້ມຄອງ, ສົ່ງເສີມນັກຄົ້ນຄວ້າພັດທະນາວິທະຍາສາດ ແລະ ເຕັກໂນໂລຊີ ແລະ ເຜີຍແຜ່ບົດແນະນຳສ້າງຕັ້ງ ແລະ ການເຄື່ອນໄຫວຂອງສະພາວິທະຍາສາດ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນ ແລະ ຄວາມເປັນເອກະພາບໃນຂອບເຂດທົ່ວປະເທດ.

ພ້ອມນັ້ນ, ຍັງແນໃສສ້າງເງື່ອນໄຂຊຸກຍູ້ສົ່ງເສີມນັກຄົ້ນຄວ້າ, ນັກວິທະຍາສາດທັງພາກລັດ ແລະ ເອກະຊົນໃຫ້ໄດ້ຜົນສຳເລັດໃນດ້ານການຄົ້ນຄວ້າວິທະຍາສາດປະກອບເຂົ້າໃນການພັດທະນາເສດຖະກິດ-ສັງຄົມຂອງຊາດ.

ໃນກອງປະຊຸມດັ່ງກ່າວ ທ່ານ ນາງ ແກ້ວໄພວັນ ດວງສະຫວັນ ຫົວໜ້າຫ້ອງການສະພາວິທະຍາສາດແຫ່ງຊາດ ໄດ້ນຳສະເໜີເອກະສານທີ່ກ່ຽວຂ້ອງ ແລະ ຂັ້ນຕອນໃນການສ້າງຕັ້ງສະພາວິທະຍາສາດຂະແໜງການ.

ພ້ອມນັ້ນ, ທ່ານ ແກ້ວອຸທອນ ລຸນແສງຈັນ ຮອງຫົວໜ້າຫ້ອງການສະພາວິທະຍາສາດແຫ່ງຊາດ ກໍໄດ້ສະເໜີລາຍງານສະພາບເຫດຜົນຄວາມຈຳເປັນ ແລະ ການສ້າງຮ່າງດຳລັດ, ສະເໜີບົດແນະນຳກ່ຽວການສ້າງຕັ້ງ ແລະ ການເຄື່ອງໄຫວຂອງສະພາວິທະຍາສາດ ທັງນີ້ກໍ່ເພື່ອເປັນການປັບປຸງຮ່າງດຳລັດດັ່ງກ່າວໃຫ້ສອດຄ່ອງ, ຄົບຖ້ວນ ແລະ ສົມບຸນຍິ່ງຂຶ້ນ.