ຄະນະວິຊາການກະຊວງການເງິນ ຊຸກຍູ້ການເກັບລາຍຮັບຢູ່ເມືອງຂວາ ແຂວງຜົ້ງສາລີ.

613

ຄະນະນໍາ-ຄະນະວິຊາການກະຊວງການເງິນ ນຳໂດຍທ່ານ ປອ. ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ໄດ້ລົງເຄື່ອນໄຫວຊຸກຍູ້ຕິດຕາມກວດກາການຈັດຕັ້ງປະບັດວຽກງານງົບປະ ມານ 06 ເດືອນຕົ້ນປີ ແລະ ແຜນດັດແກ້ 06 ເດືອນທ້າຍປີ 2020 ຢູ່ຫ້ອງການ-ການເງິນເມືອງຂວາ ແຂວງຜົ້ງສາລີ. ໂດຍການຕ້ອນຮັບຂອງທ່ານ ພອນທະວີ ໄຊມົນຕີ ເຈົ້າເມືອງໆຂວາ, ທ່ານ ນາງ ດາວອນ ພິລາວັນ ຫົວໜ້າຫ້ອງການ-ການເງິນເມືອງຂວາ ແລະ ພາກສ່ວນທີກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ນາງ ດາວອນ ພິລາວັນ ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດງົບປະມານ 7 ເດືອນ ແລະ ທິດທາງແຜນການໃນ 5 ເດືອນທ້າຍປີ 2020 ເຊິ່ງໄດ້ຍົກໃຫ້ເຫັນການຈັດ ຕັ້ງປະຕິບັດວຽກງານການຈັດເກັບລາຍຮັບເຂົ້າງົບປະມານໃນປີ 2020 ພົບຄວາມຫຍຸ້ງຍາກພໍສົມຄວນຍ້ອນການລະບາດພະຍາດໂຄວິດ-19 ເຊິ່ງມີຜົນກະທົບໂດຍກົງດ້ານເສດຖະກິດການເງິນຂອງແຂວງ- ເມືອງ ເຮັດໃຫ້ການເກັບລາຍຮັບເຂົ້າງົບປະມານບໍໄດ້ຕາມແຜນການເປັນຕົ້ນ: ການຈັດຕັ້ງປະຕິບັດລາຍຮັບເຂົ້າງົບປະມານ 7 ເດືອນປີ 2020 ຫ້ອງການ-ການເງິນເມືອງຂວາ ສາມາດປະຕິບັດໄດ້ 2,3 ຕື້ກວ່າກີບ ເທົ່າກັບ 58,19% ຂອງແຜນການປີ ແລະ ຄາດຄະເນໝົດປີ 2020 ຈຳນວນ 3,9 ຕື້ກີບ ເຊິ່ງການປະຕິບັດລາຍຮັບອາດບໍ່ບັນລຸຕາມແຜນການປີ.

ໂອກາດທີ່ລົງເຄືອນໄຫວວຽກງານໃນຄັ້ງນີ້ມີຂຶ້ນໃນວັນທີ 27 ສິງຫາ 2020 ຜ່ານມານີ້ ໂດຍທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນພ້ອມດ້ວຍຄະນະໄດ້ມອບຄອມພີວເຕີ ຈຳນວນ 3 ຊຸດ (ໃນນາມສ່ວນຕົວ) ໃຫ້ຫ້ອງການ-ການເງິນເມືອງຂວາ ເພື່ອນຳໃຊ້ເຂົ້າໃນວຽກງານແຕ່ລະໜ່ວຍງານຂອງການເງິນເມືອງທີ່ຍັງທີ່ຂາດເຂີນ.