ສວນວິທະຍາສາດ ແລະ ພຶກສາສາດ ຈະໃຫ້ສໍາເລັດໄລຍະທໍາອິດ ພ້ອມເປີດບໍລິການຕົ້ນປີ 2021.

692

ສວນວິທະຍາສາດ ແລະ ພຶກສາສາດ ເປັນໂຄງການລົງທຶນຂອງບໍລິສັດ ແອັດແລນຕິກ ອິນເຕີເນເຊີນແນວ ກຣຸບ ຈໍາກັດຜູ້ດຽວ ເພື່ອເນລະມິດໃຫ້ເຂດດັ່ງກ່າວກາຍເປັນສູນກາງຮຽນຮູ້ດ້ານວິທະຍາສາດ, ດາລາສາດທີ່ຕິດພັນກັບການທ່ອງທ່ຽວແບບອະນຸລັກ ໃນເນື້ອທີ່ທັງໝົດ 30 ເຮັກຕາ, ມີສະຖານທີ່ຕັ້ງຢູ່ບ້ານຫວ້ຍໂຄ້ງ ເມືອງແກ້ວອຸດົມ ແຂວງວຽງຈັນ. ດ້ານປະທານບໍລິສັດເປີດເຜີຍ ຄາດວ່າຈະໃຫ້ສໍາເລັດການກໍ່ສ້າງໄລຍະທໍາອິດ ແລະ ເປີດບໍລິການໃນຕົ້ນປີ 2021.

ທ່ານ ພູວົງ ສູ້ຍຍະວົງ ປະທານບໍລິສັດ ແອັດແລນຕິກ ອິນເຕີເນເຊີນແນວ ກຣຸບ ຈໍາກັດຜູ້ດຽວ ໃຫ້ສໍາພາດວ່າ: ໂຄງການດັ່ງກ່າວໄດ້ມີການເຊັນບົດບັນທຶກຄວາມເຂົ້າໃຈຮ່ວມກັບກະຊວງວິທະຍາສາດ ແລະ ເຕັກໂນໂລຊີ ເມື່ອເດືອນຕຸລາ 2019 ເປັນຕົ້ນມາ.

ຈາກນັ້ນ, ກໍ່ໄດ້ລົງມືຈັດຕັ້ງປະຕິບັດຈົນຮອດປັດຈຸບັນດ້ວຍມູນຄ່າການລົງທຶນໄລຍະທໍາອິດ 5 ລ້ານໂດລາ ໃນເນື້ອທີ່ທັງໝົດ 30 ເຮັກຕາ; ດຽວນີ້ໄດ້ສໍາເລັດການກໍ່ສ້າງພື້ນຖານໂຄງລ່າງ; ປະຕູທາງເຂົ້າ; ທ້ອງຟ້າຈໍາລອງທີ່ເປັນບ່ອນຮຽນຮູ້ດ້ານດາລາສາດ ແລະ ລານຫໍຊົມດາວ.

ຄາດວ່າຈະໃຫ້ສໍາເລັດການກໍ່ສ້າງ, ຕິດຕັ້ງລະບົບຄົບຊຸດພ້ອມເປີດບໍລິການລູກຄ້າໃນປີ 2021. ສ່ວນວັດສະດຸ-ອຸປະ ກອນແມ່ນນໍາເຂົ້າຈາກປະເທດລັດເຊຍ ໂດຍສະເພາະແມ່ນໄດ້ສັ່ງຊື້ກ້ອງສ່ອງຈໍານວນ 4 ເຄື່ອງ ແລະ ກະຊວງວິທະຍາ ສາດ ແລະ ເຕັກໂນໂລຊີ ກໍ່ຊ່ວຍເຫຼືອອີກ 1 ເຄື່ອງ.  ສໍາລັບໄລຍະທີສອງ: ຈະເປັນການກໍ່ສ້າງຫໍປະຊຸມລະດັບກາງພ້ອມດ້ວຍທີ່ພັກສໍາລັບການພັກຜ່ອນ ຫາກທຽບໃສ່ໂຮງແຮມຢູ່ປະເພດ 4 ດາວ; ເຊິ່ງການອອກແບບແມ່ນປະສົມປະສານຄວາມທັນສະໄໝລະ ຫວ່າງລາວ-ຮັດເຊຍ-ໄທ ເພື່ອເຮັດໃຫ້ໂຄງການດັ່ງກ່າວມີເອກະລັກສະເພາະ.

ແຕ່ໃນສ່ວນຂອງລະບົບທັນສະໄໝ, ເຕັກນິກ-ວິຊາການໂດຍພື້ນຖານແມ່ນລັດເຊຍທັງໝົດ ເນື່ອງຈາກບໍລິສັດເຮົາຮັດທຸລະກິດກັບລັດ ເຊຍມາຕັ້ງແຕ່ປີ 2003 ແລະ ມີບໍລິສັດໃນເຄືອຈໍານວນໜຶ່ງ.

ທ່ານພູວົງ ຍັງອະທິບາຍຕື່ມວ່າ: ໂຄງການປະກອບມີ 5 ກິດຈະການປິ່ນອ້ອມຄື: 1). ສ້າງສູນສຶກສາດ້ານດາລາສາດ (ລານຫໍຊົມດາວ ແລະ ທ້ອງຟ້າຈໍາລອງ); 2). ສ້າງສວນ ແລະ ສູນສຶກສາດ້ານພຶກສາສາດ (ສວນຕົ້ນໄມ້ ແລະ ພືດເປັນຢາ); 3). ສ້າງສູນສຶກສາການຖ່າຍທອດດ້ານວິທະຍາສາດເຕັກໂນໂລຊີ ແລະ ນະວັດຕະກໍາ; 4). ສ້າງແຫຼ່ງທ່ອງ ທ່ຽວແບບທໍາມະຊາດ ແລະ ວັດທະນາທໍາ; 5). ກິດຈະກໍາອື່ນໆທີ່ເປັນປະໂຫຍດກັບການສຶກສາ-ຮຽນຮູ້ດ້ານວິທະຍາ ສາດ ແລະ ການພັດທະນາເສດຖະກິດ-ສັງຄົມ.

ໂຄງການດັ່ງກ່າວ, ເປັນການລົງທຶນຂອງເອກະຊົນ 100%. ຂະນະດຽວກັນ, ກະຊວງວິທະຍາສາດ ແລະ ເຕັກໂນໂລຊີ ກໍ່ໃຫ້ການຜູ້ສະໜູບສະໜູນດ້ານເຕັກນິກວິຊາການ, ພົວພັນຮ່ວມມືກັບສາກົນ ແລະ ອື່ນໆ.

ຄາດວ່າຈະໄດ້ທຶນຄືນອີກ ປະມານ 10 ປີ ເນື່ອງຈາກເປັນໂຄງການໄລຍະຍາວທີ່ເນັ້ນໃຫ້ກາຍເປັນສູນກາງຮຽນຮູ້ຂອງນ້ອງນັກຮຽນ, ນັກສຶກສາ ແລະ ຜູ້ທີ່ສົນໃຈ; ທັງເປັນສູນຮຽນຮູ້ທີ່ຕິດພັນກັບການທ່ອງທ່ຽວ ແລະ ເປັນການປະ ກອບສ່ວນສ້າງວຽກເຮັດງານທໍາໃຫ້ກັບປະຊາຊົນທ້ອງຖິ່ນນໍາອີກ.