ມີຜູ້ຖືກຈໍາກັດບໍລິເວນຢູ່ສູນເກືອບ 3 ພັນຄົນ

644

ການເຝົ້າລະວັງການລະບາດຂອງເຊື້ອໂຄວິດ – 19 ຢູ່ລາວ ປັດຈຸບັນມີຜູ້ຖືກກັກບໍລິເວນ 2.905 ຄົນ ໃນຈໍານວນ 48 ສູນ, ສ່ວນສະພາບການລະບາດທົ່ວໂລກປັດຈຸບັນມີຜູ້ຕິດເຊື້ອທັງໝົດ 24,3 ລ້ານກວ່າຄົນ, ມີຜູ້ເສຍຊີວິດແລ້ວ 829.778 ຄົນ.

ທ່ານ ນາງ ດຣ. ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງຂ່່າວໃນວັນທີ 27 ສິງຫາ 2020 ວ່າ: ໃນວັນທີ 26 ສິງຫາ 2020 ມີຜູ້ເດີນທາງເຂົ້າມາ ສປປ ລາວ ທັງໝົດ 2.117 ຄົນ, ໃນນັ້ນຈຸດຜ່ານດ່ານ ລາວ – ໄທ 1.215 ຄົນ ( ແຮງງານລາວກັບມາແຕ່ໄທ 110 ຄົນ ); ຈຸດຜ່ານດ່ານລາວ – ຈີນ 26 ຄົນ, ໃນນີ້ມີແຮງງານຈີນ 2 ຄົນ ແລະ ແຮງງານລາວ 1 ຄົນ, ເຫຼືອນັ້ນແມ່ນຄົນຂັບລົດສົ່ງສິນຄ້າ 23 ຄົນ; ຈຸດຜ່ານດ່ານ ລາວ – ຫວຽດນາມ 876 ຄົນ, ໃນນີ້ນັກສຶກສາລາວ 47 ຄົນ ຜ່ານດ່ານນໍ້າກັ່ນ ແຂວງຊຽງ ຂວາງ, ນັກສຶກສາລາວ 2 ຄົນ ຜ່ານດ່ານນໍ້າພາວ ແຂວງບໍລິຄໍາໄຊ ແລະ ແຮງງານຫວຽດນາມ 35 ຄົນ ຜ່ານດ່ານນໍ້າໂສ້ຍ ແຂວງຫົວພັນ, ເຫຼືອນັ້ນແມ່ນຄົນຂັບລົດສົ່ງສິນຄ້າ ແລະ ຜູ້ຕິດຕາມ; ທຸກຄົນແມ່ນໄດ້ແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ( ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ປັດຈຸບັນຍັງມີສູນຈຳກັດບໍລິເວນທັງໝົດ 48 ສູນ, ມີຜູ້ຖືກຈຳກັດບໍລິເວນຢູ່ສູນ 2.905 ຄົນ.

ທ່ານກ່າວອີກວ່າ: ໃນວັນທີ 26 ສິງຫາ 2020 ໄດ້ເກັບຕົວຢ່າງມາກວດວິເຄາະທັງໝົດ 291 ຄົນ, ໃນນັ້ນແຮງງານລາວມາແຕ່ໄທ 38 ຕົວຢ່າງ, ແຮງງານຈີນ 205 ຕົວຢ່າງ, ບຸກຄົນທົ່ວໄປບໍ່ມີອາການ 45 ຕົວຢ່າງ ແລະ ບຸກຄົນທົ່ວໄປທີ່ມີອາການ 3 ຕົວຢ່າງ ເຊິ່ງຜົນກວດວິເຄາະທັງໝົດແມ່ນບໍ່ພົບເຊື້ອ ໝາຍ ຄວາມວ່າໃນວັນທີ 26 ສິງຫາ 2020 ບໍ່ມີຜູ້ຕິດເຊື້ອໃໝ່. ສັງລວມການກວດວິເຄາະແຕ່ເດືອນມັງກອນ ຮອດວັນທີ 26 ສິງຫາ 2020 ໄດ້ເກັບຕົວຢ່າງມາກວດທັງໝົດ 37.741 ຕົວຢ່າງ, ກວດພົບເຊື້ອສະສົມ 22 ຄົນ. ສ່ວນຄົນເຈັບຕິດເຊື້ອພະຍາດໂຄວິດ – 19 ນ້ຳເບີ 22 ແມ່ນຍັງສືບຕໍ່ປິ່ນປົວຢູ່ໂຮງໝໍມິດຕະພາບອາການແມ່ນຢູ່ຂັ້ນເບົາບາງ.

ສ່ວນການລະບາດໃນທົ່ວໂລກມາຮອດຕອນເຊົ້າຂອງວັນທີ 27 ສິງຫາ 2020 ມີທັງໝົດ 213 ປະເທດ, ມີຜູ້ຕິດເຊື້ອທັງໝົດ 24.344,779 ຄົນ, ມີຜູ້ເສຍຊີວິດທັງໝົດ 829.778 ຄົນ ແລະ ມີຜູ້ ປິ່ນປົວດີແລ້ວທັງໝົດ 16.878.683 ຄົນ.