ກົມຊັບສິນທາງປັນຍາ-ກົມຈັດຕັ້ງ ຮັບເອົາສະມາຊິກພັກສໍາຮອງ ແລະ ສົມບູນ.

618

ໜ່ວຍພັກກົມຊັບສິນທາງປັນຍາ ຮ່ວມກັບ ໜ່ວຍພັກກົມຈັດຕັ້ງ ແລະ ພະນັກງານ ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ແລະ ເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ ໂດຍໃຫ້ກຽດເປັນປະທານຂອງ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ.   ໃນພິທີ, ສະຫາຍ ນາງ ຂັນລາສີ ແກ້ວບຸນພັນ ເລຂາໜ່ວຍພັກກົມຊັບສິນທາງປັນຍາ ໄດ້ຂຶ້ນຜ່ານມະຕິຕົກລົງວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງຂອງໜ່ວຍພັກກົມຊັບສິນທາງປັນຍາ ຈໍານວນ 3 ສະຫາຍ, ຍິງ 1 ສະຫາຍ.

ຄຽງຄູ່ກັນນັ້ນ, ໄດ້ຈັດພິທີເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນຂອງໜ່ວຍພັກກົມຈັດຕັ້ງ ແລະ ພະນັກງານ ຈຳນວນ 4 ສະຫາຍ, ຍິງ 1 ສະຫາຍ ເຊິ່ງຂຶ້ນຜ່ານມະຕິຕົກລົງໂດຍ ສະຫາຍ ບຸນປອນ ບົວແພງ ເລຂາໜ່ວຍພັກກົມຈັດຕັ້ງ ແລະ ພະນັກງານ.

ໃນຕອນທ້າຍ, ສະຫາຍ ເລຂາຄະນະພັກກະຊວງວິທະຍາສາດ ແລະ ເຕັກໂນໂລຊີ ໄດ້ໃຫ້ກຽດຮັບຟັງການໂອ້ລົມ ແລະ ຮຽກຮ້ອງມາຍັງສະມາຊິກພັກທຸກສະຫາຍທັງເກົ່າ ແລະ ໃໝ່ ຈົ່ງສືບຕໍ່ຮັກສາມູນເຊື້ອຄຸນສົມບັດສິນທຳປະຕິວັດ ແລະ ຕັ້ງໜ້າຝຶກຝົນຫຼໍ່ຫຼອມຕົນເອງຢ່າງຕໍ່ເນື່ອງ ໂດຍໃຫ້ຖືເອົາການຍົກສູງທາງດ້ານຄຸນທາດການເມືອງເປັນຫຼັກ, ຢຶດໝັ້ນໃນທາດແທ້ ແລະ ອຸດົມການຂອງພັກ, ຍົກສູງສະຕິຕໍ່ການຈັດຕັ້ງ, ຊື່ສັດ ແລະ ຈົງຮັກພັກດີຕໍ່ພັກ-ລັດ, ຕໍ່ປະເທດຊາດ, ເອົາໃຈໃສ່ເພີ່ມທະວີຄວາມສາມັກຄີຮັກແພງເຊິ່ງກັນ ແລະ ກັນໃຫ້ເປັນປຶກແຜ່ນ ເພື່ອສືບຕໍ່ຈັດຕັ້ງປະຕິບັດວຽກງານທີ່ພັກ-ລັດມອບໝາຍໃຫ້ປະສົບຜົນສຳເລັດ.