ທົ່ວປະເທດກຽມໄຂສົກຮຽນໃໝ່ 1 ກັນຍານີ້ພ້ອມເຂັ້ມງວດມາດຕະການປ້ອງກັນໂຄວິດ-19

403

ບັນດາໂຮງຮຽນ, ສະຖາບັນການສຶກສາ ທັງພາກລັດ ແລະ ເອກະຊົນໃນຂອບເຂດທົ່ວປະເທດແມ່ນຈະເລີ່ມໄຂສົກຮຽນໃໝ່ ( 2020 – 2021 ) ໃນວັນທີ 1 ກັນຍາ ທີ່ຈະມາເຖິງນີ້ ແລະ ພ້ອມກັນສືບຕໍ່ປະຕິບັດມາດຕະການປ້ອງກັນ ຄວບຄຸມ ແລະ ແກ້ໄຂການລະບາດໂຄວິດ – 19.

ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ( ສສກ ) ໄດ້ຖະແຫຼງຂ່າວຕໍ່ສື່ມວນຊົນ ໃນວັນທີ 26 ສິງຫາ 2020 ທີ່ກະຊວງ ສສກ ວ່າ: ປະຕິທິນການຈັດ ການ ຮຽນ – ການສອນ ສຳລັບສົກຮຽນ 2020 – 2021 ແມ່ນຈະໄດ້ດຳເນີນໄປເປັນປົກກະຕິຄ້າຍກັບທຸກປີ ຄືວັນທີ 1 ກັນຍາ 2020 ເປັນມື້ໄຂສົກຮຽນໃໝ່ໃນຂອບເຂດທົ່ວປະເທດ. ປີນີ້ພວກເຮົາໄດ້ຮັບຜົນກະທົບຈາກການລະບາດຂອງພະຍາດໂຄວິດ – 19 ເຮັດໃຫ້ຂະແໜງ ສສກ ກໍຄືກັບຂະແໜງການອື່ນແມ່ນໄດ້ຮັບຜົນກະທົບໃນຫຼາຍດ້ານ ເຊັ່ນ: ການຮຽນບໍ່ປົກກະຕິ, ມີຄວາມຫຍຸ້ງຍາກໃນການປະຕິບັດມາດຕະການຮັກສາໄລຍະຫ່າງ, ຜ້າອັດ ປາກ – ອັດດັງບໍ່ພຽງພໍ, ນັກຮຽນທີ່ສຶກສາຢູ່ຕ່າງປະເທດບໍ່ໄດ້ກັບໄປສືບຕໍ່ຮຽນ, ທຶນການສຶກສາຂອງຫຼາຍປະເທດຖືກໂຈະ, ມີຄວາມສ່ຽງສູງຂອງນັກສຶກສາຈົບໃໝ່ທີ່ຈະບໍ່ໄດ້ເຂົ້າສູ່ພາກແຮງງານ ແລະ ບັນຫາອື່ນໆ. ເຖິງຢ່າງໃດກໍຕາມ, ຄະນະນຳກະຊວງສຶກສາທິການ ແລະ ກີລາ ໄດ້ມີການປຶກສາຫາລືກັບກົມວິຊາການທີ່ກ່ຽວຂ້ອງ ແລະ ປະເມີນສະພາບການເປັນປົກກະຕິ ເພື່ອສືບຕໍ່ເຮັດໃຫ້ການຈັດການຮຽນ – ການສອນສືບຕໍ່ດຳເນີນໄປ ທັງຮັບປະກັນຄຸນນະພາບການສຶກສາໃນສະພາບແວດລ້ອມໃໝ່.

ທ່ານ ນາງ ແສງເດືອນ ຫຼ້າຈັນທະບູນ ແຈ້ງໃຫ້ຮູ້ຕື່ມວ່າ: ສຳລັບຜູ້ບໍລິຫານການສຶກສາ ແລະ ຄູ – ອາຈານ ຈະຕ້ອງໄດ້ທົບທວນຄືນ ກ່ຽວກັບຮູບແບບການຈັດການຮຽນ – ການສອນ ເຮົາຈະປັບປ່ຽນຫຍັງແດ່ ເພື່ອໃຫ້ກາຍເປັນຄວາມຊິນເຄີຍໃນການດຳລົງຊີວິດປະຈຳວັນແບບໃໝ່ ( New Normal ) ຈະນຳໃຊ້ເຕັກໂນໂລຊີເຂົ້າມາຊ່ວຍຄືແນວໃດ, ຈະນຳໃຊ້ຊ່ອງໂທລະພາບສຶກສາ ແລະ ກີລາ ໃຫ້ເກີດປະໂຫຍດສູງສຸດແກ່ການພັດທະນາວິຊາຊີບຄູ, ກຸ່ມໂຮງຮຽນ ແລະ ກຸ່ມເປົ້າໝາຍຜູ້ຮຽນທີ່ເຂົ້າບໍ່ເຖິງອິນເຕີເນັດແນວໃດ, ພ້ອມດຽວກັນ ກະຊວງສຶກສາທິການ ແລະ ກີລາ ຈະໄດ້ຈັດພິມ ແລະ ແຈກຢາຍປຶ້ມແບບຮຽນໃຫ້ພຽງພໍກັບນັກຮຽນທີ່ຢູ່ເຂດຊົນນະບົດ – ຫ່າງໄກຮັບປະກັນວ່ານັກຮຽນກ່ອນໄວຮຽນ, ປະຖົມສຶກສາ ແລະ ມັດທະຍົມສຶກສາຕອນຕົ້ນ ຈະໄດ້ຮັບພຽງພໍ ຖ້າຫາກມີເຫດການສຸກເສີນທີ່ບໍ່ຄາດຄິດເກີດຂຶ້ນໃນຕໍ່ໜ້າ.

ສ່ວນພໍ່ແມ່ຜູ້ປົກຄອງໃນເຂດທີ່ບໍ່ສາມາດເຂົ້າເຖິງຜ້າອັດປາກ – ອັດດັງ ຂໍໃຫ້ຊ່ວຍລູກຫຼານຂອງທ່ານໃນການຫຍິບຜ້າອັດປາກ – ອັດດັງ ໂດຍນຳໃຊ້ຜ້າສະອາດ ແລະ ວັດຖຸທີ່ສາມາດຫາໄດ້ໃນທ້ອງຖິ່ນ ເພື່ອເປັນການຫຼຸດຜ່ອນຄ່າໃຊ້ຈ່າຍຂອງຄອບຄົວ. ປັດຈຸບັນເຊິ່ງເປັນລະດູມໍລະສຸມ ມີຝົນຕົກໜັກເກືອບທຸກພາກຂອງປະເທດ, ການເດີນທາງຂອງລູກຫຼານ ແລະ ພໍ່ແມ່ຜູ້ປົກຄອງອາດພົບຄວາມຫຍຸ້ງຍາກແລະ ມີຄວາມສ່ຽງທີ່ຈະເກີດໄພອັນຕະລາຍ. ດັ່ງນັ້ນ, ຈຶ່ງຮຽກຮ້ອງໃຫ້ຜູ້ບໍລິຫານການສຶກສາ ແລະ ກີລາ ແຕ່ລະຂັ້ນ ແລະ ພໍ່ແມ່ຜູ້ປົກຄອງຈົ່ງຕິດຕາມແຈ້ງການພະຍາກອນອາກາດຢ່າງໃກ້ຊິດ ແລະ ໃຫ້ການແຈ້ງເຕືອນສະຖານການສຶກສາໃນຂອບເຂດຄວາມຮັບຜິດຊອບຂອງທ່ານຢ່າງຕັ້ງໜ້າ. ພ້ອມກັນນີ້, ສຳລັບນັກຮຽນ – ນັກສຶກສາ ແລະ ພໍ່ແມ່ຜູ້ປົກຄອງທີ່ມີລູກຫຼານກຳລັງສຶກສາຢູ່ຕ່າງປະເທດ ຈົ່ງຕິດຕາມແຈ້ງການມາດຕະການ ແລະ ຂ່າວສານຈາກສະຖານເອກອັກຄະລັດຖະທູດ ສປປ ລາວ ເປັນປົກກະຕິ ພ້ອມກັນປະຕິບັດລະບຽບການຂອງປະເທດເຈົ້າພາບ ແລະ ມາດຕະການເຂົ້າ – ອອກ ສປປ ລາວ ດ້ວຍຄວາມຮັບຜິດຊອບສູງ. ທັງນີ້, ເພື່ອເປັນການເຊີດຊູຄຸນສົມບັດ, ປະເພນີອັນດີງາມຂອງຄົນລາວໃນເວທີພາກພື້ນ ແລະ ສາກົນ ຜ່ານການປະພຶດປະຕິບັດຂອງພວກເຮົາ.