ທ່ານ ສອນ​ໄຊ ສີ​ພັນ​ດອນ ຢ້ຽມຢາມນິຄົມອຸດສາຫະກຳ ວີຕ້າ ພາກ.

370

ວັນເສົາ ທີ 22 ສິງຫາ 2020 ຜ່ານມາ, ທ່ານ ສອນ​ໄຊ ສີ​ພັນ​ດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍຄະນະ ໄດ້ລົງຢ້ຽມຢາມນິຄົມອຸດສາຫະກຳ ແລະ ການຄ້າວຽງຈັນ-ໂນນທອງ ຫຼື (VITA PARK) ເພື່ອປະເມີນຄືນຂໍ້ສະດວກ, ຂໍ້ຫຍຸ້ງຍາກໃນການດໍາເນີນທຸລະກິດ ພ້ອມທັງຮັບຟັງແຜນການພັດທະນາໃນອະນາຄົດໃນເຂດດັ່ງກ່າວ ໂດຍໃຫ້ກຽດຕ້ອນຮັບຂອງທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ.

ໂອກາດນີ້, ທ່ານ ທອງ​ທິບ ພັນ​ນຸລາດ ຮັກສາ​ການປະທານສະພາບໍລິຫານ ເສດຖະກິດນິຄົມອຸດສາຫະກຳ ແລະ ການຄ້າວຽງຈັນ-ໂນນທອງ ໄດ້ລາຍງານໂດຍຫຍໍ້ກ່ຽວກັບສະພາບການພັດທະນາວ່າ: ຜົນສຳເລັດຂອງການພັດທະນາໃນໄລຍະທີ 01 (​ເນື້ອທີ່ 110 ​ເຮັກຕາ) ປັດຈຸບັນ ມີນັກລົງທຶນຕ່າງປະ ເທດເປັນຕົ້ນແມ່ນ: ສປ ຈີນ, ຍີ່ປຸ່ນ, ໄທ, ໄຕ້ຫວັນ, ຮົງກົງ ແລະ ເດັນມາກເຂົ້າມາຈັບຈອງ ແລະ ເຊັນໃບທະບຽນໄປແລ້ວ ຈຳນວນ 67 ບໍລິສັັດ ມີທຶນຈົດທະບຽນທັງໝົດ 72,088,000ໂດລາ.

ມາຮອດດຽວນີ້, ໄດ້ຈັບຈອງເນື້ອທີ່ເທົ່າກັບ 90%  ຂອງເນື້ອທີ່ດີນທັງໝົດເພື່ອດໍາເນີນກິດຈະການຜະລິດເພື່ອສົ່ງອອກ. ໃນນັ້ນ, ໄດ້ດຳເນີນການການຜະລິດເພື່ອສົ່ງອອກ ແລະ ເຄື່ອນໄຫວຕົວຈິງຈຳນວນ 32 ບໍລິສັດ, ກຽມດຳເນີນເປີດໂຮງງານອີກ 01 ບໍລິສັດ, ກຳລັງກໍ່ສ້າງໂຮງງານອີກ 01 ບໍລິສັດ ແລະ ກໍາຂະຫຍາຍໂຮງງານເພີ່ມອີກ 02 ບໍລິສັດ (ຄາດວ່າໃນປີ 2021 ຈະມີ 03-05 ບໍລິສັດເລີ່ມດໍາເນີນການຜະລິດ-ສົ່ງອອກຕື່ມອີກ) ແລະ ສ່ວນທີ່ເຫຼືອແມ່ນຢູ່ໃນໄລຍະກະກຽມ.

ປັດຈຸບັນ, ມີມູນຄ່າການນຳເຂົ້າສິນຄ້າທັງໝົດ 225,172,498.18 ໂດລາ ແລະ ມູນຄ່າການສົ່ງອອກສິນຄ້າ 206,235,284.81 ໂດລາ ເຊິ່ງກິດຈະການສ່ວນໃຫຍ່ເປັນການຜະລິດເພື່ອສົ່ງອອກເຊັ່ນ: ເຄື່ອງນຸ່ງຫົ່ມ, ສິ້ນສ່ວນອຸປະກອນເອເລັກໂຕຼນິກ, ສາຍໄຟສຳລັບການເຮັດນໍ້າອຸ່ນ, ​ສາຍ​ໄຟແອເຢັນ, ທູບຈອດ, ເຄື່ອງມືອຸປະກອນການຜະລິດເຕັກນິກ, ຜະລິດຕະພັນປຸງແຕ່ງອາຫານ, ນໍ້າປາ, ນໍ້າສະອີວ, ນໍ້າມັນພືດຂອງບໍລິສັດ ຫອຍຫຼອດ ປະເທດໄທ; ຜະລິດຕະພັນຮັບໃຊ້ການຜະລິດກະສິກຳຂອງບໍລິສັດຊີພີ, ການຜະລິດປຸງແຕ່ງວັດສະດຸກໍ່ສ້າງ, ຜະລິດ​ຫົວອາຫານ​ສັດ, ຕຳ​ແຜ່ນ ແລະ ອື່ນໆ.

ນິຄົມຂອງພວກເຮົາສາມາດສ້າງວຽກເຮັດງານທຳໃຫ້ປະຊາຊົນອ້ອມຂ້າງໄດ້ 3.532 ຄົນ (ໃນນັ້ນຕ່າງປະເທດ 85 ຄົນ) ແລະ ຄາດໃນສົກປີ 2021 ຈະສາມາດສ້າງວຽກເຮັດງານທໍາໃຫ້ປະຊາຊົນລາວໄດ້ເຖີງ 4.000-5.000 ຄົນ. ພ້ອມດຽວກັນນີ້, ສະພາບໍລິຫານເສດຖະກິດ ນອຄວ ພວກເຮົາສາມາດເກັບພັນທະອາກອນ ແລະ ມອບອາກອນໃນປີ 2019 ໄດ້ມອບຈຳນວນ 2.314.069.250 ກີບ. ສ່ວນເງີນການແບ່ງປັນຜົນ 30% ຂອງພາກລັດໄດ້ຮັບຈຳນວນ 715.940,69 ໂດລາສະຫາລັດ.

ໄປຄຽງຄູ່ກັບການດຶງດູດການນັກທຸລະກິດເຂົ້າມາລົງທືນໃນເນື້ອທີ່ຂອງນິຄົມແລ້ວ ພວກເຮົາຍັງໄດ້ດຳເນີນການກໍ່ສ້າງພື້ນຖານໂຄງລ່າງໄປພ້ອມໆກັນຢ່າງຕໍ່ເນື່ອງເຊັ່ນ: ເສັ້ນທາງເບຕົງພາຍໃນນິຄົມ ແລະ ເຂົ້າຫາແຕ່ລະໂຮງງານ, ລະບົບນ້ຳປະປາເຂົ້າຫາແຕ່ລະໂຮງງານ, ສຳເລັດການກໍ່ສ້າງລະບົບຕາຄ່າຍສະຖານີຈ່າຍໄຟ້ຟ່້າ (115Kv-110MVA) ພາຍໃນນິຄົມເພື່ອຮັບປະກັນຕອບສະໜອງໄຟຟ້າໃຫ້ແກ່້ບັນດາໂຮງງານໄດ້ຢ່າງພຽງພໍ, ກໍ່ສ້າງຫ້ອງການ, ປະຕູໂຂງເຂົ້ານິຄົມ, ຮ່ອງນ້ຳອ້ອມນິຄົມ, ຮົ້ວອອ້ມນິຄົມ ແລະ ອື່ນໆ. ນອກນັ້ນ, ຍັງຈະໄດ້ກຳລັງກໍ່ສ້າງອ່າງບຳບັດນ້ຳເສັຍ, ອ່້າງເກັບນ້ຳ 5,000-6,000 M3 ແມັດກ້ອນ/ມື້, ໂຮງຮຽນເຕັກນິກວິຊາຊີບ​.

ສໍາລັບຂໍ້​ສະດວກ:  ຜູ້​ພັດທະນາ, ຜູ້​ລົງທຶນສ່ວນ​ໃຫຍ່​ໄດ້​​ເຂົ້າ​ໃຈ ​ແລະ ເອົາ​ໃຈ​ໃສ່​ປະຕິບັດ​ລະບຽບ​ກົດໝາຍ​ຂອງ ສປປ ລາວ ກໍ່ຄື​ກົດ​ລະບຽບ​ຂອງ​ນິຄົມ​ເປັນ​ຢ່າງ​ດີ. ນອກ​ນັ້ນ ຍັງ​ໄດ້ປະຕິບັດ​ພັນທະຕ່າງ​​ໃຫ້ລັດຖະບານຢ່າງ​ເປັນ​ປົກກະຕິ; ນັກ​ລົງທຶນ​ມີ​ຄວາມ​ພໍ​ໃຈ​ຍ້ອນ​ການ​ເຮັດ​ການ​ບໍລິການ​ປະຕູ​ດຽວ​ຢູ່​ກັບ​ທີ່ ເຊິ່ງມີ​ຄວາມສະດວກ ​ແລະ ​ວ່ອງ​ໄວ. ນອກ​ນັ້ນ, ຂະ​ແໜງ​ທີ່​ກ່ຽວຂ້ອງ​ກໍ່​ໃຫ້​ຄວາມ​ຮ່ວມ​ສະ​ນັນ​ສະ​ໝູນ​ເປັນ​ຢ່າງ​ດີ; ສາມາດ​ສ້າງ​ວຽກ​ເຮັດ​ງານ​ໃຫ້​ປະຊາຊົນ ​ແລະ ປະຊາຊົນ​ອ້ອມ​ຂ້າງ​ນິຄົມ​ໄດ້​ມີ​ສ່ວນ​ຮ່ວມ​ໃນ​ການ​ສ້າງ​ລາຍ​ຮັບ; ການ​ຂະຫຍາຍ​ເນື້ອ​ທີ່​ໄລຍະ​ສອງ 142 ​ເຮັກຕາ ​ກໍ່​ໄດ້​ການ​ຮ່ວມ​ມື​ເປັນ​ຢ່າງ​ດີ​ຈາກ​ພາກ​ລັດກໍ່​ຄື​ ຂະ​ແໜງ​ການ​ທີ່​ກ່ຽວຂ້ອງ.

ສ່ວນຂໍ້ຫຍຸ້ງຍາກ:  ການ​ຊົດ​ເຊີຍ​ເນື້ອ​ທີ່​ດິນທີ່​ຂະຫຍາຍ​ໄລຍະສອງ 142 ​ເຮັກຕາ ​ຍັງ​ຊັກ​ຊ້າ ຍ້ອນ​ປະຊາຊົນ​ຈຳນວນ​ນື່ງຍັງ​ບໍ່​ຍອມຮັບ​ເອົາ​ຄ່າ​ຊົດ​ເຊີຍ ​ແລະ ຈຳນວນ​ໜຶ່ງກໍ່​ບໍ່​ສາມາດ​ຕິດ​ຕໍ່​ໄດ້. ນອກ​ນັ້ນ, ຍັງ​ມີ​ດິນ​ຂອງ​ຄ້າຍ​ທະຫານ ​ແລະ ດິນ​ຂອງ​ກະຊວງການ​ເງີ​ນຈຳນວນ​ໜຶ່ງ ​ມີ​ຄວາມ​ຫຍຸ້ງຍາກ​ໃນ​ການ​ຊົດ​ເຊີຍ.

ຂໍ້ສະເໜີ:  ສະ​ເໜີ​ໃຫ້​ທາງກະຊວງພະລັງງານ ​ແລະ ບໍ່​ແຮ່ ພິຈາລະນາຄົ້ນ​ຄ້ວາ​ລາຄາ​ໄຟຟ້າ​ພາກ​ອຸດສາຫະກຳ​ຄືນ​ໃໝ່ ​ເພື່ອ​ໃຫ້​ນິຄົມສາມາດ​ປະຕິບັດ​ລາຄາ​ໄຟ້າ​ໃໝ່​ຕາມ​ແຈ້ງ​ການ​ຂອງ​ລັດຖະບານ ນັບ​ແຕ່​ເດືອນ 05/2020​ ເປັນ​ຕົ້ນ​ມາ.

ທິດທາງແຜນການຕໍ່ຫນ້າ: ຫຼັງຈາກດຳເນີນການໄລຍະທີ 01 ສຳເລັດແລ້ວ, ຈະໄດ້ສືບຕໍ່ພັດທະນາເນື້ອທີ່ໄລຍະທີສອງ 142 ຮຕ. ປັດຈຸບັນ ໄດ້ສຳເລັດຂັ້ນຕອນການສຳຫຼວດວັດແທກ ແລະ ກຳລັງຊົດເຊີຍໄດ້ຈຳນວນໜຶ່ງແລ້ວ ຈະລວມມີຂະແໜງການເທັກໂນໂລຊີ ແລະ ວິທະຍາສາດ, ເຂດຊີວະວິດທະຍາກ່ຽວກັບປຸງແຕ່ງກະສິກໍາ, ເຂດສຶກສາວັດທະນະທໍາ ແລະ ສາທາລະນະສຸກ ແລະ ເຂດສູນການຄ້າທຸລະກິດ, ຊຶ່ງທັງໝົດນັ້ນຈະໄດ້ດໍາເນີນໄປພ້ອມໆກັນ.

(ເນື້ອໃນ-ພາບ: ກົມອຸດສາຫະກຳ ແລະ ຫັດຖະກໍາ)