ຕະຫຼາດຫຼັກຊັບລາວ ຊ່ວຍເຫຼືອໂຮງຮຽນບ້ານນາຂອບ ເມືອງເຟືອງ ແຂວງວຽງຈັນ.

584

ຕະຫຼາດຫຼັກຊັບລາວ (ຕລຊລ) ໄດ້ຈັດກິດຈະກໍາ​ຊ່ວຍ​ເຫຼືອ​ສັງ​ຄົມພາຍໃຕ້ຂະບວນການຂ່ຳນັບຮັບຕ້ອນພິທີສະເຫຼີມສະຫຼອງວັນສ້າງຕັ້ງຕະຫຼາດທຶນລາວ ຄົບຮອບ 10 ປີ.​ ຈຸດປະສົງກໍ່ເພື່ອຊ່ວຍເຫຼືອໂຮງຮຽນທີ່ຢູ່ເຂດຫ່າງໄກສອກຫຼີກ ໂດຍສະເພາະແມ່ນໂຮງ​ຮຽນ​ປະ​ຖົມ​ສົມ​ບູນ​ສຶກ​ສາ​ນາ​ຂອບ ເມືອງເຟືອງ ແຂວງວຽງຈັນ ທີ່ເປັນໂຮງຮຽນຂາດເຂີນອຸປະກອນການສຶກສາ ແລະ ສິ່ງອໍານວຍຄວາມສະດວກຕ່າງໆ.

ຫຼ້າສຸດໃນວັນເສົາ ທີ 22 ສິງຫາ 2020 ຜ່ານມາ, ຕະຫຼາດຫຼັກຊັບລາວ ໄດ້ຈັດກິດຈະກໍາ​ຊ່ວຍ​ເຫຼືອດັ່ງກ່າວຂຶ້ນ ເພື່ອມອບອຸປະກອນການສຶກສາ, ອຸປະກອນການຮຽນ-ການສອນ, ທາສີໂຮງຮຽນ ແລະ ມອບທຶນສະໜັບສະໜູນຈໍານວນໜຶ່ງ. ເຊິ່ງໃຫ້ກຽດນໍາພາຂອງທ່ານ ສຽວ​ສະ​ຫວາດ ທີ​ລະ​ກຸນ ຮອງ​ຫົວ​ໜ້າ​ສຳ​ນັກ​ງານ​ຄະ​ນະ​ກຳ​ມະ​ການ​ຄຸ້ມ​ຄອງຫຼັກ​ຊັບ ແລະ ໃຫ້ກຽກຕ້ອນຮັບຢ່າງອົບອຸ່ນຂອງທ່ານ ວັນ​ນາ ວິ​ນາ​ວົງ ຜູ້​ອຳ​ນວຍ​ການ​ໂຮງ​ຮຽນ​ປະ​ຖົມ​ສົມ​ບູນ​ສຶກ​ສາ​ນາ​ຂອບ ພ້ອມດ້ວຍນ້ອງນັກຮຽນເຂົ້າຮ່ວມຢ່າງພ້ອມພຽງ.

ສໍາລັບອຸປະກອນການສຶກສາທີ່ນໍາມາມອບໃນຄັ້ງນີ້ປະກອບມີ: ປື້ມ​ແບບ​ຮຽນ​ສຳ​ລັບ​ປະ​ຖົມ​ສຶກ​ສາປໍ1 ຫາ ປໍ5; ປື້ມ​ຂຽນ, ສຳ​ຂຽນ​ກະ​ດານ, ສໍ​ດຳ, ໄມ້​ບັນ​ທັດ, ຢ່າງ​ລຶບ, ອຸ​ປະ​ກອນ​ທຳ​ຄວາມ​ສະ​ອາດ ເຊັ່ນ: ຟອຍ, ຖັງ​ຂີ້​ເຫຍື່ອ; ຖັງສີທີ່ໃຊ້ສໍາລັບທາ​ສີອາ​ຄານ​ໂຮງຮຽນພ້ອມ​ອຸ​ປະ​ກອນ​ກໍ່ສ້າງ​ ແລະ ມອບ​ທຶນ​ໃຫ້​ໂຮງ​ຮຽນຕື່ມອີກ. ຄຽງຄູ່ກັນນັ້ນ, ຍັງໄດ້ມອບເຄື່ອງ​ນຸ່ງ​ຫົ່ມ​ໃຫ້​ແກ່ອຳ​ນ​າດ​ການ​ປົກ​ຄອງ​ຂັ້ນ​ບ້ານ ເພື່ອ​ແຈກ​ຢາຍ​ໃຫ້​ແກ່​ປະ​ຊາ​ຊົນ ແລະ ນ້ອງໆ​ນັກ​ຮຽນ​ອີກ​ດ້ວຍ.

ໂອກາດນີ້, ທ່ານ ວັນ​ນາ ວິ​ນາ​ວົງ ຜູ້​ອຳ​ນວຍ​ການໂຮງ​ຮຽນ​ປະ​ຖົມ​ສົມ​ບູນ​ສຶກ​ສາ​ນາ​ຂອບ ເມືອງເຟືອງ ແຂວງວຽງຈັນ ໄດ້​ກ່າວວ່າ: ຂ້າພະເຈົ້າຮູ້ສຶກພາກພູມໃຈຫຼາຍທີ່ຕະຫຼາດຫຼາດຫຼັກຊັບລາວ ເຫັນໄດ້ເຖິງຄວາມສໍາຄັນຂອງວຽກງານການສຶກສາ ໂດຍສະເພາະແມ່ນການປະກອບສ່ວນຊ່ວຍເຫຼືອອຸປະກອນການຮຽນ-ການສອນ, ອຸປະກອນສໍາລັບການສຶກສາ, ເຄື່ອງນຸ່ງຫົ່ມ ແລະ ທຶນຈໍານວນໜຶ່ງ ເພື່ອນໍາໃຊ້ເຂົ້າໃນການສ້ອມແປງໂຮງຮຽນແຫ່ງນີ້. ເນື່ອງຈາກວ່າປີຜ່ານມາ, ​ປະຊາຊົນພາຍໃນບ້ານໄດ້ປະສົບກັບໄພແຫ້ງແລ້ງ, ​ບໍ່​ສາ​ມາດ​ເຮັດ​ນາ​ໄດ້ປົກກະຕິດ ຈຶ່ງສົ່ງຜົນກະທົບຕໍ່​ລາຍ​ໄດ້​ຂອງ​ພໍ່​ແມ່​ປະ​ຊາ​ຊົນ ລວມໄປ​ເຖິງ​ກິດ​ຈະ​ກຳ​ຕ່າງໆ​ຂອງ​ໂຮງ​ຮຽນ​ທີ່​ບໍ່​ສາ​ມາດ​ຈັດຕັ້ງປະຕິບັດຕາມແຜນ​ໄດ້.

ໃນວາລະຂອງກິດຈະກໍາດັ່ງກ່າວ, ບັນດາທິມງານຕະຫຼາດຫຼັກຊັບລາວ ຍັງໄດ້ທາ​ສີ ແລະ ສ້ອມ​ແປງຫຼັງ​ຄາ​ໃຫ້​ແກ່​ໂຮງ​ຮຽນ​ອີກ​ດ້ວຍ.

 

[ຂ່າວ-ພາບ: ຕະຫຼາດຫຼັກຊັບລາວ]