ມອບ-ຮັບໃບຢັ້ງຢືນຝຶກອົບຮົມທີ່ສູນພັດທະນາ ແລະ ຝຶກອົບຮົມຊັອຟແວຣ໌ ລາວ-ອິນເດຍ.

534

ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ໄດ້ຈັດພິທິມອບ-ຮັບໃບຢັ້ງຢືນຈາກການສໍາເລັດຝຶກອົບຮົມທີ່ສູນພັດທະນາ ແລະ ຝຶກອົບຮົມຊັອຟແວຣ໌ ລາວ-ອິນເດຍ (CESDT).  ໃຫ້ກຽດເຂົ້າຮ່ວມຂອງ ທ່ານ ທອງໃສ ຊານໄຊຍະ ຮອງລັດຖະມົນຕີກະຊວງ ປທສ, ທ່ານ ສາຍຝົນ ບຸດຈັນທະລາດ ຫົວໜ້າສະຖາບັນເຕັກໂນໂລຊີຂໍ້ມູນ-ຂ່າວສານ (ສຕສ), ມີຜູ້ຕາງໜ້າຈາກ ສະຖານເອກອັກຄະລັດຖະທູດອິນເດຍປະຈຳລາວ, ບັນດາຫົວໜ້າກົມ, ຫົວໜ້າພະແນກ, ຊ່ຽວຊານ, ພ້ອມດ້ວຍນັກຝຶກອົບຮົມພາຍໃນ ກະຊວງ ປທສ ແລະ ພາກສ່ວນທີ່ກ່ຽວຂ້ອງ.

ການຝຶກອົບຮົມໃນຄັ້ງນີ້, ໄດ້ດໍາເນີນມາເປັນເວລາ 1 ປີ (ວັນທີ 01 ສິງຫາ 2019 ຫາ 1 ສິງຫາ 2020) ໂດຍ ທ່ານ ນາງ Akanksha SHAMAR (ອາກັງຊາ ຊາມາ) ຊ່ຽວຊານຈາກສູນພັດທະນາທັກສະຄອມພິວເຕີຂັ້ນສູງ (CDAC) ປະເທດອິນເດຍ ໄດ້ມາເຮັດໜ້າທີ່ເປັນຄູສອນຖ່າຍທອດຄວາມຮູ້, ແລກ ປ່ຽນບົດຮຽນ ແລະ ປະສົບການໃຫ້ແກ່ພະນັກງານ, ຄູອາຈານພາຍໃນ ແລະ ອ້ອມຂ້າງກະຊວງ ປທສເຊິ່ງປະກອບມີ 4 ຫຼັກສູດຄື: 1). Data Communication and Networking; 2). Advanced Diploma on Information Technology; 3). Advanced Web Technology ແລະ 4). Ethical Hacking and Information Security ເຊິ່ງມີນັກຝຶກເຂົ້າຮ່ວມທັງໝົດ 87 ເທື່ອຄົນຈາກ 11 ພາກສ່ວນ, ທັງພາຍໃນ ແລະ ພາຍນອກ ກະຊວງ ປທສ.

ໄລຍະຜ່ານມາ, ເຖິງແມ່ນຈະມີສະພາບການແຜ່ລະບາດຂອງພະຍາດໂຄວິດ-19 ທາງສູນກໍ່ໄດ້ເປີດການຮຽນຜ່ານວິດີໂອທາງອອນລາຍ (Microsoft Teams) ທີ່ໄດ້ຮັບການສະໜັບສະໜູນໂດຍສູນບໍລິຫານລັດດ້ວຍເອເລັກໂຕຣນິກ ກະຊວງ ປທສ ເພື່ອຮັບປະກັນຄວາມຕໍ່ເນື່ອງຂອງການຝຶກອົບຮົມ. ໃນປັດຈຸບັນ, ກໍາລັງຈັດຕັ້ງປະຕິບັດການຝຶກອົບຮົມໄລຍະສັ້ນສຳລັບພະນັກງານພາຍໃນ ແລະ ປິ່ນອ້ອມກະຊວງ ປທສ ເຊິ່ງສອນໂດຍນັກຝຶກຂອງສະຖາບັນທີ່ໄດ້ຜ່ານການຝຶກອົບຮົມໃນໄລຍະຜ່ານມາ ໂດຍຈະມີຊ່ຽວຊານເປັນຜູ້ຕິດຕາມຢ່າງໃກ້ຊິດແນໃສ່ປະເມີນຜູ້ທີ່ຈະເປັນຄູຝຶກໃນຕໍ່ໜ້າ ເພື່ອຮັບປະກັນຄຸນນະພາບໃນການສິດສອນທີ່ສູນ.

ໃນໂອກາດດັ່ງກ່າວ, ທ່ານ ທອງໃສ ຊານໄຊຍະ ໄດ້ກ່າວວ່າ: ການພັດທະນາຂອງເຕັກໂນໂລຊີ ໃນຍຸກປັດຈຸບັນແມ່ນໄດ້ພັດທະນາແບບກ້າວກະໂດດຂັ້ນ, ການສື່ສານ 5G, ປັນຍາປະດິດ ຫຼື AI, Big Data, Block Chain, IoT ກໍາລັງຖຶກນໍາມາຜັນຂະຫຍາຍເຂົ້າໃນແຕ່ລະຂະແໜງການຢ່າງກ້ວາງຂວາງ. ສະນັ້ນ, ທ່ານຈຶ່ງເນັ້ນໜັກໃຫ້ທີ່ສູນ CESDT ຕັ້ງໜ້າຈັດຕັ້ງປະຕິບັດການຝຶກອົບຮົມທີ່ຮັບປະກັນທາງດ້ານຄຸນນະພາບ, ສາມາດສ້າງບຸກຄະລາກອນໃຫ້ມີພຶື້ນຖານດ້ານຄວາມຮູ້-ຄວາມສາມາດ ປະກອບສ່ວນເຂົ້າໃນວຽກງານການພັດທະນາເສດຖະກິດ-ສັງຄົມຕົວຈິງ ເພື່ອກ້າວໄປສູ່ການສ້າງຊັບພະຍາກອນມະນຸດທີ່ທັນສະໄໝອັນສະເພາະ ທີ່ນໍາໃຊ້ໄດ້ໃນປະເທດເຮົາຢ່າງແທດເໝາະ.

ພິທີດັ່ງກ່າວ, ຈັດຂຶ້ນໃນວັນທີ 19 ສິງຫາ 2020 ທີ່ສະຖາບັນເຕັກໂນໂລຊີການສື່ສານຂໍ້ມູນ-ຂ່າວສານ (ສຕສ) ບ້ານວັດນາກ ເມືອງສີສັດຕະນາກ ນະຄອນຫຼວງວຽງຈັນ ເຊິ່ງເປັນສະຖາບັນທີ່ເປີດການສິດສອນດ້ານ ICT ໃນຫຼັກສູດຊັ້ນສູງ. ນອກຈາກນັ້ນຍັງມີການຝຶກອົບຮົມເຕັກນິກວິຊາສະເພາະດ້ານ ICT ທີ່ສູນພັດທະນາ ແລະ ຝຶກອົບຮົມຊັອຟແວຣ໌ ລາວ-ອິນເດຍ. ສ່ວນລາຍລະອຽດສາມາດເບິ່ງໄດ້ທີ່: www.facebook.com/CESDT ຫຼື www.iict.gov.la