ປະຕິບັດການດຳລົງຊີວິດປົກກະຕິແບບໃໝ່ ໃຫ້ກາຍເປັນຄວາມຊິນເຄີຍ

409

ຄະນະສະເພາະກິດໄດ້ຮຽກຮ້ອງທຸກພາກສ່ວນໃນສັງຄົມ ຈົ່ງພາກັນເອົາໃຈໃສ່ສືບຕໍ່ປະຕິບັດການດຳລົງຊີວິດປົກກະຕິແບບໃໝ່ ໃຫ້ກາຍເປັນ ຄວາມຊິນເຄີຍ ເພື່ອສະກັດກັ້ນການລະບາດຂອງພະຍາດ ໂຄວິດ – 19 ບໍ່ໃຫ້ກັບຄືນມາຮອບໃໝ່ໃນປະເທດເຮົາ.

ສຳລັບຜູ້ທີ່ຈະເດີນທາງ ເຂົ້າ – ອອກ ສປປ ລາວ ແມ່ນໃຫ້ປະຕິບັດຕາມແຈ້ງການຂອງກະຊວງການຕ່າງປະເທດ ສະບັບເລກທີ 1861/ຕປທ.ສພກ ລົງວັນທີ 31 ກໍລະກົດ 2020.

ວັນທີ 19 ສິງຫາ 2020 ນາງ ດຣ. ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກໄດ້ຖະແຫຼງຂ່າວວ່າ: ການເຝົ້າລະວັງໂຄ ວິດ – 19 ຮອດເວລາ 17:00 ໂມງວັນທີ 18 ສິງຫາ 2020 ທົ່ວປະເທດມີຜູ້ເດີນທາງເຂົ້າມາ 1.649 ຄົນ, ໃນນັ້ນຈຸດຜ່ານດ່ານ ລາວ – ໄທ 1.051 ຄົນ ( ແຮງງານລາວກັບມາແຕ່ໄທ 100 ຄົນ ); ຈຸດຜ່ານດ່ານ ລາວ – ຈີນ 50 ຄົນ ( ມີແຮງງານຈີນ 31 ຄົນ, ແຮງງານລາວ 3 ຄົນ ); ຈຸດຜ່ານດ່ານລາວ – ຫວຽດນາມ 546 ຄົນ ( ມີແຮງງານລາວ 4 ຄົນ , ແຮງງານຫວຽດນາມ 37 ຄົນ ); ຈຸດຜ່ານດ່ານລາວ – ກຳປູເຈຍ 2 ຄົນ ( ລາວ 1 ຄົນ ແລະ ກໍາປູເຈຍ 1 ຄົນ ), ທຸກຄົນແມ່ນໄດ້ແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ( ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນ 14 ວັນ.

ທ່ານ ນາງ ດຣ. ລັດສະໝີ ວົງຄຳຊາວ ກ່າວຕື່ມວ່າ: ການຕິດຕາມຜູ້ຖືກຈຳກັດບໍລິເວນ ຢູ່ 53 ສູນ, ມີຜູ້ຖືກຈຳກັດບໍລິເວນ 3.751 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ.
ວັນທີ 18 ສິງຫາໄດ້ເກັບຕົວຢ່າງມາກວດວິເຄາະທັງໝົດ 214 ຄົນ, ໃນນັ້ນແຮງງານລາວມາແຕ່ໄທ 195 ຕົວຢ່າງ, ບຸກຄົນທົ່ວໄປທີ່ມີອາການ 3 ຕົວຢ່າງ ແລະ ບຸກຄົນທົ່ວໄປທີ່ບໍ່ມີອາການ 16 ຕົວຢ່າງ, ຜົນກວດວິເຄາະທັງໝົດແມ່ນບໍ່ພົບເຊື້ອ; ການກວດວິເຄາະແຕ່ເດືອນມັງກອນ ຮອດວັນທີ 18 ສິງຫາ 2020 ມີ 35.022 ຕົວຢ່າງ, ກວດພົບເຊື້ອສະສົມ 22 ຄົນ; ສ່ວນຄົນເຈັບທັງ 3 ກໍລະນີຍັງສືບຕໍ່ປິ່ນປົວທີ່ໂຮງໝໍມິດຕະພາບ.

ເພື່ອຫຼຸດຜ່ອນ ແລະ ຢັບຢັ້ງການລະບາດແຜ່ລາມຂອງພະຍາດ ຈຶ່ງຮຽກຮ້ອງມາຍັງທຸກພາກສ່ວນໃນສັງຄົມ ຈົ່ງພາກັນເອົາໃຈໃສ່ສືບຕໍ່ປະຕິບັດການດຳລົງຊີວິດປົກກະຕິແບບໃໝ່ໃຫ້ກາຍເປັນຄວາມຊິນເຄີຍ ເປັນຕົ້ນແມ່ນອອກຈາກບ້ານເມື່ອຈຳເປັນ; ການໃສ່ຜ້າອັດປາກ – ດັງເວລາອອກຈາກເຮືອນ ຫຼື ໄປສະຖານທີ່ທີ່ມີ ຄວາມສ່ຽງຕໍ່ການຕິດເຊື້ອ.

ການລ້າງມືເລື້ອຍໆດ້ວຍນໍ້າສະອາດໃສ່ສະບູ ຫຼື ເຈວລ້າງມື; ການປະຕິບັດຮັກສາໄລຍະຫ່າງ 1 – 2 ແມັດຂຶ້ນໄປ, ການກິນອາຫານທີ່ປຸງສຸກໃໝ່, ຄວນແຍກຂອງໃຊ້ສ່ວນຕົວບໍ່ໃຊ້ຮ່ວມກັບຜູ້ອື່ນ ເມື່ອກັບຮອດເຮືອນຄວນອາບນ້ຳ ແລະ ປ່ຽນເສື້ອຜ້າທັນທີ, ການປະຕິບັດທັງໝົດນີ້ກໍແມ່ນເພື່ອສະກັດກັ້ນການລະບາດຂອງພະຍາດໂຄວິດ – 19 ບໍ່ໃຫ້ກັບຄືນມາຮອບໃໝ່ໃນປະເທດເຮົາ.

ສຳລັບຜູ້ທີ່ຈະເດີນທາງ ເຂົ້າ – ອອກ ສປປ ລາວ ແມ່ນໃຫ້ປະຕິບັດຕາມແຈ້ງການຂອງກະຊວງການຕ່າງປະເທດ ສະບັບເລກທີ 1861/ຕປທ.ສພກ ລົງວັນທີ 31 ກໍລະກົດ 2020.