ທພລ ຈັບມື ສກຈຮ ພັດທະນາອຸດົມໄຊ ໃຫ້ບໍລິການຜ່ານລະບົບທະນາຄານ

415

ສະຖາບັນການເງິນຈຸລະພາກ ທີ່ຮັບເງິນຝາກ ພັດທະນາອຸດົມໄຊ ຫຼື ສກຈຮ ພັດທະນາອຸດົມໄຊ ໄດ້ຈັດພິທີເຊັນສັນຍາຮ່ວມກັບທະນາຄານພັດທະນາລາວ (ທພລ) ວ່າດ້ວຍການບໍລິການຜ່ານລະບົບ ທະນາຄານ. ຈຸດປະສົງ ແມ່ນເພື່ອຫັນເອົາທຸກລະບົບການຊໍາລະສະສາງຂອງສະຖາບັນຜ່ານລະບົບທະນາ ຄານ ທພລ ແລະ ການເປັນຕົວແທນບໍລິການຝາກ-ຖອນເງິນຝາກຂອງລູກຄ້າ ທພລ ເຊິ່ງລູກຄ້າສາມາດບໍລິການນຳ ສກຈຮ ພັດທະນາອຸດົມໄຊ ໄດ້ຢ່າງສະດວກສະບາຍ.

ທັງນີ້, ກໍ່ເພື່ອອໍານວຍຄວາມສະດວກໃຫ້ແກ່ລູກຄ້າສະຖາບັນທີ່ເຂົ້າມາໃຊ້ບໍລິການເພີ່ມຂຶ້ນຢ່າງຕໍ່ເນື່ອງ ໂດຍຜ່ານຫຼາຍຊ່ອງທາງ ບໍ່ວ່າຈະເປັນຜ່ານເຄົາເຕີ້ບໍລິການທົ່ວລະບົບທະນາຄານ, ຜ່ານມືຖື ແລະ ຜ່ານແອັບພລິເຄຊັ່ນຂອງ ທພລ.

ມາຮອດປະຈຸບັນ, ທພລ ໄດ້ໃຫ້ບໍລິການຊໍາລະຄ່າສາທາລະນຸປະໂພກຮ່ວມກັບຫຼາຍພາກສ່ວນ. ໃນນັ້ນ, ປະກອບມີ: ການຊໍາລະຄ່າໄຟຟ້າ, ຄ່ານໍ້າປະປາ, ຄ່າໂທລະສັບ, ຄ່າພາສີ-ອາກອນ ແລະ ຊໍາລະຄ່າງວດເຊົ່າສິນເຊື່ອອື່ນໆ ເຊິ່ງໄດ້ພັດທະນາໃຫ້ສາມາດຊຳລະຜ່ານຫຼາຍຊ່ອງທາງຄື: ຜ່ານ ATM, ລະບົບແອັບພລິເຄຊັ່ນເທິງມືຖື, ຜ່ານ​ປ່ອງ​ບໍລິການ ທພລ ແລະ ອື່ນໆ.

ໂອກາດນີ້, ທ່ານ ສົມຈິດ ດວງມີໄຊ ຜູ້ອໍານວຍການສະຖາບັນການເງິນຈຸລະພາກທີ່ຮັບເງິນຝາກພັດທະນາອຸດົມໄຊ ກໍ່ໄດ້ສະແດງຄວາມຂອບໃຈມາຍັງ ທພລ ທີ່ເຮັດໃຫ້ການບໍລິການຂອງສະຖາບັນການເງິນມີຄວາມສະດວກສະບາຍຍິ່ງຂຶ້ນ ດ້ວຍການນໍາໃຊ້ຜະລິດຕະພັນທີ່ທັນສະໄໝໃນການຊຳລະສະສາງຕ່າງໆຂອງລູກຄ້າ ເຊິ່ງຖືວ່າການ​ຊຳ​ລະ​ແບບ​ອີ​ເລັກ​ໂທ​ຣ​ນິກນີ້​ ຈະ​​ສ້າງ​ເງື່ອນ​ໄຂ​ອຳ​ນວຍ​ຄວາມ​ສະ​ດວກ​ໃຫ້ລູກ​ຄ້າ​ຂອງ​ທັງສອງຝ່າຍທີ່​ຊົມ​ໃຊ້​ການ​ບໍ​ລິ​ການ​ເພີ່ມຂຶ້ນ​ ນໍາອີກ.

ພິທີດັ່ງກ່າວ, ຈັດຂຶ້ນໃນ 17 ສິງຫາ 2020 ທີ່ຫ້ອງປະຊຸມທະນາຄານພັດທະນາລາວ ສາຂາອຸດົມໄຊ ເຊິ່ງເປັນການລົງນາມໃນສັນຍາຮ່ວມກັນຂອງທ່ານທ່ານ ວັນນະສີ ລັດສະໝີ ຫົວໜ້າທະນາຄານພັດທະນາລາວ ສາຂາອຸດົມໄຊ ກັບ ທ່ານ ສົມຈິດ ດວງມີໄຊ ຜູ້ອໍານວຍການສະຖາບັນການເງິນຈຸລະພາກທີ່ຮັບເງິນຝາກພັດທະນາອຸດົມໄຊ, ໂດຍການເຂົ້າຮ່ວມຂອງ ທ່ານ ພຸດສາລາ ອົມດາລາ ຮອງຜູ້ອໍານວຍການໃຫຍ່ ທະນາຄານພັດທະນາລາວ, ມີບັນດາຄະນະສະພາບໍລິຫານ, ຄະນະອໍານວຍການ, ຄະນະພະແນກ ແລະ ວິຊາການທີ່ກ່ຽວຂ້ອງຂອງ 02 ພາກສ່ວນ.