ກວຕ ຮັບເອົາມະຊົນກ້າວໜ້າເປັນສະມາຊິກພັກສໍາຮອງ ແລະ ເລື່ອນພັກສຳຮອງຂຶ້ນສົມບູນ

511

3 ໜ່ວຍພັກ ພາຍໃນອົງຄະນະພັກກະຊວງວິທະຍາສາດ ແລະ ເຕັກໂນໂລຊີ (ກວຕ) ປະກອບມີ: ໜ່ວຍພັກສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ (ສຄວຕ); ໜ່ວຍພັກສະຖາບັນພະລັງ ງານທົດແທນ ແລະ ວັດສະດຸໃໝ່ (ສພວ); ໜ່ວຍພັກກົມເຕັກໂນໂລຊີ ແລະ ນະວັດຕະກຳ ໄດ້ຈັດພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ແລະ ເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນໃນວັນທີ 12 ສິງຫາ 2020 ທີ່ຫ້ອງປະຊຸມໃຫຍ່ຂອງສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ໂດຍໃຫ້ກຽດເປັນປະທານຂອງ ສະຫາຍ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ.

ໃນພິທີ, ສະຫາຍ ພິມພາ ອຸດທະຈັກ, ເລຂາໜ່ວຍພັກສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ໄດ້ຂຶ້ນຜ່ານມະຕິຕົກລົງວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງຂອງໜ່ວຍພັກ ສຄວຕ ຈໍານວນ 1 ສະຫາຍ, ຍິງ 1 ສະຫາຍ. ພ້ອມດຽວກັນນັ້ນ, ສະຫາຍ ນາງ ໄມຕີ ວົງຄໍາຊາວ ເລຂາໜ່ວຍພັກສະຖາບັນພະລັງງານທົດແທນ ແລະ ວັດສະດຸໃໝ່ ໄດ້ຂຶ້ນຜ່ານມະຕິຕົກລົງ ວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງຂອງໜ່ວຍພັກ ສພວ ຈໍານວນ 1 ສະຫາຍ.

ຄຽງຄູ່ກັນນັ້ນ, ຍັງໄດ້ເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນຂອງໜ່ວຍພັກກົມເຕັກໂນໂລຊີ ແລະ ນະວັດຕະກຳ ຈຳນວນ 4 ສະຫາຍ, ຍິງ 2 ສະຫາຍ ເຊິ່ງຂຶ້ນຜ່ານມະຕິໂດຍ ສະຫາຍ ສຸມານະ ຈຸລາມະນີ ເລຂາໜ່ວຍພັກກົມເຕັກໂນໂລຊີ ແລະ ນະວັດຕະກຳ.

ໂອກາດນີ້, ສະຫາຍ ບໍ່ວຽງຄຳ ວົງດາລາ ໄດ້ມີຄຳເຫັນບາງຕອນສໍາຄັນວ່າ: ບັນດາສະມາຊິກພັກສຳຮອງທີ່ໄດ້ເລື່ອນເປັນສະມາຊິກພັກສົມບູນໃນຄັ້ງນີ້ ຈົ່ງສືບຕໍ່ເສີມຂະຫຍາຍຄວາມສາມາມັກຄີເປັນຈິດໜຶ່ງໃຈດຽວ ທີ່ອົງຄະນະພັກກະຊວງຂອງພວກເຮົາມີມູນເຊື້ອມາແລ້ວ ເຊິ່ງຍາມໃດພວກເຮົາຕ້ອງຢູ່ພາຍໃຕ້ການຊີ້ນຳ-ນຳພາຂອງກົມການເມືອງສູນກາງພັກທີ່ເປັນແກນນຳເປັນຄັນທຸງຂອງພັກເຮົາ, ປະຕິບັດຕາມທິດຊີ້ນໍາຂອງຄະນະເລຂາທິການສູນກາງພັກ ແລະ ຄະນະຈັດຕັ້ງສູນກາງພັກ ເພື່ອພ້ອມກັນກຽມພ້ອມກອງປະຊຸມໃຫຍ່ຂອງຜູ້ແທນສະມາຊິກພັກ ຄັ້ງທີ 2 ຂອງອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ ໃຫ້ປະສົບຜົມສຳເລັດ.

[ຂ່າວ-ພາບ: ບາລະຄອນ]