ທ່ານ ຄໍາມະນີ ອິນທິລາດ ເນັ້ນໃຫ້ຊາວໜຸ່ມກະຊວງ ພບ ເອົາໃຈໃສ່ 5 ບັນຫາສໍາຄັນ.

604

ທ່ານ ປອ. ຄຳ​ມະ​ນີ ອິນ​ທິ​ລາດ ລັດ​ຖະ​ມົນ​ຕີ​ກະ​ຊວງພະ​ລັງ​ງານ ແລະ ບໍ່​ແຮ່ (ພບ) ໄດ້ໃຫ້ກຽດໂອ້​ລົມ​ຕໍ່​ກອງ​ປະ​ຊຸມ​ໃຫຍ່​ຄັ້ງ​ທີ III ຂອງຜູ້​ແທ​ນ​ຊາວ​ໜຸ່ມ​ປະ​ຊາ​ຊົນ​ປະ​ຕິ​ວັດ​ລາວ ກະ​ຊວງພະ​ລັງ​ງານ ແລະ ບໍ່​ແຮ່ ຈັດ​ຂຶ້ນ​ໃນ​ມື້​ວັນ​ທີ 12 ສິງ​ຫາ 2020 ທີ່​ຜ່ານ​ມາ ເຊິ່ງໄດ້ເໜັ້ນ​ໜັກ​ໃຫ້ຊາວ​ໜຸ່ມ-ໄວ​ໜຸ່ມ​ພາຍ​ໃນ​ກະ​ຊວງເອົາ​ໃຈ​ໃສ່ 5 ບັນ​ຫາ​ທີ່​ສຳ​ຄັນ ເຊັ່ນ: ເຮັດຫຼ້ອນໜ້າທີ່ການເມືອງທີ່ພັກ-ລັດມອບໝາຍໃຫ້; ປັບປຸງແບບແຜນວິທີເຄື່ອນໄຫວຂອງຕົນໃຫ້ສອດຄ່ອງກັບສະພາບໃນຊຸມປີຕໍ່ໜ້າ; ຍົກລະດັບໃນດ້ານຕ່າງໆຕິດພັນກັບການຝຶກຝົນຫໍ່ຫຼອມຄຸນທາດການເມືອງ; ມີນໍ້າໃຈເສຍສະຫຼະເພື່ອຜົນປະໂຫຍດຂອງຊາດ ແລະ ຂອງປະຊາຊົນ; ຫັນຄວາມເປັນໜຸ່ມເຂົ້າໃນການປະຕິບັັດແຜນກໍ່ສ້າງພະນັກງານສືບທອດປ່ຽນແທນຢ່າງເໝາະສົມ.

ໂອກາດນີ້, ລັດ​ຖະ​ມົນ​ຕີ​ກະ​ຊວງພະ​ລັງ​ງານ ແລະ ບໍ່​ແຮ່ ກໍ່ໄດ້​ຕາງ​ໜ້າ​ໃຫ້​ຄະ​ນະ​ພັກ, ຄະ​ນະ​ນຳ​ກະ​ຊວງມີ​ຄຳ​ເຫັນ​ໂອ້​ລົມ​ຕໍ່​ກອງ​ປະ​ຊຸມ ເຊິ່ງທ່ານໄດ້​ຕີ​ລາ​ຄ່າ​ສູງ​ຕໍ​ຜົນ​ງານ​ທີ່ຄະ​ນະ​ບໍ​ລິ​ຫານ​ງານ ຊ​ປ​ປ​ລ ກະ​ຊວງ ຍາດ​ມາ​ໄດ້​ຕະຫຼອດ​ໄລ​ຍະ 5 ປີ​ຜ່ານ​ມາ ເວົ້າສະເພາະໃນ​ຂົງ​ເຂດ​ພະ​ລັງ​ງານ ແລະ ບໍ່​ແຮ່ ຊາວ​ໜຸ່ມ​ແມ່ນ​ກ້ອນ​ກຳ​ລັງ​ປະ​ຈັນ​ບານເຮັດ​ໜ້າ​ທີ່​ທີ່​ໜັກ​ໜ່ວງ ແລະ ແບກ​ຮາບ​ພາ​ລະ​ກິດ​ໃນ​ການ​ຈັດ​ຕັ້ງ​ປະ​ຕິ​ບັດ​ແ​ຜ​ນ​ພັດ​ທະ​ນາ​ວຽກ​ງານ​ພະ​ລັງ​ງານ ແລະ ບໍ່​ແຮ່ ດ້ວຍ​ຄວາມ​ຮັບ​ຜິດ​ຊອບ​ສູງ, ເຮັດ​ໃຫ້​ຂະ​ແໜງ​​ພະ​ລັງ​ງານ ແລະ ບໍ່​ແຮ່ ມີ​ຄວາມ​ເຕີບ​ໃຫຍ່​ເຂັ້ມ​ແຂງ ແລະ ກາຍ​ເປັນ​ຂະ​ແໜງ​ການ​ທີ່​ໄຂ​ຊ່ອງ​ທາງ​ໃຫ້​ເສດ​ຖະ​ກິດ​ລວມ​ຂອງ​ປະ​ເທດ​ໄດ້​ຮັບ​ການ​ພັດ​ທະ​ນາ​ຢ່າງບໍ່​ຢຸດຢັ້ງ.

ສະນັ້ນ, ເພື່ອ​ບັນ​ລຸ​ເປົ້າ​ໝາຍ​ດັ່ງ​ກ່າວ ທ່ານ ປອ. ຄຳ​ມະ​ນີ ອິນ​ທິ​ລາດ ໄດ້ຊີ້​ນຳ​ໃຫ້​ຊາວ​ໜຸ່ມ​ເອົາ​ໃຈ​ໃສ່ 5 ບັນ​ຫາ​ດັ່ງ​ນີ້ ບັນຫາທີໜຶ່ງ: ສະເໜີໃຫ້ຜູ້ແທນຊາວໜຸ່ມຈົ່ງໄດ້ຕັ້ງໜ້າ ແລະ ຍົກສູງຄວາມຮັບ ຜິດຊອບໃນການຄົ້ນຄວ້າ ແລະ ປະກອບຄຳເຫັນ ເພື່ອພ້ອມກັນສຸມໃສ່ເພື່ອຕີລາຄາດ້ານດີ, ຜົນສໍາເລັດງານທີ່ພົ້ນເດັ່ນ, ຜົນງານໃໝ່ ແລະ ອັນທີ່ເປັນຕົວແບບຢູ່ໃນຂະບວນການເຄື່ອນໄຫວຂອງຄະນະຊາວໜຸ່ມຢູ່ໃນທົ່ວກະຊວງພວກເຮົາ. ສ້າງກົນໄກ ແລະ ກໍານົດມາດຕະການເຄື່ອນໄຫວໃໝ່ທີ່ສອດຄ່ອງ, ມີຫຼາຍຮູບຫຼາຍສີ, ມີບັນຍາກາດ ແລະ ເຮັດໃຫ້ມີການຫັນປ່ຽນທີ່ຕັ້ງໜ້າ.

ບັນຫາທີສອງ: ຄະນະຊາວໜຸ່ມແຕ່ລະຂັ້ນຕ້ອງໄດ້ຕັ້ງໜ້າປັບປຸງການຈັດຕັ້ງ, ປັບປຸງແບບແຜນວິທີເຄື່ອນໄຫວຂອງຕົນໃຫ້ສອດຄ່ອງກັບສະພາບ ແລະ ຄວາມຮຽກຮ້ອງຕ້ອງການໃນຊຸມປີຕໍ່ໜ້າ ຊຶ່ງການປັບປຸງແນວໃດກໍຕ້ອງໃຫ້ສອດຄ່ອງກັບກົດໝາຍວ່າດ້ວຍຄະນະຊາວໜຸ່ມ ແລະ ສອດຄ່ອງກັບທີ່ຕັ້ງຂອງຕົນ ເພື່ອຈະຮັບປະກັນໃຫ້ຄະນະຊາວໜຸ່ມປະຕິບັດພາລະບົດບາດ ແລະ ໜ້າທີ່ຂອງຕົນໄດ້ຢ່າງຖືກຕ້ອງໃນການປະຕິບັດໜ້າທີ່ການເມືອງທີ່ໄດ້ຮັບມອບໝາຍດ້ວຍຄຸນນະພາບທີ່ສູງຂຶ້ນ ແລະ ມີບັນຍາກາດທີ່ດີ.

ບັນຫາທີສາມ : ປັດຈຸບັນແມ່ນຍຸກສະໄໝຂອງການພັດທະນາ ແລະ ຂະຫຍາຍຕົວທາງດ້ານວິທະຍາສາດເຕັກນິກ ແລະ ເຕັກໂນໂລຊີ ໄດ້ເລັ່ງທວງໃຫ້ຊາວໜຸ່ມເຮົາຕ້ອງມີລະດັບທາງດ້ານການສຶກສາ, ວິຊາການ ແລະ ພາສາຕ່າງປະເທດທີ່ນັບມື້ນັບສູງ ເພື່ອໃຫ້ກາຍເປັນກຳລັງແຮງງານທີ່ມີລະດັບ, ມີສີມືດີ, ເປັນນັກຄຸ້ມຄອງ-ນັກບໍລິຫານທີ່ເກັ່ງ, ຊໍານິຊຳນານ ແລະ ເປັນກຳລັງນຳໜ້າໃນທຸກວຽກງານ.

ບັນຫາທີສີ່ : ສະມາຊິກຊາວໜຸ່ມຍາມໃດກໍຕ້ອງຍົກສູງຄວາມເປັນເຈົ້າການໃນການຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ ເຊິ່ງຕ້ອງສະແດງອອກໃນການດຳລົງຊີວິດທີ່ກ້າວໜ້າ, ຈົບງາມ ແລະ ສີວິໄລ; ຄວາມມີສະຕິຕໍ່ການຈັດຕັ້ງ, ເຄົາລົບກົດໝາຍ, ມີລະບຽບວິໄນທີ່ເຂັ້ມງວດ, ມີຄວາມສັດຊື່ບໍ່ລິສຸດ, ມີນໍ້າໃຈເສຍສະຫຼະຕໍ່ຜົນປະໂຫຍດຂອງຊາດ ມີຄວາມສາມັກຄີທີ່ໜັກແໜ້ນ ແລະ ມີຄວາມຮັບຜິດຊອບຕໍ່ໜ້າທີ່ວຽກງານທີ່ໄດ້ຮັບມອບໝາຍ.

ບັນຫາທີຫ້າ : ບັນດາໜ່ວຍພັກອົງການລັດເປັນຕົ້ນ: ບັນດາກົມ, ຫ້ອງການ, ສະຖາບັນ, ລັດວິສາຫະກິດ ແລະ ຫົວໜ່ວຍວຽກງານອື່ນໆຕ້ອງໄດ້ເພີ່ມທະວີການຊີ້ນຳ-ນໍາພາໃຫ້ການຊ່ວຍເຫຼືອ, ສ້າງເງື່ອນໄຂ, ສິ່ງອໍານວຍຄວາມສະດວກ ເພື່ອສົ່ງເສີມໃຫ້ການພັດທະນາຄະນະຊາວໜຸ່ມ ແລະ ໄວໜຸ່ມເພື່ອກ້າວຂຶ້ນ. ພ້ອມດຽວກັນນີ້, ກໍສະເໜີໃຫ້ສະຫະພັນແມ່ຍິງ, ສະຫະພັນກຳມະບານ ຈົ່ງໃຫ້ການສະໜັບສະໜູນ, ປະສານສົມທົບຊ່ວຍເຫຼືອ ເພື່ອໃຫ້ຂະບວນການເຄື່ອນໄຫວຂອງຊາວໜຸ່ມມີຊີວິດຊີວາ ແລະ ມີຄຸນນະພາບສູງຂຶ້ນ.

(ເນື້ອໃນ-ພາບ: ຄຳ​ແສງ ແກ້ວ​ປະ​ເສີດ)