ຮອງນາຍົກ ເນັ້ນໃຫ້ກົມສ່ວຍສາອາກອນ ເອົາໃຈໃສ່ປະຕິບັດລາຍຮັບເພີ່ມຂຶ້ນ

705

ກົມສ່ວຍສາອາກອນ ກະຊວງການເງິນ ໄດ້ເປີດກອງປະຊຸມໃຫ່ຍ IV ຂອງຕົນຂຶ້ນ ເພື່ອຜ່ານບົດລາຍງານການເມືອງ ແລະ ບົດສໍາຫຼວດການນໍາພາລວມ ຂອງຄະນະພັກຮາກຖານກົມສ່ວຍສາອາກອນ; ໄດ້ສະຫຼຸບສັງລວມຕີລາຄາການຈັດຕັ້ງປະຕິບັດວຽກງານສ່ວຍສາອາກອນໃນໄລຍະຜ່ານມາ ໂດຍຍົກໃຫ້ເຫັນສະພາບການຕົວຈິງ. ຂະນະດຽວກັນ, ກໍ່ໄດ້ກໍານົດທິດທາງລວມ ແລະ ໜ້າວຽກຕົ້ນຕໍຂອງຕົນໃນ 5 ປີຕໍ່ໜ້າໄວ້ຢ່າງຊັດເຈນ. ດ້ານຮອງນາຍົກ ເນັ້ນໃຫ້ເອົາໃຈໃສ່ຫຼາຍບັນຫາ ໂດຍສະເພາະແມ່ນການຈັດເກັບລາຍຮັບໃຫ້ໄດ້ຕາມແຜນການ.   ສະຫາຍ ປອ. ພູທະນູເພັດ ໄຊສົມບັນ ເລຂາຄະນະພັກຮາກຖານກົມສ່ວຍສາອາກອນ ໄດ້ລາຍງານຜົນການຈັດຕັ້ງປະຕິບັດວຽກງານໃນໄລຍະຜ່ານ ແລະ ທິດທາງໃນຕໍ່ໜ້າ ວ່າ: ແຕ່ນີ້ຮອດປີ 2025 ຕ້ອງເລັ່ງໃສ່ເປົ້າໝາຍກໍ່ສ້າງມະຫາຊົນຜູ້ກ້າວໜ້າເພື່ອຂະຫຍາຍສະມາຊິກພັກໃຫ້ໄດ້ຈໍານວນ 20 ສະຫາຍ ແລະ ສ້າງສະມາຊິກພັກແຂງໃຫ້ໄດ້ 90% ຂອງສະມາຊິກພັກທັງໝົດ; ບໍ່ໃຫ້ມີສະມາຊິກພັກອ່ອນ ຫຼື ຖຶກວິໄນ, ຮັບປະກັນການຄຸ້ມຄອງລາຍຮັບສ່ວຍສາອາກອນໃຫ້ມີທ່າອ່ຽງເພີ່ມຂຶ້ນໃນແຕ່ລະປີ 8-10% ທຽບໃສ່ປີຜ່ານມາ ແລະ ທຽບໃສ່ການຂະຫຍາຍຕົວຂອງເສດຖະກິດສະເລ່ຍ 5 ປີໃຫ້ໄດ້ລະຫວ່າງ 7-8% ຂອງ GDP.

ຄຽງຄູ່ກັນນັ້ນ, ສືບຕໍ່ຫັນຫົວໜ່ວຍທຸລະກິດທີ່ບໍ່ແມ່ນຈຸນລະວິສາຫະກິດເຂົ້າລະບົບອາກອນມູນຄ່າເພີ່ມຕາມກົດໝາຍກໍານົດໃຫ້ເພີ່ມຂຶ້ນສະເລ່ຍ 5 ປີ ໃຫ້ໄດ້ 30% ຂອງຖານຫົວໜ່ວຍທຸລະກິດທັງໝົດ; ສູ້ຊົນສ້າງ ແລະ ປັບປຸງກົດໝາຍ ແລະ ນິຕິກໍາໃຕ້ກົດໝາຍ, ກົນໄກການຄຸ້ມຄອງ ແລະ ບໍລິການຜູ້ເສຍອາ ກອນໃຫ້ມີປະສິດທິຜົນ; ເຂົ້າຮ່ວມໃນການສ້າງກົດໝາຍວ່າດ້ວຍອາກອນຊັບສິນ ແລະ ທີ່ດິນ; ກົດໝາຍ ວ່າດ້ວຍອາກອນສິ່ງແວດລ້ອມໃຫ້ສໍາເລັດ; ຫັນການຄຸ້ມຄອງສ່ວຍສາອາກອນໃຫ້ໄປສູ່ລະບົບທັັນສະໄໝໃຫ້ສໍາເລັດຂັ້ນພື້ນຖານ ເຊິ່ງລວມມີການຂະຫຍາຍລະບົບ TaxRIS ໄປສູ່ບັນດາເມືອງໃນຂອບເຂດທົ່ວປະ ເທດ ກ້າວໄປເຖິງຫັນການຊໍາລະອາກອນທຸກປະເພດຜ່ານລະບົບດິຈີຕອລຫຼາຍຂຶ້ນ.

ໃນກອງປະຊຸມ, ຄະນະຜູ້ແທນໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະພັກຮາກຖານກົມສ່ວຍສາອາກອນຊຸດໃໝ່ບົນພື້ນຖານຫຼັກການລວມສູນປະຊາທິປະໄຕ ເຊິ່ງມີສະໝັກຮັບລົງເລືອກຕັ້ງຈໍານວນ 7 ສະຫາຍ, ຍິງ 1 ສະຫາຍ ແລະ ເລືອກໄດ້ 5 ສະຫາຍຄື: ສະຫາຍ ປອ. ພູທະນູເພັດ ໄຊສົມບັດ ເປັນເລຂາຄະນະພັກຮາກຖານ, ສະຫາຍ ທໍາມະລົດ ລາດຊະພົນ ເປັນຮອງເລຂາຄະນະພັກຮາກຖານ, ສະຫາຍ ສຸພັນ ວິລະວົງ ເປັນກໍາມະການ ທັງເປັນປະທານກວດກາຄະນະພັກຮາກຖານ,ສະຫາຍ ໄພທູນ ທ່ຽງລະໄມ, ສະຫາຍ ວິເລດ ກິນນະວົງ ເປັນກໍາມະການ.

ໃນຕອນທ້າຍ, ສະຫາຍ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ກໍ່ໄດ້ໃຫ້ກຽດໂອ້ລົມຕໍ່ກອງປະຊຸມ ແລະ ໄດ້ສະແດງຄວາມຊົມເຊີຍຕໍ່ການຊີ້ນໍາ-ນໍາພາຂອງຄະນະພັກຊຸດເກົ່າທີ່ໄດ້ຊີ້ນໍາ-ນໍາພາພະນັກງານ, ສະມາຊິກພັກພາຍໃນຄະນະພັກທີ່ປະຕິບັດໜ້າທີ່ການເມືອງຂອງຕົນຍາດໄດ້ຜົນງານ ແລະ ມີຜົນສໍາເລັດຫຼາຍດ້ານ. ພ້ອມນັ້ນ, ທ່ານຍັງໄດ້ສະແດງຄວາມເປັນຫ່ວງເປັນໃຍຕໍ່ດ້ານດີດ້ານອ່ອນ, ຂໍ້ຄົງຄ້າງໃນການຊີ້ນໍາ-ນໍາພາໃນໄລຍະຜ່ານມາ ແລະ ເນັ້ນໃຫ້ຄະນະພັກຊຸດໃໝ່ສືບຕໍ່ນໍາພາປັບປຸງແກ້ໄຂຈຸດອ່ອນ ແລະ ເນັ້ນໜັກບາງວຽກງານຕົ້ນຕໍທີ່ຕ້ອງເອົາໃຈໃສ່ເປັນຕົ້ນ: ເອົາໃຈ ໃສ່ປະເມີນຕີລາຄາຜົນໄດ້ຮັບກໍ່ຄືຜົນສໍາເລັດອີງໃສ່ແຜນ, ຄາດໝາຍຕາມຄວາມຮັບຜິດຊອບທີ່ໄດ້ຮັບມອບໝາຍ, ການປະຕິບັດໜ້າທີ່ວຽກງານວິຊາສະເພາະຕ້ອງມີແບບແຜນກນປະຕິບັດວຽກງານ ແລະ ຜັນຂະຫຍາຍໄປແຕ່ລະປີ.

ສິ່ງສໍາຄັນແມ່ນປະຕິບັດຕາມຄາດໝາຍສູ້ຊົນໃຫ້ໄດ້, ປັບປຸງກົດໝາຍ, ນິຕິກໍາ ເພື່ອໃຫ້ລາຍຮັບເພີ່ມຂຶ້ນຈໍາກັດການຮົ່ວໄຫຼ ແລະ ເກັບກໍາບໍ່ໝົດ, ອໍານວຍຄວາມສະດວກໃຫ້ທຸລະກິດໃນການເຄື່ອນໄຫວມີເງື່ອນໄຂພັດທະນາ ເພື່ອເປັນພື້ນ ຖານລາຍຮັບ ແລະ ມີນັກລົງທຶນທີ່ຫຼາຍຂຶ້ນ ທັງສ້າງຄວາມເຂົ້າໃຈກັບຜູ້ປະກອບການໃຫ້ມີຄວາມເຂົ້າໃຈຫຼາຍຂຶ້ນໃນການຊໍາລະພັນທະອາກອນຢ່າງຈະແຈ້ງ ແລະ ປະຕິບັດຕາມລະບຽບກົດໝາຍ.

ພິທີດັ່ງກ່າວ, ຈັດຂຶ້ນໃນວັນທີ 7 ສິງຫາ 2020 ທີ່ຫ້ອງປະຊຸມກົມສ່ວຍສາອາກອນ ໂດຍການເຂົ້າຮ່ວມຂອງສະຫາຍ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ສະຫາຍ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ສະຫາຍ ປອ. ພູທະນູເພັດ ໄຊສົມບັດ ເລຂາຄະນະພັກຮາກຖານກົມສ່ວຍສາອາກອນ, ມີບັນດາໜ່ວຍພັກອ້ອມຂ້ອງກະຊວງການເງິນ ພ້ອມດ້ວຍສະມາຊິກພັກສົມບູນ-ສໍາຮອງຂອງກົມສ່ວຍສາອາກອນເຂົ້າຮ່ວມ.

(ເນື້ອໃນ-ພາບ: ອາພັດສະລາ)