JDB ເຊັນສັນຍາກັບສະຖາບັນການເງິນເພັດອຸໄລ ນໍາໃຊ້ຜະລິດຕະພັນບັດ Co-Brand

413

ທະນາຄານຮ່ວມພັດທະນາ ຫຼື (JDB) ໄດ້ເຊັນສັນຍາ ວ່າດ້ວຍການຮ່ວມມືທາງດ້ານທຸລະກິດ ກັບ ສະຖາບັນການເງິນຈຸລະພາກ ເພັດອຸໄລ ຈໍາກັດ ເຊິ່ງທັງສອງຝ່າຍໄດ້ຕົກລົງເຫັນດີເປັນເອກະພາບໃນການອອກຜະລິດຕະພັນບັດຮ່ວມ ກັນ ຄືບັດ Co-Brand ເພື່ອອໍານວຍຄວາມສະດວກໃຫ້ກັບລູກຄ້າຂອງສະຖາບັນການເງິນຈຸລະພາກ ເພັດອຸໄລ ຈໍາກັດ ບົນພື້ນຖານການຮ່ວມມືທາງທຸລະກິດຕ່າງຝ່າຍຕ່າງມີຜົນປະໂຫຍດ.    ໃນພິທີ, ທ່ານ ສາຄອນ ຍໍພັນໄຊ ຮອງຜູ້ອໍານວຍການໃຫຍ່ ທະນາຄານຮ່ວມພັດທະນາ ໄດ້ປະກອບຄໍາເຫັນບາງຕອນວ່າ: ມີຄວາມຮູ້ສຶກເປັນກຽດເປັນຢ່າງຍິ່ງ ທີ່ໄດ້ຮ່ວມມືກັບສະຖາບັນການເງິນຈຸລະພາກ ເພັດອຸໄລ ຖືວ່າເປັນຄູ່ຮ່ວມທຸລະກິດກັນມາໄດ້ໄລຍະໜຶ່ງແລ້ວ; ເຊິ່ງໂຄງການຮ່ວມມືລະຫວ່າງສອງພາກສ່ວນ ຈະໄດ້ຮ່ວມກັນອອກຜະລິດຕະພັນບັດ Co-Band ເຊິ່ງເປັນບັດ ATM ຂອງ JDB ໃຫ້ກັບລູກຄ້າຂອງສະຖາບັນການເງິນຈຸລະພາກ ເພັດອຸໄລ ເພື່ອເພີ່ມຄວາມສະດວກສະບາຍສາມາດຖອນເງິນ ໃນຕູ້ ATM ຂອງທະນາຄານຮ່ວມພັດທະນາ ແລະ ທະນາຄານອື່ນໆ ໃນ ສປປ ລາວ ທີ່ເຂົ້າຮ່ວມໂຄງການໃນປັດຈຸບັນ ແລະ ຍັງຈະໄດ້ຮັບສິດທິພິເສດ ລວມທັງເງື່ອນໄຂຫຼາຍຢ່າງທີ່ທາງທະນາຄານຮ່ວມພັດທະນາ ຈັດໂປໂມຊັ່ນເປັນແຕ່ລະໄລຍະ.

ປັດຈຸບັນ, ທະນາຄານຮ່ວມພັດທະນາ ໄດ້ຮ່ວມມືກັບຫຼາຍອົງກອນ ແລະ ຫຼາຍບໍລິສັດ ເພື່ອບໍລິການດ້ານການເງິນທີ່ຄົບວົງຈອນແກ່ກັບລູກຄ້າທຸກລະດັບຢ່າງເທົ່າທຽມກັນ ໂດຍປະຕິບັດນະໂບຍາຍຕ່າງຝ່າຍມີຜົນປະໂຫຍດ ຕາມຄໍາຂັວນທີ່ວ່າ: “ເຕີບໃຫຍ່ໄປພ້ອມກັນ“.

ໂອກາດນີ້, ທ່ານ ຈັນທາ ມິ່ງບຸບຜາ ຜູ້ອໍານວຍການໃຫຍ່ ສະຖາບັນການເງິນຈຸລະພາກ ເພັດອຸໄລ ກ່າວຕື່ມວ່າ: ຮູ້ສຶກພາກພູມໃຈທີ່ໄດ້ຮ່ວມມືກັບທະນາຄານຮ່ວມພັດທະນາ ໃນການສ້າງພະລິດຕະພັນບັດ ATM Co-Brand ເຊິ່ງຈະຊ່ວຍໃຫ້ເວລາລູກຄ້າມີຄວາມຕ້ອງການທືນຮອນ ກໍ່ສາມາດຕອບສະໜອງໄດ້ຕາມເງື່ອນໄຂຂອງທະນາຄານ ຖືວ່າເປັນການອໍານວຍຄວາມສະດວກໃຫ້ລູກຄ້າ ສາມາດເຂົ້າເຖີງແຫຼ່ງທຶນທີ່ໝັ້ນຄົງ ແລະ ສືບຕໍ່ພັດທະນາໃຫ້ດີທີ່ສຸດ ເພື່ອເຮັດໃຫ້ບັດຂອງພວກເຮົາເປັນທີ່ນິຍົມຢູ່ໃນສັງຄົມ.

ພິທີດັ່ງກ່າວ, ຈັດຂຶ້ນໃນວັນທີ 12 ສິງຫາ 2020 ຜ່ານມາ, ທີ່ສໍານັກງານໃຫຍ່ທະນາຄານຮ່ວມພັດທະນາ ເປັນການລົງນາມຮ່ວມກັນຂອງ ທ່ານ ສາຄອນ ຍໍພັນໄຊ ຮອງຜູ້ອໍານວຍການໃຫຍ່ທະນາຄານຮ່ວມພັດທະນາ ກັບທ່ານ ຈັນທາ ມິ່ງບຸບຜາ ຜູ້ອໍານວຍການໃຫຍ່ ສະຖາບັນການເງິນຈຸລະພາກ ເພັດອຸໄລ ຈໍາກັດ. ໂດຍໃຫ້ກຽດເຂົ້າຮ່ວມຂອງທ່ານ ສູນທອນ ຈັນທະວົງ ຮອງປະທານສະພາບໍລິຫານ ທະນາຄານຮ່ວມພັດທະນາ, ທ່ານ ເພັດ ວົງຂັນຕິ ປະທານກຸ່ມບໍລິສັດ ເພັດໄລພອນ ກຣຸບ, ມີບັນດາຄະນະອໍານວຍການ ແລະ ຄະນະຜູ້ບໍລິຫານທັງສອງຝ່າຍກໍ່ໄດ້ເຂົ້າຮ່ວມຢ່າງພ້ອມພຽງ.

(ເນື້ອໃນ-ພາບ: ຄໍາຕົ້ນ ວໍລະຈັກ)