ສືບຕໍ່ເຝົ້າລະວັງ ແລະ ປ້ອງກັນພະຍາດໂຄວິດ – 19 ໃຫ້ເຂັ້ມງວດ

696

ຄະນະສະເພາະກິດໄດ້ກວດຫາເຊື້ອໂຄວິດ – 19 ໃນວັນທີ 11 ສິງຫາຜ່ານມາ 240 ຄົນ ຜົນກວດບໍ່ພົບຜູ້ຕິດເຊື້ອ. ນອກນັ້ນຍັງໄດ້ຕິດຕາມຜູ້ເດີນທາງເຂົ້າ ສປປ ລາວ ເຊິ່ງໄດ້ກວດວັດແທກອຸນຫະພູມບໍ່ພົບຜູ້ມີອາການເປັນໄຂ້ ພ້ອມໄດ້ສົ່ງໄປສູນຈຳກັດບໍລິເວນ.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຖະແຫຼງຂ່າວປະຈຳວັນທີ 12 ສິງຫາ ວ່າ: ໃນວັນທີ 11 ສິງຫາ 2020 ມີຜູ້ເດີນທາງເຂົ້າມາປະເທດເຮົາທັງໝົດ 2.256 ຄົນ. ໃນນັ້ນ, ຜ່ານດ່ານລາວ – ໄທ 1.478 ຄົນ ( ແຮງງານລາວກັບມາແຕ່ໄທ 177 ຄົນ ), ຜ່ານດ່ານລາວ – ຈີນ 13 ຄົນ ທັງໝົດແມ່ນຄົນຂັບລົດສົ່ງສິນຄ້າ, ຈຸດຜ່ານດ່ານລາວ – ຫວຽດນາມ 760 ຄົນ, ໃນນີ້ແຮງງານຫວຽດນາມ 2 ຄົນ ຜ່ານດ່ານນໍ້າພາວ ແຂວງບໍລິຄໍາໄຊ, ເຫຼືອນັ້ນແມ່ນຄົນຂັບລົດສົ່ງສິນຄ້າ ແລະ ຜູ້ຕິດຕາມ, ຜ່ານດ່ານ ລາວ – ກຳປູເຈຍ 5 ຄົນ ທັງໝົດແມ່ນນັກສຶກສາລາວ ເຊິ່ງທຸກຄົນແມ່ນໄດ້ແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ( ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ. ປັດຈຸບັນທົ່ວປະເທດ ມີສູນຈໍາກັດບໍລິເວນທີ່ຍັງເປີດຢູ່ທັງໝົດ 53 ສູນ, ມີຜູ້ຖືກຈຳກັດບໍລິເວນຢູ່ສູນ 3.878 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ.

ທ່ານ ດຣ. ສີສະຫວາດ ສຸດທານີລະໄຊ ກ່າວຕື່ມອີກວ່າ: ດ້ານການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 11 ສິງຫາຜ່ານມາ ໄດ້ເກັບຕົວຢ່າງມາກວດວິເຄາະທັງໝົດ 240 ຄົນ, ໃນນັ້ນແຮງງານລາວມາແຕ່ ໄທ 197 ຕົວຢ່າງ, ແຮງງານຫວຽດນາມ 5 ຄົນ, ແຮງງານຈີນ 17 ຕົວຢ່າງ, ບຸກຄົນທົ່ວໄປທີ່ມີອາການ 1 ຕົວຢ່າງ ແລະ ບຸກຄົນທົ່ວໄປທີ່ບໍ່ມີອາການ 20 ຕົວຢ່າງ. ຜົນກວດວິເຄາະທັງໝົດແມ່ນບໍ່ພົບເຊື້ອໃໝ່, ສັງລວມການກວດວິເຄາະແຕ່ເດືອນມັງກອນ ຮອດວັນທີ 11 ສິງຫາ 2020 ໄດ້ເກັບຕົວຢ່າງມາກວດທັງໝົດ 32.114 ຕົວຢ່າງ, ກວດພົບເຊື້ອສະສົມ 20 ຄົນ.

ສຳລັບສະຖານະການທົ່ວໂລກມາຮອດວັນທີ 12 ສິງຫາ 2020 ທົ່ວໂລກມີ 213 ປະເທດ/ເຂດ, ມີການຢັ້ງຢືນຜູ້ຕິດເຊື້ອພະຍາດໂຄວິດ – 19 ແລ້ວ 20.490.771 ຄົນ, ເສຍຊີວິດ 744.048 ຄົນ ເຊິ່ງກວມເອົາ 3,63% ຂອງຜູ້ຕິດເຊື້ອ, ປີ່ນປົວຫາຍດີ 13.406.461 ຄົນ ກວມເອົາ 65,4% ຂອງຜູ້ຕິດເຊື້ອທັງໝົດ. ໃນຂະນະທີ່ຢູ່ຂົງເຂດອາຊີ ກໍແມ່ນປະເທດອິນເດຍ ທີ່ມີທ່າອ່ຽງໃນການຕິດເຊື້ອໂຄວິດ – 19 ເພີ່ມຂຶ້ນ ເຊິ່ງມີຈຳນວນຜູ້ຕິດເຊື້ອມື້ດຽວສູງເຖິງ 61,252 ຄົນ ແລະ ໃນບັນດາກຸ່ມປະເທດອາຊຽນ ມາຮອດວັນທີ 12 ສິງຫາ ມີການຢັ້ງຢືນຜູ້ຕິດເຊື້ອແລ້ວ 337.772 ຄົນ ແລະ ເສຍຊີວິດ 8.371 ຄົນ.

ອີງໃສ່ສະພາບການຂອງໂລກມີຫຼາຍປະເທດຍັງມີການລະບາດເປັນວົງກວ້າງ, ມີຜູ້ຕິດເຊື້ອ ແລະ ເສຍຊີວິດປະຈຳວັນ ເປັນຈຳນວນຫຼາຍຂໍໃຫ້ພໍ່ແມ່ປະຊາຊົນຈົ່ງພ້ອມກັນປ້ອງກັນຕົນເອງ, ປ້ອງກັນຄອບຄົວ ແລະ ຜູ້ທີ່ຮັກ, ສືບຕໍ່ປະຕິບັດມາດຕະການປ້ອງກັນການຕິດເຊື້ອຢ່າງເຂັ້ມງວດໃຫ້ຖືວ່າແມ່ນພັນທະ, ຄວາມຮັບຜິດຂອງບັນດາທ່ານ ແລະ ເປັນການປະກອບສ່ວນອັນສຳຄັນໃຫ້ແກ່ປະເທດຊາດ.