ລັດອະນຸຍາດໃຫ້ເອກະຊົນ ເຊົ່າ-ສໍາປະທານເນື້ອທີ່ດິນ ເພື່ອປະກອບກິດຈະການ.

408

ພະແນກການເງິນແຂວງຜົ້ງສາລີ ໄດ້ຈັດພິທີເຊັນສັນຍາໂຄງການເຊົ່າ–ສຳປະທານທີ່ດິນຂອງລັດໃນຂອບເຂດເມືອງຜົ້ງສາລີ ແຂວງຜົ້ງສາລີ ລະຫວ່າງພະແນກການເງິນແຂວງກັບບັນດາຫົວໜ່ວຍທຸລະກິດ ປະກອບມີ: ຕົວແທນຮ້ານຂາຍຢາປົວພະຍາດ ແລະ ຫົວອາຫານສັດ; ເຈົ້າຂອງສາງເກັບມ້ຽນຖ່ານຫີນຂອງບໍລິສັດລາວເອີ ລາວເຕົາ ແລະ ບໍລິສັດ ລາວໂທລະຄົມມະນາຄົມມະຫາຊົນ (ເສົາສັນຍານໂທລະສັບ).

 ໂອກາດນີ້, ທ່ານ ບຸນເລີດ ແກ້ວອິນດາປີງ ຮອງຫົວໜ້າພະແນກການເງິນແຂວງຜົ້ງສາລີ ໄດ້ມີຄຳເຫັນໃຫ້ແຕ່ລະພາກສ່ວນ ສືບຕໍ່ເອົາໃຈໃສ່ດ້ານເນື້ອໃນສັນຍາປະຕິບັດໃຫ້ຖືກຕ້ອງ, ຮັດກຸມ ແລະ ສອດ ຄ່ອງທາງດ້ານກົດໝາຍ. ຂະນະດຽວກັນ, ອົງການປົກຄອງເມືອງ ແລະ ພາກສ່ວນທີ່ກ່ຽວຂ້ອງຂັ້ນເມືອງຕ້ອງລົງໃກ້ສິດຕິດແທດ,ຕິດຕາມ, ຊຸກຍູ້ການຈັດຕັ້ງປະຕິບັດເນື້ອໃນສັນຍາໃນແຕ່ລະໄລຍະຢ່າງເປັນປົກກະຕິ, ຂະແໜງຄຸ້ມຄອງຊັບສິນຂອງລັດ, ຫ້ອງການ–ການເງິນເມືອງຕິດຕາມ, ຊຸກຍູ້ການຈັດຕັ້ງປະຕິບັດເນື້ອໃນສັນຍາເປັນຕົ້ນການຈັດຕັ້ງປະຕິບັດບັນດາກິດຈະການຕ່າງໆ.

ພ້ອມນັ້ນ, ບັນດາຫົວໜ່ວຍຜູ້ປະກອບການຕ້ອງປະຕິບັດສິດ ແລະ ພັນທະຂອງຕົນຕໍ່ລັດເປັນຕົ້ນ: ແມ່ນການມອບຄ່າເຊົ່າທີ່ດິນໃນແຕ່ລະປີ ແລະ ຊຳລະຄ່າເຊົ່າທີ່ຍັງຄ້າງມອບໃຫ້ລັດຢ່າງຄົບຖ້ວນ ແລະ ທັນຕາມກຳນົດເວລາ. ໃຫ້ກຽດເຂົ້າຮ່ວມຂອງທ່ານ ບຸນເລີດ ແກ້ວອິນດາປີງ ຮອງຫົວໜ້າພະແນກການເງິນແຂວງຜົ້ງສາລີ ແລະ ບັນດາທ່ານຜູ້ຕາງໜ້າຈາກ 3 ຫົວໜ່າຍທຸລະກິດ ແລະ ພະແນກການກ່ຽວຂ້ອງເຂົ້າຮ່ວມ. ພິທີດັ່ງກ່າວຈັດຂຶ້ນໃນທ້າຍເດືອນກໍລະກົດຜ່ານມາ ທີ່ພະແນກການເງິນແຂວງຜົ້ງສາລີ.

(ເນື້ອໃນ-ພາບ: ຈິນຕະນາ ສີພູວົງ)