ໂຄງການນ້ອງຢາກເປັນນັກວິທະຍາສາດ ຈະເຮັດໃຫ້ຮູ້ນໍາໃຊ້ເຕັກໂນໂລຊີດິຈິຕ໋ອລຫຼາຍຂຶ້ນ.

605

ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດກິດຈະກຳ “ໂຄງການນ້ອງຢາກເປັນນັກວິທະຍາສາດ” ທີ່ຫ້ອງວ່າການແຂວງສະຫວັນນະເຂດ ຊຶ່ງມີນ້ອງນ້ອຍຊາວໜຸ່ມ-ເຍົາວະຊົນຈາກຊັ້ນມັດທະຍົມຢູ່ນະຄອນໄກສອນພົມວິຫານ. ຈຸດປະສົງແມ່ນເພື່ອເປັນການໂຄສະນາເຜີຍແຜ່, ປູກຈິດສໍານຶກ ແລະ ຊຸກຍູ້ສົ່ງເສີມແນວຄິດຈິນຕະນາການໃຫ້ແກ່ຊາວໜຸ່ມ-ເຍົາວະຊົນທາງດ້ານວຽກງານວິທະຍາສາດ ແລະ ເຕັກໂນໂລຊີ ແນໃສ່ສ້າງຄວາມເຂົ້າໃຈກ່ຽວກັບວຽກງານດັ່ງກ່າວ ເພື່ອໃຫ້ເຂົາເຈົ້າມີຄວາມໄຝ່ຝັນທີ່ຈະເປັນນັກວິທະຍາສາດໃນອະນາຄົດ.

“ໂຄງການນ້ອງຢາກເປັນນັກວິທະຍາສາດ” ແມ່ນຈັດຕັ້ງປະຕິບັດໂດຍຫ້ອງການກະຊວງວິທະຍາສາດ ແລະ ເຕັກໂນໂລຊີ (ພະແນກຂ່າວສານ ແລະ ປະຊາສໍາພັນ) ໂດຍສົມທົບກັບຄະນະບໍລິຫານງານຊາວໜຸ່ມ ປປລ ກວຕ ແລະ ບັນດາກົມ, ສະຖາບັນພາຍໃນກະຊວງ ທີ່ໄດ້ຮວບຮວມເອົາຜົນງານການຄົ້ນຄວ້າ, ວິໄຈ ແລະ ສາລະໜ້າຮູ້ທີ່ຕິດພັນກັບວຽກງານວິທະຍາສາດ ແລະ ເຕັກໂນໂລຊີ ເຊັ່ນ:

ລະບົບນິເວດວິທະຍາ ແລະ ການທົດລອງສາທິດການສ້າງຫົວເຊື້ອຈຸລິນຊີ; ວຽກງານດາລາສາດ (ຮຽນຮູ້ລະບົບສຸລິຍະຈັກກະວານ ແລະ ສ້າງແບບຈໍາລອງດາວເຄາະ), ການທົດລອງ-ສາທິດການເກີດປະຕິກິລິຍາທາງເຄມີ, ຂໍ້ດີຂໍ້ເສຍຂອງການໃຊ້ສື່ສັງຄົມອອນລາຍ ແລະ ການນໍາໃຊ້ປື້ມແບບເອເລັກໂຕຼນິກ (E-Book) ເພື່ອເຜີຍແຜ່ ແລະ ສ້າງກິດຈະກໍາຖາມ-ຕອບ ພ້ອມທັງປະຕິບັດຕົວຈິງຮ່ວມກັບນ້ອງນ້ອຍເຍົາວະຊົນ. ຊຶ່ງຜ່ານການຈັດກິດຈະກໍາໃນຄັ້ງນີ້ ເຫັນໄດ້ວ່ານ້ອງນ້ອຍຊາວໜຸ່ມ-ເຍົາວະຊົນແມ່ນມີຄວາມສົນໃຈຫຼາຍຕໍ່ການນໍາສະເໜີ ແລະ ທົດລອງສາທິດກ່ຽວກັບວິທະຍາສາດ ແລະ ເຕັກໂນໂລຊີ ພ້ອມທັງເຂົ້າຮ່ວມການທົດລອງທາງດ້ານວິທະຍາສາດດ້ວຍບັນຍາກາດຟົດຟື້ນ.

ພິທີດັ່ງກ່າວ, ຈັດຂຶ້ນໃນຕົ້ນເດືອນສິງຫາ 2020 ຜ່ານມາ ໂດຍມີນັກຮຽນຈາກ ມສ ສະຫວັນ, ມສ ໂພນສະຫວັນ, ມສ ອຸດົງວິໄລ ແລະ ອື່ນໆເຂົ້າຮ່ວມຫຼາຍກວ່າ 50 ກວ່າຄົນ. ໂຄງການດັ່ງກ່າວຍັງໄດ້ຮັບກຽດເຂົ້າຢ້ຽມຊົມກິດຈະກໍາຂອງ ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງໆສະຫວັນນະເຂດ, ທ່ານ ພູວົງ ສູ້ຍຍະວົງ ປະທານບໍລິສັດ ແອັດແລນຕິກ ອິນເຕີເນເຊີນແນວກຣູບ ຈຳກັດຜູ້ດຽວ ພ້ອມທັງມອບອຸປະກອນການຮຽນເພື່ອສ້າງແຮງບັນດານໃຈໃຫ້ແກ່ນ້ອງນ້ອຍຊາວໜຸ່ມ-ເຍົາວະຊົນອີກດ້ວຍ.

[ຂ່າວ-ພາບ: ທັດສະນີ ພົງບັນດິດ]