JDB ມອບເງິນ 100 ລ້ານກີບ ຊ່ວຍເຫຼືອປະຊາຊົນທີ່ຖຶກຜົນກະທົບຈາກນໍ້າຖ້ວມໄຊຍະບູລີ

427

ທະນາຄານຮ່ວມພັດທະນາ ຫຼື JDB ໄດ້ຈັດພິທີມອບຮັບ-ເງິນ ຈໍານວນ 100 ລ້ານກີບ ເພື່ອຊ່ວຍເຫຼືອບັນເທົາທຸກໃຫ້ແກ່ປະຊາຊົນແຂວງໄຊຍະບູລີ ທີ່ໄດ້ຮັບຜົນກະທົບຈາກໄພນໍ້າຖ້ວມໃນໄລຍະຜ່ານມາ ໂດຍໃຫ້ກຽດເຂົ້າຮ່ວມຂອງທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາ ແລະ ຄະນະຜູ້ບໍລິຫານທະນາຄານຮ່ວມພັດທະນາ ຕະຫຼອດຮອດວິຊາການທີ່ກ່ຽວຂ້ອງທັງສອງຝ່າຍກໍ່ໄດ້ເຂົ້າຮ່ວມຢ່າງພ້ອມພຽງ.

ໃນພິທີ, ທ່ານ ວິໄລ ສີພະພອນ ຜູ້ອໍານວຍການໃຫຍ່ ທະນາຄານຮ່ວມພັດທະນາ JDB ໄດ້ກ່າວຈຸດປະສົງໃນການຊ່ວຍເຫຼືອໃນຄັ້ງນີ້ ເຊິ່ງແຂວງໄຊຍະບູລີ ແລະ ທະນາຄານຮ່ວມພັດທະນາໄດ້ມີສາຍພົວພັນກັນມາຍາວນານ ຈຶ່ງເຫັນໄດ້ຜົນກະທົບຈາກໄພນໍ້າຖ້ວມ ແລະ ລົມພະຍຸພັດຖະລົ່ມ ເຮັດໃຫ້ໂຮງຮຽນໃນເຂດພູດອຍໄດ້ຮັບຄວາມເສຍຫາຍ.

 ດັ່ງນັ້ນ, ທະນາຄານຮ່ວມພັດທະນາ ຈຶ່ງໄດ້ໃຫ້ການເງິນຊ່ວຍເຫຼືອ 100 ກີບ. ຄຽງຄູ່ກັນນັ້ນ, ຍັງໄດ້ຮັບເງິນຊ່ວຍເຫຼືອຈາກນັ້ນ ທ່ານ ອິນແປງ ອຸທຸມພອນ ປະທານບໍລິສັດພັນທະມິດ ກໍ່ສ້າງ ແລະ ສ້ອມແປງຂົວທາງ ກໍ່ໄດ້ປະກອບສ່ວນໃຫ້ເງິນຊ່ວຍເຫຼືອຕື່ມອີກ 50 ລ້ານກີບ ເພື່ອເປັນການປະກອບສ່ວນຊ່ວຍເຫຼືອສັງຄົມ ໂດຍສະເພາະຜູ້ທີ່ໄດ້ຮັບຜົນກະທົບຢາກໄພນໍ້າຖວມທີ່ແຂວງໄຊຍະບູລີ ລວມມູນຄ່າການຊ່ວຍເຫຼືອຄັ້ງນີ້ 150 ລ້ານກີບ ເຊິ່ງກ່າວຮັບໂດຍ ທ່ານ ເພັດພິໄຊ ສູນວິໄລ ຫົວໜ້າຫ້ອງວ່າການແຂວງໄຊຍະບູລີ.

ໃນຕອນທ້າຍ, ທ່ານ ເພັດພິໄຊ ສູນວິໄລ ຫົວໜ້າຫ້ອງວ່າການແຂວງໄຊຍະບູລີ ກໍ່ໄດ້ສະແດງຄວາມຂອບອົກຂອບໃຈເປັນຢ່າງສູງ ມາຍັງທ່ານ ເອກະພັນ ພະພິທັກ ປະທານສະພາບໍລິຫານທະນາ ຄານຮ່ວມພັດທະນາ ທີ່ມີນໍ້າໃຈປະເສີດທີ່ໄດ້ໃຫ້ຄວາມຊ່ວຍເຫຼືອໃນຄັ້ງນີ້ ເຊິ່ງເປັນພາກສ່ວນທໍາອິດທີ່ໄດ້ໃຫ້ການຊ່ວຍເຫຼືອບັນເທົາທຸກໃຫ້ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມໃນຄັ້ງນີ້ ພ້ອມທັງບໍລິສັດ ພັນທະມິດ ກໍ່ສ້າງ ແລະ ສ້ອມແປງຂົວທາງ ທີ່ໄດ້ປະກອບສ່ວນຊ່ວຍເຫຼືອຕື່ມອີກ. ຫວັງວ່າໃນໂອກາດໜ້າຈະໄດ້ຮັບການຊ່ວຍເຫຼືອຈາກທັງສອງພາກສ່ວນຕື່ມອີກ. ພິທີມອບເງິນຊ່ວຍເຫຼືອຈັດຂຶ້ນໃນວັນທີ 10 ສິງຫາ 2020 ຢູ່ທີ່ສໍານັກງານໃຫຍ່ທະນາຄານຮ່ວມພັດທະນາ.

(ເນື້ອໃນ-ພາບ: ຄໍາຕົ້ນ ວໍລະຈັກ)