ຈົ່ງພ້ອມກັນເປັນເຈົ້າການປ້ອງກັນໂຄວິດ – 19

417

ທົ່ວປະເທດມີສູນຈໍາກັດບໍລິເວນທີ່ຍັງເປີດຢູ່ 53 ສູນ, ມີຜູ້ຖືກຈຳກັດບໍລິເວນ 3.336 ຄົນ. ສຳລັບຜູ້ທີ່ຈະເດີນທາງເຂົ້າ – ອອກ ສປປ ລາວ ແມ່ນໃຫ້ປະຕິບັດຕາມແຈ້ງການຂອງກະຊວງການຕ່າງປະເທດ ສະບັບເລກທີ 1861/ຕປທ.ສພກ ລົງວັນທີ 31 ກໍລະກົດ 2020 ຢ່າງເຂັ້ມງວດ.

ທ່ານ ດຣ. ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຖະແຫຼງຂ່າວປະຈຳວັນທີ 10 ສິງຫາ ວ່າ: ການເຝົ້າລະວັງໂຄວິດ – 19 ຢູ່ ສປປ ລາວ ຮອດເວລາ 17:00 ໂມງ ຂອງວັນທີ 9 ສິງຫາ 2020 ມີຜູ້ເດີນທາງເຂົ້າມາປະເທດທັງໝົດ 1.693 ຄົນ, ໃນນັ້ນຈຸດຜ່ານດ່ານລາວ – ໄທ 1.032 ຄົນ; ຈຸດຜ່ານດ່ານລາວ – ຈີນ 13 ຄົນ; ຈຸດຜ່ານດ່ານລາວ – ຫວຽດນາມ 590 ຄົນ; ຈຸດຜ່ານດ່ານ ລາວ – ກຳປູເຈຍ 2 ຄົນ; ເດີນທາງຜ່ານສະໜາມບິນສາກົນວັດໄຕ 56 ຄົນ. ທຸກຄົນແມ່ນໄດ້ແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ( ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ ) ແລ້ວຈຶ່ງນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ປັດຈຸບັນ ທົ່ວປະເທດມີສູນຈໍາກັດບໍລິເວນທີ່ຍັງເປີດຢູ່ທັງໝົດ 53 ສູນ, ມີຜູ້ຖືກຈຳກັດບໍລິເວນຢູ່ສູນ 3.336 ຄົນ, ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ພົບຜູ້ຕິດເຊື້ອ.

ທ່ານ ດຣ. ນາງ ລັດສະໝີ ວົງຄຳຊາວ ກ່າວຕື່ມວ່າ: ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໃນວັນທີ 9 ສິງຫາ 2020 ທັງໝົດ 274 ຄົນ, ໃນນັ້ນແຮງງານລາວມາແຕ່ໄທ 53 ຕົວຢ່າງ, ແຮງງານຈີນ 117 ຕົວຢ່າງ, ແຮງງານສ.ເກົາຫຼີ 56 ຕົວຢ່າງ, ແຮງງານຫວຽດນາມ 22 ຕົວຢ່າງ, ແຮງງານໄທ 1 ຕົວຢ່າງ, ບຸກຄົນທົ່ວໄປທີ່ມີອາການ 1 ຕົວຢ່າງ, ຜູ້ຕິດເຊື້ອນ້ຳເບີ 20 ເກັບຕົວຢ່າງກວດຄືນ 1 ຕົວຢ່າງ ແລະ ບຸກຄົນທົ່ວໄປທີ່ບໍ່ມີອາການ 23 ຕົວຢ່າງ. ຜົນກວດວິເຄາະທັງໝົດແມ່ນ ບໍ່ພົບເຊື້ອ ໝາຍ ຄວາມວ່າໃນວັນທີ 9 ສິງຫາ 2020 ບໍ່ມີຜູ້ຕິດເຊື້ອໃໝ່.

ສຳລັບຜູ້ຕິດເຊື້ອນ້ຳເບີ 20 ຜົນກວດແມ່ນຍັງພົບເຊື້ອຢູ່; ສັງລວມການກວດວິເຄາະແຕ່ເດືອນມັງກອນ ຮອດວັນທີ 9 ສິງຫາ 2020 ໄດ້ເກັບຕົວຢ່າງມາກວດທັງໝົດ 31.377 ຕົວຢ່າງ, ກວດພົບເຊື້ອສະສົມ 20 ຄົນ.

ອີງໃສ່ສະພາບການຂອງໂລກມີຫຼາຍປະເທດ ຍັງມີການລະບາດເປັນວົງກວ້າງ ມີຜູ້ຕິດເຊື້ອ ແລະ ເສຍຊີວິດປະຈຳວັນເປັນຈຳນວນຫຼາຍ; ຄະນະສະເພາະກິດແມ່ນມີຄວາມເປັນຫ່ວງເປັນໄຍຕໍ່ສຸຂະພາບຂອງປະຊາຊົນເປັນທີ່ສຸດ, ການວາງມາດຕະການຫຼາຍໆຢ່າງແມ່ນເພື່ອຫຼຸດຜ່ອນ ແລະ ຢັບຢັ້ງການແຜ່ລະບາດຂອງພະຍາດ. ຮຽກຮ້ອງໃຫ້ພວກເຮົາທຸກຄົນຈົ່ງຮ່ວມແຮງຮ່ວມໃຈກັນເປັນເຈົ້າການ ໃຫ້ຖືວ່າແມ່ນຄວາມຮັບຜິດຊອບຂອງໝົດທຸກຄົນໃນການປະຕິບັດວິທີປ້ອງກັນການຕິດເຊື້ອໃຫ້ຖືກຕ້ອງ ແລະ ເຂັ້ມງວດ ເພື່ອສະກັດກັ້ນການແຜ່ລະບາດຂອງພະຍາດບໍ່ໃຫ້ເປັນວົງກວ້າງ; ສຳລັບຜູ້ທີ່ຈະເດີນທາງ ເຂົ້າ – ອອກ ສປປ ລາວ ແມ່ນໃຫ້ປະຕິບັດຕາມແຈ້ງການຂອງກະຊວງການຕ່າງປະເທດ, ສະບັບເລກທີ 1861/ຕປທ.ສພກ ລົງວັນທີ 31 ກໍລະກົດ 2020.