ສະພາທຸລະກິດມາເລເຊຍ ປະຈຳລາວ ຈັດງານ “Social Networking Night”.

462

ສະພາທຸລະກິດມາເລເຊຍ ປະຈຳ ສປປ ລາວ ຫຼື ເປັນທີ່ຮູ້ຈັກກັນດີວ່າ (MBCL) ໄດ້ຈັດງານສະ ຫຼອງເຄືອຂ່າຍສຳລັບສະມາຊິກມາເລເຊຍທຸກຄົນທີ່ອາໄສຢູ່ ສປປ ລາວ ພາຍໃຕ້ຄຳຂວັນ “Malam Kam Cheng” ເຊິ່ງແມ່ນຄຳປະສົມຂອງພາສາມາເລ ແລະ ພາສາຈີນ ທີ່ແປວ່າ: “Social Networking Night. ຈຸດປະສົງກໍ່ເພື່ອລວມເອົາຜູ້ປະກອບການຂອງລາວ ແລະ ນັກທຸລະກິດມາເລເຊຍ ເພື່ອສ້າງເວທີການເຮັດທຸລະກິດທີ່ສົມບູນແບບ ຫວັງສ້າງຜົນປະໂຫຍດເຊິ່ງກັນ ແລະ ກັນ.

ທ່ານ Tee Chee Seng ປະທານສະພາທຸລະກິດມາເລເຊຍ ປະຈຳ ສປປ ລາວ ກ່າວວ່າ: ເປົ້າໝາຍຂອງການຈັດງານີ້ຂຶ້ນ ກໍ່ເພື່ອເປັນການຮັດແໜ້ນຄວາມສາມັກຄີລະຫວ່າງນັກທຸລະກິດມາເລເຊຍຢູ່ລາວ ແລະ ສ້າງສາຍພົວພັນກັບບັນດາຜູ້ປະກອບການລາວ ເພື່ອເຮັດແນວໃດໃຫ້ໄດ້ມີໂອກາດແລກປ່ຽນບົດຮຽນເຊິ່ງກັນ ແລະ ກັນ ລວມທັງການປຶກສາຫາລື, ແນະນຳທຸລະກິດ ແລະ ຈັບຄູ່ທຸລະກິດຮ່ວມກັນ. ໄລຍະຜ່ານມາ, ການລົງທຶນຂອງມາເລເຊຍຢູ່ໃນລາວປະກອບມີຫຼາຍຂະແໜງການເປັນຕົ້ນແມ່ນ: ການທະນາຄານ, ໂຮງແຮມ-ຮ້ານອາຫານ, ຂົນສົ່ງ, ພະລັງງານ, ກະສິກຳ, ອະສັງຫະ, ຕົວແທນຈໍາໜ່າຍ, ການຄ້າຂາຍທົ່ວໄປ ແລະ ອື່ນໆ.

ສໍາລັບການຈັດງານຄັ້ງນີ້ ຖືວ່າເປັນການເຄື່ອນໄຫວເລີ່ມຕົ້ນທີ່ດີ ເຮັດໃຫ້ບັນດາສະມາຊິກໄດ້ມາ ລວມຕົວກັນເພື່ອຮ່ວມກັນດຳເນີນງານຢ່າງບໍ່ຢຸດຢັ້ງ ໂດຍສະເພາະໃນຊ້ວງ COVID-19 ເຊິ່ງເຮັດໃຫ້ນັກທຸລະກິດມາເລເຊຍໄດ້ມີໂອກາດພົບປະກັນ ທັງເປັນຄວາມມຸ້ງໝັ້ນຂອງສະພາທຸລະກິດມາເລເຊຍ ປະຈຳລາວ ເພື່ອໃຫ້ທຸກຄົນໄດ້ຮັບຜົນປະໂຫຍດ ແລະ ດໍາລົງຊີວິດຢ່າງມີຄວາມສຸກຢູ່ໃນລາວ.

ໂອກາດນີ້, ທ່ານ Encik Aini ATAN ເອກອັກຄະລັດຖະທູດມາເລເຊຍປະຈຳລາວ ມີຄຳເຫັນ ວ່າ: ໃນນາມສະຖານທູດມາເລເຊຍປະຈໍາລາວ ມີຄວາມພາກພູມໃຈເປັນຢ່າງຍິ່ງທີ່ເຫັນບັນດາທຸລະກິດຂອງມາເລເຊຍໄດ້ລວມຕົວກັນສ້າງເປັນສະພາທຸລະກິດ ເພື່ອອໍານວຍຄວາມສະດວກໃນການຕິດຕໍ່ປະສານງານ, ການສ້າງເຄືອຂ່າຍທຸລະກິດ ລວມໄປເຖິງການຮ່ວມມື ແລະ ແລກປ່ຽນບົດຮຽນຮ່ວມກັນເພື່ອສ້າງຄວາມເຂັ້ມແຂງພາຍໃນ ແລະ ສາມາດນຳໃຊ້ຂໍ້ມູນນີ້ໃນການເລີ່ມຕົ້ນໃໝ່ ຫຼື ເສີມສ້າງທຸລະກິດທີ່ມີຢູ່ໃຫ້ມີບາດກ້າວຂະຫຍາຍຕົວສຳລັບນັກທຸລະກິດມາເລເຊຍ ແລະ ສປປ ລາວ.

ໃນພິທີ, ບັນດາຜູ້ປະກອບການຍັງໄດ້ນໍາສະເໜີກ່ຽວກັບທຸລະກິດຂອງຕົນ ແລະ ສະພາທຸລະກິດມາເລເຊຍ ປະຈຳ ສປປ ລາວ ກໍ່ໄດ້ມອບໃບຍ້ອງຍໍໃຫ້ຜູ້ສະໜັບສະໜູນງານດັ່ງກ່າວ ເຊິ່ງຄາດວ່າຈະມີການຈັດກິດຈະກຳຕ່າງໆໃນທຸກໆເດືອນນັບແຕ່ນີ້ຫາທ້າຍປີ 2020.

ພິທີດັ່ງກ່າວ, ຈັດຂຶ້ນໃນວັນທີ 7 ສິງຫາ 2020 ຜ່ານມາ, ທີ່ໂຮງແຮມລາວພລາຊາ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ Encik Aini ATAN ເອກອັກຄະລັດຖະທູດມາເລເຊຍປະຈຳລາວ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ ນາງ ວາລີ ເວດສະພົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ ສັງຄົມ ຈັນສຸກ ປະທານສະພາການຄ້າ ແລະ ອຸດສາຫະກຳນະຄອນຫຼວງວຽງຈັນ ພ້ອມດ້ວຍນັກທຸລະກິດມາເລເຊຍທີ່ລົງທຶນຢູ່ລາວຫຼາຍພາກສ່ວນເຂົ້າຮ່ວມຢ່າງພ້ອມພຽງ.