ຈະສ້າງສວນວິທະຍາສາດ ແລະ ພຶກສາສາດ ຢູ່ບ້ານຫວ້ຍໂຄ້ງ ເມືອງແກ້ວອຸດົມ ແຂວງວຽງຈັນ.

682

ຫ້ອງການສະພາວິທະຍະສາດແຫ່ງຊາດ ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບ ບໍລິສັດ ແອັດແລນຕິກ ອິນເຕີເນເຊີນແນວ ກຣຸບ ຈໍາກັດຜູ້ດຽວ ລົງນາມເຊັນສັນຍາ (MOA) ສ້າງສວນວິທະຍາສາດ ແລະ ພຶກສາສາດ ຢູ່ບ້ານຫວ້ຍໂຄ້ງ ເມືອງແກ້ວອຸດົມ ແຂວງວຽງຈັນ ເຊິ່ງມີອາຍຸການຮ່ວມມື 25 ປີ ແລະ ສາມາດຕໍ່ໄດ້ແບບອັດຕະໂນມັດຕາມການເຫັນດີຂອງສອງຝ່າຍ.

ທ່ານ ນາງ ແກ້ວໄພວັນ ດວງສະຫວັນ ຫົວໜ້າຫ້ອງການສະພາວິທະຍາສາດແຫ່ງຊາດ ກະຊວງວິທະຍາສາດ ແລະ ເຕັກໂນໂລຊີ ກ່າວວ່າ: ພາຍຫຼັງໄດ້ເຊັນບົດບັນທຶກຄວາມເຂົ້າໃຈ, ທັງສອງຝ່າຍໄດ້ມີການເຄື່ອນໄຫວວຽກງານຕົວຈິງຢ່າງຕັ້ງໜ້າ ແລະ ເກີດມີໝາກຜົນເປັນຮູບປະທໍາ.

ສະນັ້ນ, ເພື່ອໃຫ້ວຽກ ດໍາເນີນຢ່າງຕໍ່ເນື່ອງ ແລະ ມີປະສິດທິຜົນ, ຜ່ານການປຶກສາຫາລືເປັນເອກະພາບຂອງທັງສອງຝ່າຍຈຶ່ງໄດ້ຜັນຂະຫຍາຍເປັນກິດຈະກໍາ, ແຜນວຽກລະອຽດ ແລະ ໄດ້ລະບຸໃນຮ່າງສັນຍາດັ່ງນີ້: 1). ສ້າງສູນສຶກສາດ້ານດາລາສາດ (ຫໍຊົມດາວ ແລະ ທ້ອງຟ້າຈໍາລອງ); 2). ສ້າງສວນ ແລະ ສູນສຶກສາດ້ານພຶກ ສາສາດ (ສວນຕົ້ນໄມ້ ແລະ ພືດເປັນຢາ); 3). ສ້າງສູນສຶກສາການຖ່າຍທອດດ້ານວິທະຍາສາດເຕັກໂນໂລຊີ ແລະ ນະວັດຕະກໍາ; 4). ສ້າງແຫຼ່ງທ່ອງທ່ຽວແບບທໍາມະຊາດ ແລະ ວັດທະນາທໍາ; 5). ກິດຈະກໍາອື່ນໆທີ່ເປັນປະໂຫຍດກັບການສຶກສາ-ຮຽນຮູ້ດ້ານວິທະຍາສາດ ແລະ ການພັດທະນາເສດຖະກິດ-ສັງຄົມ.

ສໍາລັບສະຖານທີ່ຕັ້ງຂອງໂຄງການແມ່ນຢູ່ບ້ານຫວ້ຍໂຄ້ງ, ເມືອງແກ້ວອຸດົມ, ແຂວງວຽງຈັນ ມີອາຍຸການສໍາປະທານໄລຍະການຮ່ວມມື 25 ປີ ແລະ ກໍ່ໄດ້ແບບອັດຕະໂນມັດຕາມການເຫັນດີຂອງສອງຝ່າຍ.

ໂອກາດນີ້, ທ່ານ ພູວົງ ສູ້ຍຍະວົງ ປະທານບໍລິສັດ ແອັດແລນຕິກ ອິນເຕີເນເຊີນແນວ ກຣຸບ ຈໍາກັດຜູ້ດຽວ ກ່າວຕື່ມວ່າ: ຈຸດປະສົງເພື່ອຈັດຕັ້ງຜັນຂະຫຍາຍແນວທາງນະໂຍບາຍຂອງພັກທີ່ຊຸກຍູ້ສົ່ງເສີມ ການພັດທະນາເສດຖະກິດ-ສັງຄົມແຫ່ງຊາດ ໂດຍນໍາໃຊ້ວິທະຍາສາດ ແລະ ເຕັກໂນໂລຊີ ເປັນແຮງຂັບ ເຄື່ອນ, ທັງເປັນການຈັດຕັ້ງຜັນຂະຫຍາຍແຜນງານພັດທະນາວິທະຍາສາດ ແລະ ເຕັກໂນໂລຊີເຂົ້າສູ່ຂົງ ເຂດການບໍລິການ ແລະ ການຜະລິດ. ຂະນະດຽວກັນ, ຝ່າຍບໍລິສັດຈະເປັນຜູ້ສະໜັບສະໜູນດ້ານງົບ ປະມານ ແລະ ສິ່ງອໍານວຍຄວາມສະດວກໃຫ້ແກ່ການເຄື່ອນໄຫວວຽກງານ; ສ່ວນກະຊວງວິທະຍາສາດ ແລະ ເຕັກໂນໂລຊີ ຈະເປັນຜູ້ສະໜູບສະໜູນດ້ານເຕັກນິກວິຊາການ, ພົວພັນຮ່ວມມືກັບສາກົນ ເຊິ່ງຜົນປະໂຫຍດທັງໝົດທີ່ເກີດມີໃນຂະບວນການຮ່ວມມື, ການບໍລິການ ແລະ ອື່ນໆ ຂອງສວນວິທະຍາສາດ ແລະ ພຶກສາສາດ ແມ່ນຕ່າງຝ່າຍຕ່າງມີຜົນປະໂຫຍດຮ່ວມກັນ.

ພິທີເຊັນສັນຍາບົດບັນທຶກຄວາມເຂົ້າໃຈ (MOA) ສ້າງສວນວິທະຍາສາດ ແລະ ພຶກສາສາດ ຈັດຂຶ້ນໃນວັນທີ 7 ສິງຫາ 2020 ທີ່ຫ້ອງປະຊຸມຊັ້ນ 4 ກະຊວງວິທະຍາສາດ ແລະ ເຕັກໂນໂລຊີ ເປັນການລົງນາມຮ່ວມກັນຂອງທ່ານ ນາງ ແກ້ວໄພວັນ ດວງສະຫວັນ ຫົວຫນ້າຫ້ອງການສະພາວິທະຍາສາດແຫ່ງຊາດ, ກະຊວງວິທະຍາສາດ ແລະ ເຕັກໂນໂລຊີ ກັບທ່ານ ພູວົງ ສູ້ຍຍະວົງ ປະທານບໍລິສັດ ແອັດແລນຕິກ ອິນເຕີເນເຊີນແນວ ກຣຸບ ຈໍາກັດຜູ້ດຽວ ໃຫ້ກຽດເຂົ້າຮ່ວມ ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ພ້ອມດ້ວຍຄະນະນໍາ ແລະ ຫົວໜ້າຫ້ອງການ, ກົມສະຖາບັນກະຊວງເຂົ້າຮ່ວມ. ໂອກາດດຽວກັນ, ຍັງມີພິທີເປີດສູນສຶກສາວິທະຍາສາດດາລາສາດ ແລະ ພຶກສາສາດທີ່ຕຶກຊັ້ນ1 ຫ້ອງການສະພາວິທະຍາສາດແຫ່ງຊາດ ຂອງກະຊວງ ກວຕ ນຳອີກ.