ການຂຸດຄົ້ນບໍ່ຖ່ານຫີນຢູ່ເມືອງວຽງພູຄາ ບໍ່ບັນລຸຕາມຄາດໝາຍ.

565

ພາຍຫຼັງທີ່ໄດ້ມີການແຜລະບາດ ຂອງພະຍາດອັກເສບປອດ ໂຄວິດ -19 ໄດ້ສົ່ງຜົນກະທົບຕໍ່ວຽກງານ ແລະ ເສດຖະກິດທີ່ເປັນຢູ່ໃນປັດຈຸບັນ. ສໍາລັບ ບໍລິສັດ ບົວໄລມັງກອນທອງ ຂຸດຄົ້ນບໍ່ຖ່ານຫີນ ເມືອງວຽງພູຄາ ແຂວງຫຼວງນໍ້າທາ ກໍ່ເປັນບໍລິສັດໜື່ງທີ່ໄດ້ຮັບຜົນກະທົບ ເຮັດໃຫ້ການຂຸດຄົ້ນຖ່ານຫີນບໍ່ໄດ້ຕາມເປົ້າໝາຍ ໂດຍສະເພາະແມ່ນການການຂຸດຄົ້ນ ແລະ ການສົ່ງອອກ.
ທ່ານ ໄພມະນີ ລຸນທອງ ຜູ້ຈັດການພາກສະໜາມ ບໍລິສັດ ບົວໄລມັງກອນທອງ ຂຸດຄົ້ນບໍ່ຖ່ານຫີນ ເມືອງວຽງພູຄາ ແຂວງຫຼວງນ້ຳທາ ໃຫ້ສຳພາດໃນທ້າຍເດືອນ ກໍລະກົດ 2020 ນີ້ວ່າ: ປີ 2020 ບໍລິສັດຂອງພວກເຮົາໄດ້ຂຸດຄົ້ນນັບແຕ່ເດືອນມັງກອນເປັນຕົ້ນມາຈົນຮອດປະຈຸບັນ ສາມາດເປີດໜ້າດິນໄດ້ 7 ແສນ 90 ພັນກວ່າແມັດກ້ອນ, ເຊິ່ງໃນແຜນແມ່ນຢູ່ທີ່ 2 ລ້ານກວ່າແມັດກ້ອນ ເຊິ່ງສາມາດຂຸດຄົ້ນຖ່ານຫິນໄດ້ 2 ແສນ 25 ພັນກວ່າໂຕນ, ແຕ່ອິງຕາມແຜນການແລ້ວແມ່ນ 690.000 ໂຕນ. ສໍາລັບການຈຳຫນ່າຍຖ່ານຫີນແມ່ນໄດ້ 1 ແສນ 72 ພັນກວ່າໂຕນ, ແຜນແມ່ນຈະໃຫ້ສົ່ງໄດ້ 610.000 ໂຕນ ຖືວ່າການຂຸດຄົ້ນຖ່ານຫີນແມ່ນບໍ່ໄດ້ຕາມເປົ້າໝາຍ.


ທ່ານ ໄພມະນີ ລຸນທອງ ໄດ້ກ່າວຕື່ມວ່າ: ໄລຍະຜ່ານມາ ທາງບໍລິສັດ ກໍ່ໄດ້ຈັດຕັ້ງປະຕິບັດບັນດາໜ້າວຽກ ເຊັ່ນ: ໄດ້ເປີດໜ້າດີນ, ຂຸດຄົ້ນຖ່ານຫິນ, ຈຳໜ່າຍຖ່ານຫິນສົ່ງອອກ ແລະ ການພັດທະນາຊຸມຊົນ-ສິ່ງແວດລ້ອມ ໃນແຕ່ລະບ້ານຢູ່ຂົງເຂດອ້ອມຂ້າງໂຄງການ ເປັນຕົ້ນ: ວຽກງານສາທາ, ໂຍທາ ແລະ ວຽກງານສຶກສາ ພ້ອມທັງໄດ້ສ້າງນ້ຳລິນໃຫ້ປະຊາຊົນ 4 ບ້ານ ລວມມູນຄ່າທັງຫມົດ 929 ລ້ານກວ່າກີບ. ນອກນັ້ນ, ຍັງໄດ້ຊຸກຍູ້ງານບູນປະເພນີຕ່າງໆຂອງບັນດາເຜົ່າແຕ່ລະບ້ານຕື່ມອີກ ເຊິ່ງບໍລິສັດຍັງໄດ້ປະຕິບັດສັນຍາລະຫວ່າງ ລັດຖະບານ ແລະ ບໍລິສັດກ່ຽວກັບການເສຍພັນທະອາກອນໃຫ້ແກ່ລັດຖະບານ ນັບແຕ່ປີ 2014-2019 ບໍລິສັດໄດ້ມອບເງິນເຂົ້າພັນທະອາກອນໃຫ້ແກ່ລັດຖະບານທັງຫມົດ 89 ຕື້ກວ່າກີບ.


ຂ່າວ: ອຸ້ມ