ທາບທາມຄຳເຫັນໃສ່ຮ່າງດຳລັດ ວ່າດ້ວຍການຄຸ້ມຄອງ ແລະ ສົ່ງເສີມນັກຄົ້ນຄວ້າ-ພັດທະນາ.

536

ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ສືບຕໍ່ຈັດກອງປະຊຸມທາບທາມຄໍາຄິດເຫັນໃສ່ຮ່າງດຳລັດວ່າດ້ວຍການຄຸ້ມຄອງ ແລະ ສົ່ງເສີມນັກຄົ້ນຄວ້າ-ພັດທະນາວິທະຍາສາດ ແລະ ເຕັກໂນໂລຊີ ຢູ່ແຂວງຈໍາປາສັກ. ຈຸດປະສົງເພື່ອແລກປ່ຽນຄຳຄິດເຫັນໃສ່ຮ່າງດຳລັດ ວ່າດ້ວຍວຽກງານການຄຸ້ມຄອງ ແລະ ສົ່ງເສີມນັກຄົ້ນຄວ້າ-ພັດທະນາວິທະຍາສາດ ແລະ ເຕັກໂນໂລຊີ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດຢ່າງມີປະສິດ ທິພາບ, ປະສິດທິຜົນ ແລະ ຄວາມເປັນເອກະພາບໃນຂອຍເຂດທົ່ວປະເທດ, ແນ່ໃສສ້າງເງື່ອນໄຂຊຸກຍູ້ ແລະ ສົ່ງເສີມນັກຄົ້ນຄວ້ານັກວິທະຍາສາດທາງພາກລັດ ແລະ ເອກະຊົນໃຫ້ໄດ້ຜົນສຳເລັດໃນດ້ານການຄົ້ນຄວ້າວິທະຍາສາດ.  ກະຊວງວິທະຍາສາດ ແລະ ເຕັກໂນໂລຊີ ໃນນາມຜູ້ຮັບຜິດຊອບວຽກງານດັ່ງກ່າວ ໄດ້ຈັດກອງປະຊຸມປຶກສາຫາລືພາຍໃນ ແລະ ໄດ້ແຕ່ງຕັ້ງຄະນະຮັບຜິດຊອບສ້າງນັບແຕ່ປີ 2018 ເປັນຕົ້ນມາ ເຊິ່ງ ໄດ້ຄົ້ນຄວ້າບັນດາເອກະສານທັງພາຍໃນ ແລະ ຕ່າງປະເທດ, ແລກປ່ຽນບົດຮຽນ, ຖອດຖອນບົດຮຽນກັບຫຼາຍພາກສ່ວນທີ່ກ່ຽວຂ້ອງ ເພື່ອເອົາເປັນຂໍ້ມູນໃນການຄົ້ນຄວ້າ ແລະ ສ້າງຮ່າງດຳລັດວ່າດ້ວຍການຄຸ້ມຄອງ ແລະ ສົ່ງເສີມນັກຄົ້ນຄວ້າພັດທະນາວິທະຍາ ສາດ; ເຊິ່ງຮ່າງດຳລັດດັ່ງກ່າວ ໄດ້ຜ່ານກອງປະຊຸມປະກອບຄໍາຄິດ ແລະ ຄໍາເຫັນພາຍໃນກະຊວງ ແລະ ຂັ້ນການນໍາກະຊວງຫຼາຍຄັ້ງ. ມາຮອດປັດຈຸບັນ, ຮ່າງດຳລັດ ວ່າດ້ວຍການຄຸ້ມຄອງ ແລະ ສົ່ງເສີມນັກຄົ້ນຄວ້າພັດທະນາວິທະຍາ ສາດ ແລະ ເຕັກໂນໂລຊີ ໄດ້ສໍາເລັດໂດຍພື້ນຖານ.

ໄລຍະຜ່ານມາ ລັດຖະບານເຫັນໄດ້ຄວາມສໍາຄັນຂອງວຽກງານດັ່ງກ່າວ ຈຶ່ງໄດ້ລົງທຶນ 1% ຂອງມູນຄ່າການລົງທຶນຂອງລັດ ເພື່ອພັດທະນາ, ຊຸກຍູ້, ສົ່ງເສີມວຽກງານຄົ້ນຄວ້າພັດທະນາວິທະຍາສາດ ແລະ ເຕັກໂນໂລຊີ ເຊິ່ງໃຫ້ນະໂຍບາຍນັກຄົ້ນຄວ້າໂດຍສະເພາະຜູ້ທີ່ມີຄວາມຮູ້, ຄວາມສາມາດ, ມີຫົວຄິດປະດິດສ້າງ ແລະ ມີຄວາມບຸກບືນ. ສະນັ້ນ, ປັດໄຈສຳຄັນຂອງວຽກງານນີ້ ແມ່ນເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດ ແລະ ເປັນຮູບປະທຳຢ່າງແທ້ຈິງ.

ພິທີດັ່ງກ່າວ, ຈັດຂຶ້ນໃນວັນທີ 30 ກໍລະກົດ 2020 ຜ່ານມາ, ທີ່ຫ້ອງປະຊຸມຂອງຫ້ອງວ່າການແຂວງດັ່ງກ່າວ ໃຫ້ກຽດເປັນປະທານຮ່ວມກອງປະຊຸມໂດຍ ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ; ທ່ານ ບົວລິນ ວົງພະຈັນ ຮອງເຈົ້າແຂວງໆຈຳປາສັກ, ມີບັນດາທ່ານຫົວໜ້າຫ້ອງການ, ກົມ, ສະຖາບັນ, ຫົວໜ້າພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ, ແຂວງສະຫວັນນະເຂດ, ແຂວງຈຳປາສັກ, ຜູ້ຕາງໜ້າຈາກມະຫາວິທະຍາໄລ ແຂວງຈຳປາສັກ ແລະ ພະນັກງານກ່ຽວຂ້ອງເຂົ້າຮ່ວມ.

(ຂ່າວ-ພາບ: ກະຊວງ ກວຕ)