ກະຊວງການເງິນ ວາງຫຼາຍມາດຕະການ ສູ້ຊົນເກັບລາຍຮັບໃຫ້ໄປຕາມແຜນ ທີ່ສະພາຮັບຮອງ

441

ການຈັດເກັບລາຍຮັບ 5 ເດືອນຕົ້ນປີນີ້ ປະຕິບັດໄດ້ 7.734 ຕື້ກີບ ເທົ່າກັບ 27% ( ແຜນການປີແມ່ນ 28.997 ຕື້ກີບ ) ທຽບໃສ່ໄລຍະດຽວກັນ ຫຼຸດລົງ 11%. ເຖິງຢ່າງໃດກໍຕາມ, ລັດຖະບານໄດ້ສະເໜີດັດແກ້ແຜນລາຍຮັບຕາມສະພາແຫ່ງຊາດຮັບຮອງຈາກ 28.997 ຕື້ກີບ ມາເປັນ 22.725 ຕື້ກີບ ( ຫຼຸດລົງ 6.272 ຕື້ກີບ ).

ສະນັ້ນ, ເພື່ອເປັນການຊຸກຍູ້ເກັບລາຍຮັບໃຫ້ໄປຕາມ ແຜນທີ່ສະພາຮັບຮອງໃນໄລຍະ 6 ເດືອນທ້າຍປີນີ້, ກະຊວງການເງິນ ຈຶ່ງໄດ້ອອກແຈ້ງການໃຫ້ທົ່ວຂະແໜງເກັບລາຍຮັບເຂົ້າງົບປະມານ ຈົ່ງສືບຕໍ່ຈັດຕັ້ງປະຕິບັດຊຸກຍູ້ການເກັບລາຍຮັບຕາມມະຕິກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII ສະບັບເລກທີ 02/ສພຊ ລົງວັນທີ 25/06/2020 ຜ່ານມາ.

ອີງຕາມແຈ້ງການກະຊວງການເງິນ ສະບັບເລກທີ 2056/ກງ ລົງວັນທີ 30 ກໍລະກົດ 2020 ເລື່ອງການຈັດຕັ້ງປະຕິບັດມາດຕະການຊຸກຍູ້ການເກັບລາຍຮັບໃນ 6 ເດືອນທ້າຍປີ 2020. ທັງນີ້, ກໍເພື່ອຮັບປະກັນໃຫ້ໄດ້ຕາມແຜນ ແລະ ລື່ນແຜນດັດແກ້ທີ່ສະພາແຫ່ງຊາດຮັບຮອງແລ້ວ ໂດຍມອບໃຫ້ຫົວໜ້າກົມ, ຫົວໜ້າສູນ, ສະຖາບັນອ້ອມຂ້າງກະຊວງການເງິນ, ຫົວໜ້າພະແນກການເງິນ, ຫົວໜ້າສ່ວຍສາອາກອນ, ຫົວໜ້າກອງຄຸ້ມຄອງພາສີ, ຫົວໜ້າຄັງເງິນແຫ່ງຊາດ ປະຈໍານະຄອນຫຼວງ ແລະ ບັນດາແຂວງໃນຂອບເຂດທົ່ວປະເທດ ຈົ່ງເປັນເຈົ້າການໃນການຈັດຕັ້ງປະຕິບັດແຈ້ງການດັ່ງກ່າວ.

ในภาพอาจจะมี หนึ่งคนขึ้นไป, ท้องฟ้า, เมฆ และสถานที่กลางแจ้ง

ສໍາລັບວຽກງານສ່ວຍສາອາກອນ: ໃຫ້ສືບຕໍ່ຊຸກຍູ້ໃຫ້ຜູ້ເສຍອາກອນແຈ້ງ – ມອບອາກອນດ້ວຍຕົນເອງຜ່ານລະບົບເອເລັກໂຕຣນິກ ແລະ ຜ່ານເວັບໄຊຫຼາຍຂຶ້ນ ແລະ ຂະຫຍາຍຖານລາຍຮັບດ້ວຍການຫັນບັນດາຫົວໜ່ວຍທຸລະກິດເຂົ້າສູ່ລະບົບອາກອນມູນຄ່າເພີ່ມໃຫ້ຖືກຕ້ອງ, ໂປ່ງໃສ ແລະ ເຂັ້ມງວດ ເລີ່ມຈາກນະຄອນຫຼວງວຽງຈັນ ແລະ ບັນດາແຂວງໃຫຍ່ທີ່ມີເງື່ອນໄຂ. ໃນນີ້, ຕ້ອງເອົາໃຈໃສ່ບັນດາບັນຫາດັ່ງລຸ່ມນີ້: ກວດກາຄືນການແຈ້ງການມອບຜ່ານລະບົບທະນາຄານຂອງຫົວໜ່ວຍທຸລະກິດຂະໜາດກາງ ແລະ ໃຫຍ່ ຫຼັງສິ້ນສຸດນະໂຍບາຍຜ່ອນຜັນທາງດ້ານອາກອນໃນໄລຍະໂຄວິດ – 19 ແຕ່ເດືອນເມສາ – ມິຖຸນາ 2020 ເຊັ່ນ: ກຸ່ມການຄ້າ, ກຸ່ມບໍລິການ, ກຸ່ມກໍ່ສ້າງ, ກຸ່ມພາຫະນະ, ກຸ່ມນໍ້າມັນເຊື້ອໄຟ ລວມໄປເຖິງກຸ່ມພະລັງງານ ແລະ ບໍ່ແຮ່.

ນອກນັ້ນ, ກໍປະເມີນລາຍຮັບຂອງຫົວໜ່ວຍທຸລະກິດທີ່ບໍ່ໄດ້ນອນໃນຖານລາຍຮັບຈຸນລະວິສາຫະກິດ ( ຫົວ ໜ່ວຍທຸລະກິດທີ່ມີລາຍຮັບເກີນ 400 ລ້ານກີບ ) ແຕ່ຍັງບໍ່ທັນໄດ້ເຂົ້າໃນລະບົບອາກອນມູນຄ່າເພີ່ມ ເພື່ອເປັນເປົ້າໝາຍຂະຫຍາຍຖານການເກັບອາກອນມູນຄ່າເພີ່ມ; ສືບຕໍ່ຊຸກຍູ້ຫົວໜ່ວຍຈຸນລະວິສາຫະກິດທີ່ມີລາຍຮັບລະຫວ່າງ 50 – 400 ລ້ານກີບ ປະຕິບັດອັດຕາອາກອນລາຍໄດ້ຂອງຈຸນລະວິສາຫະກິດໃຫ້ສອດຄ່ອງກັບມາດຕາ 29 ຂໍ້ 2 ຂອງກົດໝາຍວ່າດ້ວຍອາກອນລາຍໄດ້.

ວຽກງານພາສີ: ສືບຕໍ່ກໍານົດລາຄາແຈ້ງພາສີຂອງສິນຄ້າທີ່ມີຄວາມສ່ຽງ ເພື່ອໃຫ້ນໍາໃຊ້ເປັນເອກະພາບໃນຂອບເຂດທົ່ວປະເທດ ໂດຍນໍາໃຊ້ເຄື່ອງມືໃນການຄຸ້ມຄອງ ແລະ ກວດສອບລາຄາແຈ້ງພາສີ, ພ້ອມທັງເພີ່ມທະວີວຽກງານກວດສອບຄືນການແຈ້ງພາສີ ໂດຍສຸມໃສ່ບັນດາບໍລິສັດ ແລະ ໝວດສິນຄ້າທີ່ມີຄວາມສ່ຽງໃນການລັກລອບ ໂດຍສະເພາະນໍ້າມັນເຊື້ອໄຟ, ສິນຄ້າອຸປະໂພກ – ບໍລິໂພກ ແລະ ເຄື່ອງໃຊ້ໄຟຟ້າ; ປະສານສົມທົບກັບຂະແໜງສ່ວຍສາອາກອນ ແລະ ຂະແໜງການກ່ຽວຂ້ອງລົງກວດກາສາງເກັບມ້ຽນນໍ້າມັນເຊື້ອໄຟຂອງບັນດາໂຄງການ ແລະ ບໍລິສັດນໍາເຂົ້ານໍ້າມັນເຊື້ອໄຟຕ່າງໆ ເພື່ອຕິດຕັ້ງລະບົບກວດກາ, ເຄື່ອງນັບບໍລິມາດ ( ອີມີເຕີ ) ໃສ່ຢູ່ບັນດາສາງນໍ້າມັນ ແລະ ສາງສິນຄ້າຂອງບັນດາບໍລິສັດທີ່ດໍາເນີນທຸລະກິດນໍາເຂົ້າ – ສົ່ງອອກໃນຂອບເຂດທົ່ວປະເທດ. ນອກນັ້ນ, ໃຫ້ຄຸ້ມຄອງຕິດຕາມກວດກາການນໍາເຂົ້າສິນຄ້າຢູ່ຕາມດ່ານປະເພນີ ແລະ ດ່ານທ້ອງຖິ່ນໃຫ້ສອດຄ່ອງກັບລະບຽບກົດໝາຍ ແລະ ສົນທິສັນຍາລະຫວ່າງປະເທດກັບບັນດາປະເທດໃກ້ຄຽງ.

ในภาพอาจจะมี ท้องฟ้า, เมฆ และสถานที่กลางแจ้ง

ວຽກງານຄຸ້ມຄອງຊັບສິນຂອງລັດ: ສືບຕໍ່ປະຕິບັດການນໍາເອົາລາຍຮັບຈາກຊັບສິນ ແລະ ການຂາຍເຄື່ອງຮິບທີ່ສານຕັດສິນເປັນຂອງລັດໃຫ້ຄົບຖ້ວນ ແລະ ຖືກຕ້ອງຕາມກົດໝາຍ ເຊັ່ນ: ເງິນ, ວັດຖຸມີຄ່າ, ທີ່ດິນ, ສິ່ງກໍ່ສ້າງ, ພາຫະນະ, ວັດຖຸອຸປະກອນ ແລະ ອື່ນໆ ເພື່ອຂຶ້ນບັນຊີລວມສູນຢູ່ຂະແໜງການຄຸ້ມຄອງຊັບສິນຂອງລັດ ແລະ ມອບເຂົ້າງົບປະມານຂອງລັດຕາມກົດໝາຍ ແລະ ຄໍາສັ່ງນາຍົກລັດຖະມົນຕີ ສະບັບເລກທີ 07/ນຍ ລົງວັນທີ 05/04/2017 ວ່າດ້ວຍການເຕົ້າໂຮມຊັບສິນທີ່ໄດ້ຈາກການຮັບຈາກສານຕັດສິນ. ໃນນັ້ນ, ໃຫ້ຄະນະສະເພາະກິດທີ່ຖືກແຕ່ງຕັ້ງໃຫ້ປະຕິບັດການກວດກາໜີ້ຄ້າງມອບຄ່າບິນຜ່ານ ໂດຍໃຫ້ສົມທຽບບັນຊີໜີ້ຂອງກອງຈະລາຈອນທາງອາກາດກັບໃບລາຍງານຜົນໄດ້ຮັບ ( Staten-ment ) ບັນຊີທະນາຄານ ແຫ່ງ ສປປ ລາວ.

ຄົ້ນຄວ້າມອບຖານລາຍຮັບຈາກຄ່າເຊົ່າ – ສໍາປະທານທີ່ດິນທີ່ຂັ້ນສູນກາງຄຸ້ມຄອງໃຫ້ທ້ອງຖິ່ນຈັດເກັບ ແລະ ແບ່ງລາຍຮັບພູດຂອງສູນກາງທີ່ໂຄງການຕັ້ງຢູ່ທ້ອງຖິ່ນ ເປັນຕົ້ນແມ່ນຄ່າຊັບພະຍາກອນແຮ່ທາດ, ຄ່າພາກຫຼວງ; ເລັ່ງທວງ ແລະ ແກ້ໄຂໜີ້ຄ້າງມອບຄ່າສໍາປະທານທີ່ດິນ, ຊັບພະຍາກອນແຮ່ທາດ, ຄ່າຊັບພະຍາກອນບໍລິສັດພູເບ້ຍມາຍນິງ ແລະ ໄຟຟ້າຫົງສາ, ໜີ້ຄ້າງມອບຄ່າບິນຜ່ານ ໂດຍປະສານກັບອົງການກວດສອບແຫ່ງລັດ ເພື່ອຂໍຂໍ້ມູນຜົນການກວດສອບປີ 2018 ຕິດພັນໜີ້ຄ້າງມອບ.

ວຽກງານຄຸ້ມຄອງວິສາຫະກິດລັດລົງທຶນ ແລະ ການປະກັນໄພ: ຮີບຮ້ອນປັບປຸງລັດວິສາຫະກິດທີ່ມີປະສິດທິຜົນຕໍ່າ, ປັບປຸງໂຄງສ້າງທຶນ ແລະ ການບໍລິຫານເຮັດໃຫ້ລັດວິສາຫະກິດເຄື່ອນໄຫວຢ່າງມີປະສິດທິຜົນກວ່າເກົ່າ ເປັນຕົ້ນ: ລັດວິສາຫະກິດໄຟຟ້າລາວ, ລັດວິສາຫະກິດການບິນລາວ ແລະ ອື່ນໆ. ຫັນການຊໍາລະລາຍຮັບຂອງບັນດາຫົວໜ່ວຍວິສາຫະກິດຂອງລັດ ແລະ ລັດຫຸ້ນສ່ວນໃຫ້ປະຕິບັດການແຈ້ງ – ການມອບລາຍຮັບປະເພດຕ່າງໆຜ່ານລະບົບທັນສະໄໝ ( Tax RIS ) ແລະ ຊໍາລະຜ່ານລະບົບທະນາຄານໃຫ້ຫຼາຍຂຶ້ນ.

ມອບໃຫ້ພາກສ່ວນກ່ຽວຂ້ອງໃນຂອບເຂດທົ່ວປະເທດຮີບຮ້ອນຈັດຕັ້ງຜັນຂະຫຍາຍບັນດາມາດຕະການ ແລະ ວຽກຈຸດສຸມທີ່ໄດ້ກໍານົດໄວ້ໃນແຈ້ງການສະບັບນີ້ ໂດຍສ້າງເປັນແຜນວຽກຢ່າງລະອຽດ. ພ້ອມດຽວກັນນີ້, ກໍຕ້ອງໄດ້ມີການຈັດຕັ້ງໜ່ວຍງານສະເພາະຂຶ້ນເພື່ອຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດຢ່າງໃກ້ຊິດເປັນແຕ່ລະໄລຍະ ພ້ອມລາຍງານໃຫ້ລັດຖະມົນຕີກະຊວງການເງິນຊາບຢ່າງເປັນປະຈໍາທຸກເດືອນ, ງວດ ແລະ ປີ.