ເມືອງຫົງສາ ເປີດບັ້ນການສອບເສັງຈົບຊັ້ນ ມ 7

448

ວັນທີ 29 – 30 ເດືອນກໍລະກົດນີ້, ນັກຮຽນມັດທະຍົມປາຍປີສຸດທ້າຍ ຫຼື ມ 7 ໃນທົ່ວເມືອງຫົງສາ ແຂວງໄຊຍະບູລີ ໄດ້ດຳເນີນການສອບເສັງຈົບຊັ້ນຂຶ້ນຢ່າງເປັນທາງການ ໂດຍການໃຫ້ກຽດເຂົ້າຮ່ວມ ພ້ອມເປີດຫົວບົດສອບເສັງຂອງ ທ່ານ ຄຳຫຼ້າ ຜິວວັນນາ ເຈົ້າເມືອງຫົງສາ, ມີຄະນະກຳມະການຈາກແຂວງ, ເມືອງ, ມີຜູ້ອໍານວຍການໂຮງຮຽນມັດທະຍົມພາຍໃນເມືອງ ພ້ອມດ້ວຍພະນັກງານຄູ – ອາຈານ ທີ່ເຮັດໜ້າທີ່ຮັບຜິດຊອບເປັນຄະນະກໍາມະການ, ຄວບຄຸມຫ້ອງສອບເສັງ ແລະ ນ້ອງນັກຮຽນຊັ້ນ ມ 7 ເຂົ້າຮ່ວມສອບເສັງ.

ທ່ານ ທອງສຸກ ປ້ອງຄຳ ຫົວໜ້າຫ້ອງການສຶກສາທິການ ແລະ ກີລາ ເມືອງຫົງສາ ຮອງປະທານການສອບເສັງຈົບຊັ້ນຂັ້ນເມືອງ ກ່າວວ່າ: ໃນທົ່ວເມືອງມີນັກສອບເສັງທັງໝົດ 266 ນ້ອງ ຍິງ 118 ນ້ອງ, ມາຈາກໂຮງຮຽນ 5 ແຫ່ງ ຄື: ໂຮງຮຽນ ມສ ຫົງສາ, ມສ ບ້ານຫານ, ມສ ນາປຸ່ງ, ມສ ຄົກແອກ ແລະ ມສ ພູແລ້ງ. ຈັດເປັນ 1 ສູນສອບເສັງ ຄື: ສູນ ມສ ຫົງສາ ມີ 15 ຫ້ອງສອບເສັງ, ຫ້ອງໜຶ່ງບັນຈຸນັກສອບເສັງໄດ້ປະມານ 16 – 18 ຄົນ, ມີຄະນະກໍາມະການຍາມຫ້ອງສອບເສັງທັງໝົດ 30 ຄົນ.

ສ່ວນບັນຫາຫົວບົດສອບເສັງນັ້ນທາງຄະນະກໍາມະການໄດ້ເອົາໃຈໃສ່ຢ່າງເຂັ້ມງວດເປັນພິເສດ, ທັງຮັບປະກັນຄວາມໂປ່ງໃສ ແລະ ເປັນເອກະພາບໃຊ້ 4 ວິຊາເຂົ້າສອບເສັງ ຄື: ວິຊາພາສາ ລາວ – ວັນນະຄະດີ, ຄະນິດສາດ, ຊີວະສາດ ແລະ ວິຊາພູມສາດ.

ການສອບເສັງຈົບຊັ້ນມັດທະຍົມປາຍສົກຮຽນ 2019 – 2020 ນີ້ ແມ່ນຄາດໝາຍຕ້ອງໃຫ້ບັນລຸ 98% ຂຶ້ນໄປ.