ເສດຖະກິດຂອງ ນວ ປີນີ້ຈະເຕີບໂຕໄດ້ພຽງ 6,3%

556

ປີ 2020 ເສດຖະກິດ ຂອງນະຄອນຫຼວງວຽງຈັນ ຈະຂະຫຍາຍຕົວຢູ່ໃນລະດັບ 6,3%, ຫຼຸດລົງຈາກ ແຜນການເບື້ອງຕົ້ນທີ່ຕັ້ງ ໄວ້ 9,5% ຍ້ອນໄດ້ຮັບຜົນກະທົບຈາກໄພທໍາມະຊາດ ເມື່ອປີ 2019 ຕໍ່ໃສ່ໄພແຫ້ງແລ້ງປີ 2020 ແລະ ຊໍ້າຕື່ມຈາກການລະບາດຂອງພະຍາດໂຄວິດ – 19.

ທ່ານ ສິນລະວົງ ຄຸດໄພທູນ ເຈົ້າຄອງ ນວ ໄດ້ລາຍກ່ຽວກັບຜົນຂອງການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ, ແຜນງົບປະມານປະຈຳ 6 ເດືອນຕົ້ນປີ ແລະ ທິດທາງແຜນການ ປະຈຳ 6 ເດືອນທ້າຍປີ ແລະ ການດັດແກ້ແຜນງົບປະມານປີ 2020 ຂອງ ນວ ຕໍ່ກອງປະຊຸມສະໄໝສາມັນ ເທື່ອທີ 9 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I ໃນວັນທີ 15 ກໍລະກົດ 2020 ວ່າ: ການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ 6 ເດືອນຕົ້ນປີ 2020 ແມ່ນດໍາເນີນໄປພາຍໃຕ້ສະພາບການພາຍໃນ ແລະ ພາຍນອກ ມີ ຄວາມຫຍຸ້ງຍາກເປັນຕົ້ນ ອັນເນື່ອງມາຈາກຜົນກະທົບຈາກໄພທໍາມະຊາດ ເມື່ອປີ 2019 ຕໍ່ໃສ່ໄພແຫ້ງແລ້ງປີ 2020 ແລະ ຊໍ້າຕື່ມຈາກການລະບາດຂອງພະຍາດໂຄວິດ – 19 ໄດ້ສົ່ງຜົນກະທົບທາງລົບຢ່າງໜັກໜ່ວງຕໍ່ການພັດທະນາເສດຖະກິດ – ສັງຄົມ ນວ ເວົ້າລວມ, ເວົ້າສະເພາະຕໍ່ຄາດໝາຍຕ່າງໆທີ່ມະຕິຂອງສະພາປະຊາຊົນ ນວ ເລກທີ 005/ສປນວ ລົງວັນທີ 14/2/2020 ກໍານົດໄວ້, ເຮັດໃຫ້ຜົນການຈັດຕັ້ງປະຕິບັດບັນດາຄາດໝາຍຂອງແຜນພັດທະນາເສດຖະກິດ – ສັງຄົມ 6 ເດືອນຕົ້ນປີ ບາງດ້ານບໍ່ສາມາດປະຕິບັດໄດ້.

ในภาพอาจจะมี ท้องฟ้า, เมฆ, ต้นไม้, ภูเขา, สถานที่กลางแจ้ง และธรรมชาติ

ການຂະຫຍາຍຕົວຂອງເສດຖະກິດ: ຄາດຄະເນໝົດປີ 2020 ຈະຂະຫຍາຍຕົວຢູ່ໃນລະດັບ 6,3% ( ສະພາປະຊາຊົນນະຄອນຫຼວງວຽງຈັນ ຮັບຮອງ 9,5% ), ຈະມີມູນຄ່າໃນປີປະມານ 52.509 ຕື້ກີບ ( ແຜນການວາງໄວ້ແມ່ນ 54.080 ຕື້ກີບ ), ສະເລ່ຍຕໍ່ຫົວຄົນຈະບັນລຸໄດ້ 6.004 ໂດລາສະຫະລັດ ( ແຜນການວາງໄວ້ແມ່ນ 6.120 ໂດລາສະຫະລັດ ).

ໃນນັ້ນຂະແໜງກະສິກໍາ ແລະ ປ່າໄມ້ ຄາດວ່າຈະຂະຫຍາຍຕົວໃນລະດັບ 3,2%, ຫຼຸດແຜນການ 1,3% ) ກວມເອົາ 14% ຂອງ GDP; ຂະແໜງອຸດສາຫະກໍາການກໍ່ສ້າງ: ຄາດວ່າຂະຫຍາຍຕົວໃນລະດັບ 7,8%, ຫຼຸດແຜນການ 4,7% ກວມເອົາ 49,4% ຂອງ GDP; ຂະແໜງບໍລິການ ແລະ ການຄ້າ ຄາດວ່າຂະຫຍາຍຕົວໃນລະດັບ 5,1%, ຫຼຸດແຜນການ 4,9% ກວມເອົາ 35,9% ຂອງ GDP; ພາສີອາກອນຜະລິດຕະພັນ ແລະ ນໍາເຂົ້າສຸດທິຄາດວ່າຂະຫຍາຍຕົວໃນລະດັບ 0,15% ກວມເອົາ 0,7% ຂອງ GDP.

ในภาพอาจจะมี ท้องฟ้า, ต้นไม้ และสถานที่กลางแจ้ง

ທ່ານ ສິນລະວົງ ຄຸດໄພທູນ ກ່າວຕື່ມວ່າ: ອີງຕາມການຕີລາຄາຂອງລັດຖະບານ ແລະ ກະຊວງສາທາລະນະສຸກ ໃຫ້ຮູ້ວ່າສະພາບການລະບາດຂອງພະຍາດໂຄວິດ – 19 ຍັງຈະແກ່ຍາວຈົນກວ່າຈະມີຢາວັກແຊັງປ້ອງກັນ ເຖິງວ່າປະເທດເຮົາກໍຄື ນວ ສາມາດປ້ອງກັນໄດ້ແລ້ວ ແຕ່ການລະບາດຂອງພະຍາດດັ່ງກ່າວທີ່ຍັງລະບາດຢູ່ໃນຫຼາຍປະເທດຍັງຈະສົ່ງຜົນກະທົບທາງລົບຕໍ່ການຈັດຕັ້ງແຜນພັດທະນາເສດຖະກິດ – ສັງຄົມ ແລະ ກະທົບຕໍ່ຊີວິດການເປັນຢູ່ຂອງປະຊາຊົນ ນວ ເປັນຕົ້ນ ດ້ານການລົງທຶນ ແລະ ການທ່ອງທ່ຽວຈາກຕ່າງປະເທດ, ການຊອກຫາຊ່ອງທາງໃໝ່ ຫຼື ການປັບປຸງ, ປັບຕົວ ແລະ ປ່ຽນແປງວິຖີຊີວິດໃໝ່ຂອງຫຼາຍທຸລະກິດໃນເງື່ອນໄຂໃໝ່ ອາດຈະຊັກຊ້າແກ່ຍາວ ແລະ ອື່ນໆ ແລະ ຄວາມຫຍຸ້ງຍາກທາງດ້ານການເງິນ – ເງິນຕາຂອງປະເທດເຮົາກໍເປັນອີກຜົນກະທົບໜຶ່ງຕໍ່ການພັດທະນາ ນວ.

ຈາກຜົນກະທົບຄືທີ່ກ່າວມານັ້ນທາງອົງການປົກຄອງ ນວ ຈຶ່ງໄດ້ສະເໜີຂໍດັດແກ້ຕົວເລກອັດຕາການເຕີບໂຕຂອງເສດຖະກິດ ( GDP ) ຈາກແຜນການທີ່ສະພາປະຊາຊົນນະຄອນຫຼວງວຽງຈັນ ໄດ້ຮັບຮອງ 9,5% ມາເປັນ 6,3%.

-ດັດແກ້ຕົວເລກມູນຄ່າລວມຍອດຜະລິດຕະພັນພາຍໃນ ( GDP ) ຈາກ 54.080 ຕື້ກີບ ມາເປັນ 52.509 ຕື້ກີບ.

-ດັດແກ້ຕົວເລກ ( GDP ) ສະເລ່ຍຕໍ່ຫົວຄົນ ຈາກ 6.120 ໂດລາ ມາເປັນ 6.004 ໂດລາ.

-ດັດແກ້ອັດຕາເພີ່ມຂອງຂະແໜງກະສິກໍາ – ປ່າໄມ້ຈາກ 4,5% ລົງມາເປັນ 3,2% ກວມເອົາ 14,1% ຂອງ GDP.

-ດັດແກ້ອັດຕາເພີ່ມຂອງຂະແໜງອຸດສາຫະກໍາຈາກ 12,5% ລົງມາເປັນ 7,8% ກວມເອົາ 49,4% ຂອງ GDP.

-ດັດແກ້ອັດຕາເພີ່ມ ຂອງຂະແໜງການບໍລິການ ( ລວມທັງພາສີ – ອາກອນຜະລິດຕະພັນສຸດທິ ) ຈາກ 10% ລົງມາເປັນ 5,1% ກວມເອົາ 36,5% ຂອງ GDP.

-ດັດແກ້ຫຼຸດແຜນລາຍຮັບຕາມແຜນສະພາປະຊາຊົນ ນະຄອນຫຼວງວຽງຈັນ ຮັບຮອງຈາກ 5.245,78 ຕື້ກີບ ມາເປັນ 4.044,46 ຕື້ກີບ ( ຫຼຸດລົງ 1.201,32 ຕື້ກີບ ).

ในภาพอาจจะมี ท้องฟ้า, รถยนต์, เมฆ, ต้นไม้ และสถานที่กลางแจ้ง

-ດັດແກ້ຫຼຸດແຜນລາຍຈ່າຍຂອງ ນວ ຕາມແຜນສະພາປະຊາຊົນ ນະຄອນຫຼວງວຽງຈັນ ຮັບຮອງ ຈາກ ( 702,15 ຕື້ກີບ ) ມາເປັນ 669,84 ຕື້ກີບ ( ຫຼຸດລົງ 32,31 ຕື້ກີບ ), ໃນນັ້ນ: ດັດແກ້ຫຼຸດລາຍຈ່າຍບໍລິຫານປົກກະຕິ ຈາກ 551,28 ຕື້ກີບ ມາເປັນ 549,35 ຕື້ກີບ ( ຫຼຸດລົງ 1,93 ຕື້ກີບ ) ແລະ ດັດແກ້ລາຍຈ່າຍໃນການລົງທຶນ ຈາກ 150,87 ຕື້ກີບ ມາເປັນ 120,49 ຕື້ກີບ ( ຫຼຸດບ້ວງທຶນອື່ນໆລົງ 30,38 ຕື້ກີບ ).

-ດັດແກ້ຕົວເລກນັກທ່ອງທ່ຽວຈາກແຜນການທີ່ສະພາປະຊາຊົນນະຄອນຫຼວງວຽງຈັນ ໄດ້ຮັບຮອງ 2.000.000 ເທື່ອຄົນ ມາເປັນ 685.600 ເທື່ອຄົນ.

-ສະເໜີດັດແກ້ຕົວເລກຄາດໝາຍດໍາເນີນການສໍາຫຼວດພິສູດຫຼັກຖານ ຂຶ້ນທະບຽນອອກໃບຕາດິນຈາກແຜນການທີ່ສະພາປະຊາຊົນນະຄອນຫຼວງວຽງຈັນ ໄດ້ຮັບຮອງ 80.000 ຕອນ ມາເປັນ 40.600 ຕອນ.

-ດັດແກ້ຕົວເລກຄາດໝາຍສະແກນເອກະສານສໍານວນຕອນດິນຢູ່ໃນສາງ ແລະ ປ້ອນຂໍ້ມູນເຂົ້າຄອມພິວເຕີຈາກແຜນການທີ່ສະພາປະຊາຊົນນະຄອນຫຼວງວຽງຈັນ ໄດ້ຮັບຮອງ 18.000 ຕອນ ມາເປັນ 9.000 ຕອນ.