ຝຶກອົບຮົມການຄຸ້ມຄອງວິທະຍາສາດ ແລະ ເຕັກໂນໂລຊີ ສຳລັບພະນັກງານລະດັບສູງ.

630

ກະຊວງວິທະຍາສາດ ແລະ ເຕັກໂນໂລຊີ (ກວຕ) ເປີດຝຶກອົບຮົມວຽກງານການຄຸ້ມຄອງວິທະຍາສາດ ແລະ ເຕັກໂນໂລຊີ ສຳລັບພະນັກງານຕຳແໜ່ງບໍລິຫານລະດັບສູງ (ປະເພດ 3). ຈຸດປະສົງກໍ່ເພື່ອ ຖ່າຍທອດຄວາມຮູ້ກ່ຽວກັບການຄຸ້ມຄອງວິທະຍາສາດ ແລະ ເຕັກໂນໂລຊີ, ສ້າງທັກສະໃນການນຳພາວຽກງານ ທັງເປັນການຍົກລະດັບຄວາມຮູ້-ຄວາມສາມາດໃນການປະຕິບັດໜ້າທີ່ວຽກງານທີ່ໄດ້ມອບໝາຍ ແນໃສ່ເຮັດໃຫ້ໄດ້ຮຽນຮູ້ ແລະ ເພີ່ມຄວາມເຂົ້າໃຈດ້ານທິດສະດີ, ຫຼັກການ ແລະ ແຜນພັດທະນາກ່ຽວກັບວຽກງານການຄຸ້ມຄອງວິທະຍາສາດ ແລະ ເຕັກໂນໂລຊີ ຂອງ ສປປ ລາວ.      ຊຸດຝຶກອົບຮົມໃນຄັ້ງນີ້ມີຫຼາຍຫົວຂໍ້ຄື: ການພັດທະນາວິທະຍາສາດ ແລະ ເຕັກໂນໂລຊີ ຂອງໂລກ ແລະ ຂອງ ສປປ ລາວ; ການຄຸ້ມຄອງລັດວຽກງານວິທະຍາສາດ ແລະ ລັງສີ-ນິວເຄຼຍ; ການຄຸ້ມຄອງວຽກງານແຜນການວິທະຍາສາດ ແລະ ເຕັກໂນໂລຊີ; ການຄຸ້ມຄອງລັດກ່ຽວກັບວຽກງານເຕັກໂນໂລຊີ ແລະ ນະວັດຕະກຳ; ການຄຸ້ມຄອງລັດກ່ຽວກັບມາດຕະຖານ ແລະ ວັດແທກ; ການຄຸ້ມຄອງຊັບພະຍາ ກອນມະນຸດໃນຂະແໜງວິທະຍາສາດ ແລະ ເຕັກໂນໂລຊີ; ການຄຸ້ມຄອງວຽກງານວິທະຍາສາດ ແລະ ເຕັກໂນໂລຊີຢູ່ທ້ອງຖິ່ນ.

ທ່າແຮງບົ່ມຊ້ອນຂອງວິທະຍາສາດ ແລະ ເຕັກໂນໂລຊີ; ການຄຸ້ມຄອງລັດກ່ຽວກັບວຽກງານເຕັກໂນໂລຊີດິຈິຕ໋ອລ; ການຄຸ້ມຄອງກອງທຶນພັດທະນາວິທະຍາສາດ ແລະ ເຕັກໂນໂລຊີ; ການຄຸ້ມຄອງລັດກ່ຽວກັບວຽກງານຊັບສິນທາງປັນຍາ; ວຽກງານຄົ້ນຄວ້ານິເວດວິທະຍາ ແລະ ເຕັກໂນໂລຊີ ຊີວະພາບ; ວຽກງານການຄົ້ນຄວ້າພະລັງງານທົດແທນ ແລະ ວັດສະດຸໃໝ່; ວຽກງານການຄົ້ນຄວ້າ ເຕັກໂນໂລຊີຄອມພິວເຕີ ແລະ ເອເລັກໂຕຣນິກ; ວຽກງານກວດກາລັດຂະແໜງວິທະຍາສາດ ແລະ ເຕັກໂນໂລຊີ ແລະ ການຮຽນຮູ້ການເປັນຜູ້ນຳ.

ໂອກາດນີ້, ທ່ານ ລັດຖະມົນຕີ ກວຕ ກໍໄດ້ໃຫ້ກຽດຂຶ້ນບັນລະຍາຍໃນຫົວຂໍ້໊ ການພັດທະນາວິທະຍາສາດ ແລະ ເຕັກໂນໂລຊີຂອງໂລກ ແລະ ຂອງ ສປປ ລາວ ໂດຍສະເພາະແມ່ນການປະຕິວັດອຸດສາຫະກຳ ຄັ້ງທີ 4 ທີ່ເປັນກາລະໂອກາດ ແລະ ສິ່ງທ້າທາຍ ເຊິ່ງທ່ານໄດ້ຍົກໃຫ້ເຫັນປະຫວັດຄວາມເປັນມາຂອງການປະຕິວັດອຸດສາຫະກຳໃນແຕ່ລະໄລຍະ; ຜົນສະທ້ອນຂອງຍຸກອຸດສາຫະກຳ 4.0; ການພັດທະນາວິທະຍາສາດ ແລະ ເຕັກໂນໂລຊີຂອງບັນດາປະເທດໃນໂລກ; ບາດກ້າວການພັດທະນາສູ່ຍຸກອຸດສາຫະກຳ 4.0 ຂອງບັນດາປະເທດອາຊຽນ; ບັນຫາປັດໄຈພື້ນຖານເພື່ອຮອງຮັບອຸດສາຫະກຳ 4.0 ຂອງ ສປປ ລາວ ແລະ ມາດຕະການສຳລັບ ສປປ ລາວ ເພື່ອຮັບຮອງການປະຕິວັດອຸດສາຫະກຳຄັ້ງທີ 4.

ຊຸດຝຶກອົບຮົມດັ່ງກ່າວ, ຈັດຂຶ້ນໃນວັນທີ 13 ກໍລະກົດ 2020, ທີ່ຫ້ອງປະຊຸມສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ກະຊວງວິທະຍາສາດ ແລະ ເຕັກໂນໂລຊີ (ກວຕ) ເຊິ່ງໄດ້ດຳ ເນີນເປັນເວລາ 5 ວັນ ນັບຕັ້ງແຕ່ວັນທີ 13-18 ກໍລະກົດ 2020. ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ມີຫົວໜ້າຫ້ອງ ການ, ກົມ, ສະຖາບັນ ແລະ ບັນດາຫົວໜ້າພະແນກວິທະຍາສາດ ແລະ ເຕັກໂນໂລຊີ ໃນຂອບເຂດທົ່ວປະເທດເຂົ້າຮ່ວມ.