ທຳລາຍຢາສູບນໍາເຂົ້າບໍ່ຖືກຕ້ອງ ມູນຄ່າ 280 ລ້ານກີບ

604

ກົມພາສີກະຊວງການເງິນ ໄດ້ຈັດພິທີທຳລາຍຢາສູບຢູ່ສະໜາມບໍາບັດຂີ້ເຫຍື້ອຫຼັກ 32 ຈຳນວນ 107 ແກັດ ມູນຄ່າເກືອບ 280 ລ້ານກີບ ທີ່ລັກລອບນຳເຂົ້າບໍ່ຖືກຕ້ອງ ໂດຍການເຂົ້າຮ່ວມຂອງ ທ່ານ ວົງຄຳແຫງ ວົງທະຈັກ ຮອງຫົວໜ້າກົມພາສີກະຊວງການເງິນ, ມີຕາງໜ້າຈາກກະຊວງອຸດສາຫະກຳການຄ້າ, ຫ້ອງການກະຊວງການເງິນ, ບໍລິສັດຢາສູບລາວ, ເຈົ້າໜ້າທີ່ພາສີ ແລະ ສື່ມວນຊົນເຂົ້າຮ່ວມ.

ທ່ານ ພອນສະຫວັນ ທຳມະສິດ ຫົວໜ້າພະແນກສືບສວນ – ສອບສວນ ແລະ ປາບປາມການລັກລອບໜີພາສີ ກົມພາສີກະຊວງການເງິນ ໃຫ້ຮູ້ວ່າ: ຢາສູບທີ່ນຳໄປທຳລາຍຖິ້ມໃນຄັ້ງນີ້ແມ່ນໄດ້ຈາກການຢຶດ, ຮິບສິນຄ້າທີ່ລັກລອບນຳເຂົ້າ ເຊິ່ງເປັນສິນຄ້າປະເພດລັດຄວບຄຸມຕາມກົດໝາຍພາສີ, ທັງເປັນສິນຄ້າທີ່ບໍ່ໄດ້ເສຍພາສີ – ອາກອນ, ບໍ່ມີເຄື່ອງໝາຍການຄ້າ, ບໍ່ໄດ້ຕິດສະແຕັມ, ບໍ່ມີຄຳແນະນຳ ຫຼື ຄຳເຕືອນໃດໆ ເຊິ່ງອາດຈະມີໄພອັນຕະລາຍຕໍ່ສຸຂະພາບຜູ້ບໍລິໂພກ.

ສິນຄ້າດັ່ງກ່າວ, ໄດ້ລັກ ລອບເຄື່ອນຍ້າຍມາທາງເລກທີ 13 ໃຕ້ ດ້ວຍລົດຕູ້ໃສ່ປ້າຍລັດ ( ປອມແປງ ) ເຊິ່ງເຈົ້າໜ້າທີ່ພາສີໄດ້ທຳການກວດກາຈັບກຸມ ແລະ ສ້າງບົດບັນທຶກຢຶດສິນຄ້າໃນຄັ້ງວັນທີ 23 ກໍລະກົດ 2019, ຢາສູບດັ່ງກ່າວປະກອບມີ: ຍີ່ຫໍ້ມາໂບໂລ 45 ແກັດ, ຍີ່ຫໍ້ເທັກຊັດ 35 ແກັດ, ຍີ່ຫໍ້ອີຊີເຈນ 12 ແກັດ, ຍີ່ຫໍ້ ເຊເວນພິນເຈນ 20 ແກັດ ລວມທັງໝົດ 107 ແກັດ ( 5.350 ຕຸດ ) ຄິດເປັນມູນຄ່າທັງໝົດເກືອບ 280 ລ້ານກີບ.

ໂອກາດດັ່ງກ່າວ, ທ່ານ ວົງຄຳແຫງ ວົງທະຈັກ ກ່າວຕື່ມວ່າ: ໃນທົ່ວປະເທດມີທັງໝົດ 20.478 ຄະດີ, ສະສາງແລ້ວ 20.225 ຄະດີ, ຄ້າງສະສາງ 253 ຄະດີ. ໃນນັ້ນ, ຄະດີທີ່ເກີດຂຶ້ນຢູ່ສູນກາງ 435 ຄະດີ, ສະສາງແລ້ວ 374 ຄະດີ, ຄ້າງສະສາງ 61 ຄະດີ ( ກຳລັງດຳເນີນການ ). ສາມາດປະຕິບັດລາຍຮັບພາສີ – ອາກອນ 5.817 ຕື້ກວ່າກີບ ເທົ່າກັບ 12,99% ຂອງແຜນການປີ, ຄາດໝາຍຈະສູ້ຊົນປະຕິບັດໃຫ້ໄດ້ 32% ຂອງແຜນການປີ.

ສຳລັບຄະດີທີ່ເກີດຂຶ້ນສ່ວນຫຼາຍແມ່ນຄະດີໄມ້, ພາຫະນະນຳເຂົ້າບໍ່ຖືກຕ້ອງ, ການເຄື່ອນຍ້າຍນ້ຳມັນເຊື້ອໄຟ, ເຄື່ອງໄຟຟ້າ, ເຄື່ອງອຸປະໂພກ – ບໍລິໂພກ ແລະ ອື່ນໆ. ພິທີທໍາລາຍໄດ້ຈັດຂຶ້ນໃນວັນທີ 9 ກໍລະກົດ 2020 ຜ່ານມານີ້ ຢູ່ສະໜາມບໍາບັດຂີ້ເຫຍື້ອ ຫຼັກ 32 ນະຄອນຫຼວງວຽງຈັນ.

( ເນື້ອໃນ – ຮູບ: ກະຊວງການເງິນ )