ນວ ປ່ອຍປາເກືອບ 2 ແສນໂຕ ລົງສູ່ຄອງນ້ຳວຽງຈັນ

559

ນະຄອນຫຼວງວຽງຈັນ ວາງເປົ້າປ່ອຍປາຄືນສູ່ທຳມະຊາດຫຼາຍກວ່າ 1 ລ້ານໂຕ ໂດຍກໍານົດ 12 ຈຸດ ໃຫ້ສິ້ນສຸດພາຍໃນເດືອນກັນຍາທີ່ຈະມາເຖິງ, ສ່ວນການລ້ຽງປາເພື່ອຄໍ້າປະກັນສະບຽງອາຫານຂອງຜູ້ປະກອບການ ແລະ ພໍ່ແມ່ປະຊາຊົນ ຄາດຄະເນຈະປ່ອຍໃນໜອງນໍ້າ ແລະ ກະຊັງ ຈໍານວນ 150 ລ້ານໂຕ.

ໃນວັນທີ 13 ກໍລະກົດ 2020 ກົມລ້ຽງສັດ ແລະ ການປະມົງ, ກະຊວງກະສິກຳ ແລະ ປ່າໄມ້ ( ກປ ) ຮ່ວມກັບ ພະແນກ ກປ ຈັດພິທີປ່ອຍປາ 1,8 ແສນໂຕ ລົງຄອງນ້ຳວຽງຈັນ ບ້ານດອນກອຍ ເມືອງສີສັດຕະນາກ ນະຄອນຫຼວງວຽງຈັນ.

ທ່ານ ຫຼ້າສາຍ ນວນທາສິງ ຫົວໜ້າພະແນກ ກປ.ນວ ກ່າວວ່າ: ກິດຈະກໍາປ່ອຍປາໃນຄັ້ງນີ້ ເພື່ອການສະເຫຼີມສະຫຼອງວັນປ່ອຍປາ ແລະ ອະນຸຮັກສັດ ນໍ້າ – ສັດປ່າແຫ່ງຊາດ 13 ກໍລະກົດ ປະຈຳປີ 2020 ແລະ ທັງເປັນຄ້າຍວັນເກີດຂອງ ປະທານ ສຸພານຸວົງ ຄົບຮອບ 111 ປີ ນະຄອນຫຼວງວຽງຈັນ ໄດ້ສືບຕໍ່ເປີດຂະບວນການສະເຫຼີມສະຫຼອງວັນປ່ອຍປາ ແລະ ອະນຸຮັກສັດນໍ້າ – ສັດປ່າໃຫ້ເປັນຂະບວນຟົດຟື້ນ ປະກອບສ່ວນສ້າງຜົນງານຕ້ອນຮັບກອງປະຊຸມໃຫຍ່ຂອງອົງຄະນະພັກນະຄອນຫຼວງວຽງຈັນ ແລະ ວັນສຳຄັນຂອງຊາດ, ບັນດາເມືອງ ແລະ ອົງການປົກຄອງບ້ານຈະຈັດພິທີປ່ອຍປາຄືນສູ່ທຳມະຊາດຢູ່ 12 ແຫ່ງ ເລີ່ມແຕ່ວັນທີ 10 ກໍລະກົດ 2020 ຈົນຮອດເດືອນກັນຍາ ຄາດວ່າຈະປ່ອຍປາຄືນສູ່ທຳມະຊາດຫຼາຍກວ່າ 1 ລ້ານໂຕ, ຜະລິດປານ້ອຍ ໃຫ້ໄດ້ 29 – 30 ລ້ານໂຕ, ປ່ອຍປາໃນໜອງ ແລະ ໃນກະຊັງ ປະມານ 150 ລ້ານໂຕ ເພື່ອເປັນສະບຽງອາຫານ ແລະ ເປັນສິນຄ້າ. ທັງນີ້, ສະເພາະການປ່ອຍປາຢູ່ທີ່ຄອງນ້ຳວຽງຈັນ ບ້ານດອນກອຍ ເມືອງສີສັດຕະນາກ ມີທັງໝົດ 1,8 ແສນໂຕ ປະກອບມີຄື: ປາກິນຫຍ້າ, ປາປາກ, ປາທຳມະຊາດ, ເຕົ່າ 27 ໂຕ ແລະ ສັດອື່ນໆອີກຈຳນວນໜຶ່ງ.

ທ່ານ ຫຼ້າສາຍ ນວນທາສິງ ໃຫ້ຮູ້ຕື່ມອີກວ່າ: ຕາມການປະເມີນຂອງຄະນະກຳມະການແມ່ນໍ້າຂອງສາກົນ ແລະ ກະຊວງ ກປ ມີຜົນຜະລິດປາທຳມະຊາດ 167.922 ໂຕນຕໍ່ປີ, ສັດນໍ້າອື່ນໆ ປະມານ 40.581 ໂຕນຕໍ່ປີ ມີມູນຄ່າລວມຫຼາຍກວ່າ 150 ລ້ານໂດລາຕໍ່ປີ, ປະຊາຊົນບັນດາເຜົ່າຢູ່ເຂດຊົນນະບົດຫຼາຍກວ່າ 75% ບໍລິໂພກປາ ແລະ ສັດນໍ້າປະເພດຕ່າງໆເປັນອາຫານແຫຼ່ງໂປຣຕິນ. ເວົ້າສະເພາະນະຄອນຫຼວງວຽງຈັນ ຜົນຜະລິດປາ ແລະ ສັດນໍ້າ ກວມປະມານ 5% ຂອງ GDP, ໃນປີ 2019 ຜ່ານມາມີອັດຕາການເຕີບໂຕປະມານ 4,6% ແລະ ສະໜອງປາ ສະເລ່ຍປະມານ 73,2 ໂຕນຕໍ່ມື້ ແລະ ຜະລິດປານ້ອຍ ໄດ້ປະມານ 29 – 30 ລ້ານໂຕຕໍ່ປີ.