ປະຊາຊົນແຂວງອຸດົມໄຊໄດ້ຊົມໃຊ້ໄຟຟ້າ ກວມ 90%

484

ທ່ານ ອາລຸນ ບຸນວິໄລ ຫົວໜ້າພະແນກພະລັງງານ ແລະ ບໍ່ແຮ່ ແຂວງອຸດົມໄຊ ກ່າວວ່າ: ເຖິງວ່າໃນຊຸມປີຜ່ານມາ ແຂວງອຸດົມໄຊ ຈະປະສົບກັບຄວາມທ້າທາຍໃນຫຼາຍດ້ານກໍຕາມ. ແຕ່ຄະນະພັກ, ຄະນະນຳຂັ້ນແຂວງ ສົມທົບກັບທຸກພາກສ່ວນ ເປັນເຈົ້າການຮ່ວມກັນໃນການພັດທະນາວຽກງານພະລັງງານ ແລະ ບໍ່ແຮ່ ມາເຖິງປັດຈຸບັນນີ້ທົ່ວແຂວງອຸດົມໄຊ ມີແຫຼ່ງຜະລິດພະລັງງານໄຟຟ້າທັງໝົດ 4 ແຫ່ງ, ມີກຳລັງຕິດຕັ້ງ 52,85 ເມກາວັດ ສາມາດຜະລິດພະລັງງານໄຟຟ້າໄດ້ 208 ລ້ານກິໂລວັດໂມງຕໍ່ປີ, ສາມາດສະໜອງໄຟຟ້າທົ່ວເທສະບານແຂວງ ແລະ ເທສະບານ 7 ເມືອງ ໄດ້ 100%, ມີ 429 ບ້ານທີ່ໄດ້ຊົມໃຊ້ໄຟຟ້າ ກວມ 90,89%.

ດ້ານວຽກງານທໍລະນີສາດ ແລະ ບໍ່ແຮ່ ສາມາດສໍາຫຼວດສ້າງແຜນທີ່ທໍລະນີສາດ – ແຮ່ທາດພື້ນຖານສຳເລັດແລ້ວ 100% ຂອງເນື້ອທີ່ທົ່ວແຂວງ, ພົບຈຸດປາກົດແຮ່ທາດໃໝ່ 13 ຈຸດ ເຊິ່ງປະກອບມີທັງຄໍາ, ທອງ, ພາຍຣາຍ, ເຫຼັກ, ຫີນກາວ, ເກືອ ແລະ ຫີນບາຣິດ, ມີບໍລິສັດທີ່ໄດ້ຮັບອະນຸຍາດຊອກຄົ້ນ, ສຳຫຼວດ ແລະ ຂຸດຄົ້ນແຮ່ທາດ ທັງຂັ້ນສູນກາງ ແລະ ຂັ້ນແຂວງ ຈຳນວນ 43 ບໍລິສັດ.

[ ບົດ – ຂ່າວ: ຄານມະນີ ຮຽນດໍຈັນ ]