ທໍາລາຍຜັກນໍາເຂົ້າບໍ່ຖືກຕ້ອງ

464

ການນຳເຂົ້າພືດຜັກບໍ່ຖືກຕ້ອງຍັງປາກົດມີໃຫ້ເຫັນ ເຖິງວ່າປັດຈຸບັນຈະມີການປິດດ່ານທ້ອງຖິ່ນ, ດ່ານປະເພນີ ແລະ ອະນຸຍາດໃຫ້ແຕ່ລົດຂົນສົ່ງສິນຄ້າຜ່ານດ່ານສາກົນເທົ່ານັ້ນ ບັນຫາດັ່ງກ່າວສົ່ງຜົນກະທົບຕໍ່ການຜະລິດພາຍໃນ ແລະ ທີ່ສໍາຄັນຜັກທີ່ລັກນໍາເຂົ້າອາດເປັນອັນຕະລາຍຕໍ່ຜູ້ບໍລິໂພກ.

ໃນວັນທີ 3 ກໍລະກົດ 2020 ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ( ອຄ.ນວ ) ໄດ້ຈັດພິທີທຳລາຍພືດຜັກທີ່ຢຶດມາໄດ້ຈາກການລັກລອບນຳເຂົ້າແບບບໍ່ຖືກຕ້ອງ ໂດຍການເຂົ້າຮ່ວມຂອງ ທ່ານ ນັນຕາ ສານຸວົງ ຮອງຫົວໜ້າພະແນກ ອຄ.ນວ ພ້ອມດ້ວຍເຈົ້າໜ້າທີ່ກ່ຽວຂ້ອງເຂົ້າຮ່ວມທີ່ພະແນກດັ່ງກ່າວ.

ในภาพอาจจะมี หนึ่งคนขึ้นไป, งานแต่งงาน, ต้นพืช, สถานที่กลางแจ้ง และอาหาร

ໃນພິທີ ທ່ານ ນັນຕາ ສານຸວົງ ໄດ້ກ່າວວ່າ: ເພື່ອຕ້ານ ແລະ ສະກັດກັ້ນການຄ້າຂາຍເຖື່ອນ – ຄ້າຂາຍນອກລະບົບທຸກຮູບແບບ, ໃນໄລຍະຜ່ານມາ ອຄ.ນວ ໄດ້ເອົາໃຈໃສ່ໃນການຕິດຕາມກວດກາຢ່າງເປັນປະຈຳ ໂດຍໄດ້ສຸ່ມກວດລົດຂົນສົ່ງສິນຄ້າ, ຕະຫຼາດຈຳໜ່າຍ ແລະ ຈຸດຕ່າງໆ ເຊິ່ງໃນວັນທີ 29 ມິຖຸນາ 2020 ຜ່ານມາ ໄດ້ສົມທົບກັບຫ້ອງການຈັດສັນຕະຫຼາດລາວອົດຊີ – ເອີຣົບ ເມືອງສີໂຄດຕະບອງ ລົງກວດກາການຈຳໜ່າຍພືດຜັກຢູ່ພາຍໃນຕະຫຼາດ ຜ່ານການກວດກາແມ່ນພົບເຫັນພືດຜັກທີ່ນຳເຂົ້າຈາກຕ່າງປະເທດໂດຍບໍ່ມີເອກະສານຢັ້ງຢືນແຫຼ່ງທີ່ມາ ເປັນຕົ້ນ: ບໍ່ມີໃບແຈ້ງເສຍພາສີ, ບໍ່ໄດ້ຜ່ານການກວດກາ ແລະ ວິໄຈຫາສານປົນເປື້ອນຈາກພາກສ່ວນກະສິກຳ ຈຳນວນ 230 ກິໂລ ເຊິ່ງມີຜັກບົ້ງ ແລະ ຜັກບົ່ວໃບ ຄິດເປັນມູນຄ່າ 5.750.000 ກີບ. ສະນັ້ນ, ທາງເຈົ້າໜ້າທີ່ກວດກາການຄ້າພະແນກ ອຄ.ນວ ຈຶ່ງໄດ້ຢຶດຜັກຈຳນວນດັ່ງກ່າວ ແລະ ຈັດພິທີທຳລາຍຖິ້ມ.

ທ່ານກ່າວຕື່ມວ່າ: ການທຳລາຍພືດຜັກນຳເຂົ້າບໍ່ຖືກຕ້ອງຄັ້ງນີ້ກໍເພື່ອແນໃສ່ສະກັດກັ້ນການນຳເຂົ້າບໍ່ຖືກຕ້ອງຕາມລະບຽບການ ແລະ ເປັນການປົກປ້ອງຜົນປະໂຫຍດຂອງຜູ້ບໍລິໂພກໃຫ້ໄດ້ບໍລິໂພກສິນຄ້າທີ່ມີຄຸນນະພາບ ແລະ ບໍ່ເປັນອັນຕະລາຍຕໍ່ຊີວິດ ແລະ ສຳຄັນແມ່ນເປັນການປົກປ້ອງການຜະລິດພາຍໃນ ຍົກສູງສະຕິໃນການເລືອກຊື້ສິນຄ້າຂອງຜູ້ບໍລິໂພກ ແລະ ສະຕິໃນການເຄົາລົບລະບຽບກົດໝາຍຂອງຜູ້ຂາຍ.