ສະຕາ ຟິນເທັກ ຈັບມື ເຈດີບີ ລົງນາມ MOU ການຮ່ວມມືເຊື່ອມຕໍ່ການຊຳລະ

603

ບໍລິສັດ ສະຕາ ຟິນເທັກ ຈຳກັດຜູ້ດຽວ ຮ່ວມກັບ ທະນາຄານ ຮ່ວມພັດທະນາ (JDB) ຈັດພິທີເຊັນບົດບັນທຶກຄວາມເຂົ້າໃຈການຮ່ວມມືເຊື່ອມຕໍ່ການຊຳລະຮ່ວມກັນ. ຈຸດປະສົງກໍ່ເພື່ອຄົ້ນຄ້ວາການຮ່ວມມືໃນການເປີດກ້ວາງການເຂົ້າເຖິງບໍລິການດ້ານການທະນາຄານໃຫ້ສະດວກ-ວ່ອງໄວຍິ່ງຂຶ້ນ ບໍ່ວ່າຈະເປັນລູກຄ້າ ທີ່ມີບັນຊີກະເປົາເງິນເອເລັກໂທນິກ ຢູມັນນີ (u – money) ກໍ່ສາມາດໂອນເງິນເຂົ້າບັນຊີໂດຍກົງຂອງທະນາຄານຮ່ວມພັດທະນາ.

ບໍລິສັດ ສະຕາ ຟີນເທັກຈຳກັດຜູ້ດຽວ ພາຍໃຕ້ເຄື່ອງໝາຍການຄ້າ u-money, ເປັນບໍລິສັດໃນເຄືອຂອງບໍລິສັດ ສະຕາໂທລະຄົມ ເຊິ່ງໄດ້ຮັບອະນຸຍາດຈາກທະນາຄານແຫ່ງ ສປປ ລາວ ໃນການສະ ໜອງບໍລິການດ້ານກະເປົາເອເລັກໂທຣນິກຢ່າງເປັນທາງການ ໂດຍການໃຫ້ບໍລິການດັ່ງກ່າວນີ້ ຈະເພີ່ມຄວາມສະດວກໃຫ້ແກ່ລູກຄ້າຂອງ unitel ກ່ວາ 3 ລ້ານລູກຄ້າເຂົ້າເຖິງທະນາຄານແບບດີຈິຕອລໄດ້ຢ່າງງ່າຍດາຍທີ່ສຸດ.

ຄຽງຄູ່ກັນນັ້ນ, ຍັງເປັນອີກໜຶ່ງຍຸດທະສາດການພັດທະນາຂອງ ບໍລິສັດ ສະຕາ ຟິນເທັກ ຈຳກັດ ແລະ ທະນາຄານ ຮ່ວມພັດທະນາ ເພື່ອຕອບສະໜອງຄວາມຕ້ອງການຂອງລູກຄ້າ ແລະ ທັງສອງຝ່າຍຍັງຈະສືບຕໍ່ຄົ້ນຄ້ວາການຮ່ວມມືອື່ນໆທີ່ເປັນປະໂຫຍດໃນອານາຄົດ.

ສໍາລັບເປົ້າໝາຍຫຼັກຂອງການຮ່ວມມືກັນໃນຄັ້ງນີ້ ກໍ່ເພື່ອຄົ້ນຄ້ວາການຮ່ວມມືໃນການເປີດກ້ວາງການເຂົ້າເຖິງບໍລິການ ບໍ່ວ່າຈະເປັນລູກຄ້າທີ່ມີບັນຊີກະເປົ໋າເງິນເອເລັກໂທນິກ ຢູມັນນີ (u – money) ກໍ່ສາມາດໂອນເງິນເຂົ້າບັນຊີໂດຍກົງຂອງທະນາຄານຮ່ວມພັດທະນາ. ຂະນະດຽວກັນ, ບັນຊີທະນາຄານຮ່ວມພັດທະນາ ກໍ່ສາມາດໂອນເງິນເຂົ້າບັນຊີກະເປົ໋າເງິນເອເລັກໂທນິກ u-money ໄດ້ເຊັ່ນດຽວກັນ ເຊິ່ງຈະເຮັດໃຫ້ມີຄວາມງ່າຍຕໍ່ການເຮັດທຸລະກໍາການຊຳລະ ແລະ ການໃຊ້ບໍລິການຕ່າງໆຂອງທັງສອງຝ່າຍ ບໍ່ວ່າຈະເປັນການໂອນເງິນ, ການຊໍາລະຄ່າບໍລິການຕ່າງໆໄດ້ຢ່າງງ່າຍດາຍ ແລະ ວ່ອງໄວ.

ພິທີດັ່ງກ່າວ, ຈັດຂຶ້ນໃນຕອນບ່າຍ ວັນທີ 25 ມິຖຸນາ 2020, ຢູ່ທີ່ສໍານັກງານໃຫຍ່ບໍລິສັດ ສະຕາ ໂທລະຄົມ ເຊິ່ງເປັນການລົງນາມຂອງ ທ່ານ ຄຳຊູ ຢ່າງ ຮອງຜູ້ອຳນວຍການໃຫຍ່, ຜູ້ຊີ້ນຳວຽກງານການຕະຫຼາດທະນາຄານຮ່ວມພັດທະນາ ແລະ ທ່ານ ເຈິນ ມິງ ດຶກ ຮອງອຳນວຍການບໍລິສັດສະຕາ ຟິນເທັກ ຈຳກັດຜູ້ດຽວ ແລະ ໃຫ້ກຽດເຂົ້າຮ່ວມເປັນສັກຂີພິຍານໂດຍ ທ່ານ ສຸລິສັກ ທໍານຸວົງ ຫົວໜ້າກົມຄຸ້ມຄອງ ລະບົບຊໍາລະສະສາງ ທະນາຄານ ແຫ່ງ ສປປ ລາວ ພ້ອມດ້ວຍຄະນະຜູ້ບໍລິຫານທັງສອງຝ່າຍ ຕະຫຼອດຮອດພະນັກງານ ແລະ ສື່ມວນຊົນເຂົ້າຮ່ວມຢ່າງພ້ອມພຽງ.