ທ່ອງທ່ຽວລາວສະກາຍເວ ມີແຜນຈະເປີດບໍລິການຂົນສົ່ງທາງອາກາດໃນໄວໆນີ້.

929

ເຖິງວ່າທຸລະກິດທ່ອງທ່ຽວໃນບ້ານເຮົາຈະຢູ່ໃນຊ້ວງຢຸກສະງັກກໍ່ຕາມ ເນື່ອງຈາກໄດ້ຮັບຜົນກະທົບຈາກໂຄວິດ-19, ແຕ່ບັນດາຫົວໜ່ວຍທຸລະກິດໃນຂະແໜງການບໍລິການ ໂດຍສະເພາະບໍລິສັດທ່ອງທ່ຽວຍັງມີແຜນຮັບມືກັບການຂະຫຍາຍຕົວຊ້າລົງຂອງເສດຖະກິດ ແລະ ເດີນໜ້າດ້ວຍການວາງແຜນກົນລະຍຸດຫຼາຍຊ່ອງທາງ ເພື່ອຍູ້ໃຫ້ທຸລະກິດມີກໍາໄລ ຫຼື ຢ່າງໜ້ອຍກະບໍ່ຂາດທຶນ. ເຊັ່ນດຽວກັນກັບບໍລິສັດ ລັດວິສາຫະກິດ ທ່ອງທ່ຽວລາວສະກາຍເວ ກໍ່ໄດ້ເສີມຜະລິດຕະພັນໃໝ່ ໂດຍມີແຜນຈະເປີດບໍລິການຂົນສົ່ງທາງອາກາດຕື່ມອີກໃນໄວໆນີ້.

ທ່ານ ບຸນປອນ ສຸມະນີ ຜູ້ອໍານວຍການ ບໍລິສັດ ລັດວິສາຫະກິດ ທ່ອງທ່ຽວລາວສະກາຍເວ ໃຫ້ຮູ້ວ່າ: ທ່ອງທ່ຽວລາວສະກາຍເວ ສ້າງຕັ້ງຂຶ້ນໃນປີ 1997 ໄລຍະນັ້ນໄດ້ອອກຊື່ເປັນບໍລິສັດ ລັດວິສາຫະກິດທ່ອງທ່ຽວພັດທະນາໄຊສົມບູນ, ຕໍ່ມາຮອດປີ 2002 ໄດ້ຖືກປ່ຽນຊື່ໃໝ່ຕື່ມອີກມາເປັນບໍລິສັດ ລັດວິສາຫະກິດ ທ່ອງທ່ຽວທຳມະຊາດ ແລະ ວັດທະນະທຳລາວ. ເມື່ອດຳເດີນທຸລະກີດມາຮອດປີ 2019  ໄດ້ປ່ຽນຊື່ໃຫມ່ຕື່ມອີກມາເປັນບໍລິສັດ ລັດວິສາຫະກິດ ທ່ອງທ່ຽວ ລາວສະກາຍເວ ພາຍໃຕ້ການຊີ້ນຳຂອງບໍລິສັດ ລັດ​ວິ​ສາ​ຫະກິດ ລາວ​ເດີນ​ອາກາດ ທີ່ຂື້ນກັບກະຊວງປ້ອງກັນປະເທດ ຈົນຮອດປັດຈຸບັນ.

ເວົ້າສະເພາະທຸລະກິດຂອງພວກເຮົາມີການບໍລິການທີ່ຫຼາກຫຼາຍ ເປັນຕົ້ນແມ່ນ: ໃຫ້ບໍລິການນໍາທ່ຽວທັງພາຍໃນ ແລະ ຕ່າງປະເທດ; ບໍລິການຈອງໂຮງແຮມ ແລະ ຮ້ານອາຫານ; ບໍລິການຂາຍປີ້ເຮືອບິນພາຍໃນ ແລະ ຕ່າງປະເທດ; ເປັນຕົວແທນເຊົ່າເໝົາເຮືອບິນ ແລະ ບິນທ່ຽວຊົມ; ຕົວແທນບໍລິການຂາຍປະກັນໄພ; ໃຫ້ບໍລິການລົດເຊົ່າ; ບໍລິການຂາຍປີ້ລົດເມ ແລະ ປີ້ລົດໄຟ; ບໍລິການແລ່ນເອກະສານຂໍວິຊາຕ່າງໆ ແລະ ໃນໄວໆນີ້ຈະມີບໍລິການຂົນສົ່ງສິນຄ້າທາງອາກາດ (Air Cargo Service).

ຜູ້ອໍານວຍການ ບໍລິສັດ ລັດວິສາຫະກິດ ທ່ອງທ່ຽວລາວສະກາຍເວ ຍັງໃຫ້ເຫດຜົນທີ່ຈະເປີດບໍລິການຂົນ ສົ່ງທາງອາກາດວ່າ: ເນື່ອງຈາກບໍລິສັດພວກເຮົາຢູ່ໃນເຄືອຂອງບໍລິສັດ ລັດ​ວິ​ສາ​ຫະກິດ ລາວ​ເດີນ​ອາກາດ (ບໍລິ ສັດ​ແມ່) ຫຼື ເປັນທີ່ຮູ້ຈັກກັນດີຂອງສາຍການບິນລາວສະກາຍເວທີ່ໃຫ້ບໍລິການຖ້ຽວບິນພາຍໃນປະເທດ. ສະນັ້ນ, ກ່ອນຈະເປີດບໍລິການດັ່ງກ່າວພວກເຮົາກໍ່ໄດ້ສຶກສາຄົ້ນຄ້ວາ, ວິເຄາະ-ວິໃຈ ແລະ ຄວາມອາດສາມາດຂອງບໍລິການດັ່ງກ່າວຢ່າງລະອຽດຖີ່ຖ້ວນ, ແຕ່ເນື່ອງຈາກ (ບໍລິສັດ​ແມ່) ມີບໍລິການຖ້ຽວບິນແກ່ຜູ້ໂດຍສານເປັນປະຈໍາທຸກມື້ຢູ່ແລ້ວ ຈຶ່ງເຫັນວ່າມີຄວາມສະດວກຫຼາຍຕໍ່ການຂົນສົ່ງເປັນສິນຄ້າປະເພດພັດສະດຸ ອັນສາມາດຕອບສະ  ໜອງຄວາມຕ້ອງການຂອງລູກຄ້າໄດ້ເປັນຢ່າງດີ ເນື່ອງຈາກລາຄາບໍ່ແພງ ແລະ ຍັງປະຫຍັດເວລານຳອີກ.

ທ່ານ ບຸນປອນ ສຸມະນີ ອະທິບາຍຕື່ມວ່າ: ເມື່ອທຽບກັນລະຫວ່າງການຂົນສົ່ງທາງບົກ ກໍ່ຄືລົດໂດຍສານ ຫຼື ລົດຂົນສົ່ງສະເພາະກັບການຂົນສົ່ງທາງອາກາດຈະມີຄວາມໄດ້ປຽບຫຼາຍຢ່າງ ໂດຍສະເພາະແມ່ນເລື່ອງການປະຫຍັດເວລາ ແລະ ຕົ້ນທຶນການຂົນສົ່ງ ອັນເຮັດໃຫ້ລູກຄ້າປາຍທາງສາມາດຮັບສິນຄ້າໄດ້ພາຍໃນ 2 – 3 ຊົ່ວໂມງ (ການຂົນສົ່ງສິນຄ້າທາງອາກາດລະຫວ່າງແຂວງຕໍ່ແຂວງ). ເນື່ອງຈາກຖ້ຽວບິນລາວສະກາຍເວກວມພື້ນທີ່ສ່ວນໃຫຍ່ທາງພາກເໜືອຂອງລາວ​ ເຊັ່ນ: ​ແຂວງ​ຫຼວງ​ພະ​ບາງ, ຫຼວງ​ນໍ້າ​ທາ, ອຸດົມ​ໄຊ, ຜົ້ງ​ສາລີ, ຊຳ​ເໜືອ, ຊຽງ​ຂວາງ ແລະ ພາກໃຕ້ກໍ່​ຄືແຂວງ​ຈຳປາ​ສັກ ນຳອີກ.

ສໍາລັບການບໍລິການຂົນສົ່ງສິນຄ້າທາງອາກາດນີ້ ຫາກບໍ່ມີຫຍັງປ່ຽນແປງກໍ່ອາດຈະເປັນໄປຕາມແຜນ ຄາດວ່າຈະເປີດບໍລິການໃນເດືອນ ກໍລະກົດ 2020 ທີ່ຈະມາເຖິງນີ້ ແລະ ກໍ່ຈະມີການປະຊາສໍາພັນທາງສື່ສິ່ງພິມ ແລະ ສື່ອອນລາຍ ເພື່ອໃຫ້ສັງຄົມກໍ່ຄືລູກຄ້າໄດ້ຮັບຮູ້ເພີ່ມຕື່ມ ລວມທັງຈັດໂປຣໂມຊັ່ນພິເສດໃຫ້ແກ່ລູກຄ້າ. ຫາກທ່ານໃດສົນໃຈກ່ຽວກັບການບໍລິການຂອງພວກເຮົາສາມາດຕິດຕໍ່ພົວພັນໄດ້ທີ່ສໍານັກງານໃຫຍ່ຕັ້ງຢູ່ເຮືອນເລກທີ 087, ໜ່ວຍ 5, ບ້ານຫັດສະດີໃຕ້, ເມືອງຈັນທະບູລີ, ນະຄອນຫຼວງວຽງຈັນ.