ກວຕ ຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ແລະ ເລື່ອນສະມາຊິກພັກສົມບູນ

487

ໜ່ວຍພັກຫ້ອງການ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດພິທີຮັບມະຫາຊົນຜູ້ກ້າວໜ້າເຂົ້າເປັນສະມາຊິກພັກສຳຮອງ ຈໍານວນ 6 ສະຫາຍ, ຍິງ 2 ສະຫາຍ ແລະ ເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ ຈຳນວນ 4 ສະຫາຍ, ຍິງ 2 ສະຫາຍ. ໂດຍໃຫ້ກຽດເປັນປະທານຂອງ ສະຫາຍ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ.

ໃນພິທີ, ສະຫາຍ ພຸດທະສັກ ວິຈິດຕຣາ, ເລຂາໜ່ວຍພັກຫ້ອງການໄດ້ຂຶ້ນຜ່ານມະຕິຕົກລົງວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງຂອງໜ່ວຍພັກຫ້ອງການ ກວຕ ຈໍານວນ 6 ສະຫາຍ, ຍິງ 2 ສະຫາຍ ແລະ ຜ່ານມະຕິຕົກລົງຂອງຄະນະພັກ ກວຕ ວ່າດ້ວຍການເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ ຈຳນວນ 4 ສະຫາຍ, ຍິງ 2 ສະຫາຍ.

ໃນໂອກາດນີ້, ທ່ານ ລັດຖະມົນຕີກະຊວງ ກວຕ ຍັງໄດ້ໃຫ້ກຽດໂອ້ລົມວ່າ: ອົງຄະນະພັກຂອງພວກເຮົາກຳລັງສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ II ຂອງອົງຄະນະພັກກະຊວງກໍຄື ກອງປະຊຸມໃຫຍ່ ຄັ້ງທີ 11 ຂອງພັກປະຊາຊົນປະຕິວັດລາວ. ສະນັ້ນ, ເຫດການໃນຄັ້ງນີ້ ເປັນການສ້າງຂະບວນການໃນການປັບປຸງກໍ່ສ້າງພັກ-ຂະຫຍາຍພັກເພື່ອຕ້ອນຮັບກອງປະຊຸມໃຫຍ່ດັ່ງກ່າວ ພ້ອມນັ້ນ, ສະຫາຍ ກໍໄດ້ສະແດງຄວາມຍ້ອງຍໍຊົມເຊີຍຕໍ່ໜ່ວຍພັກຫ້ອງການ ທີ່ໄດ້ກໍ່ສ້າງໜ່ວຍພັກຂອງຕົນໃຫ້ມີຄວາມເຂັ້ມແຂງຂຶ້ນ ແລະ ສະແດງຄວາມຍ້ອງຍໍຊົມເຊີຍບັນດາສະມາຊິກພັກສຳຮອງ ແລະ ສະມາຊິກສົມບູນໃໝ່ທຸກສະຫາຍ ທີ່ໄດ້ມີຄວາມຫ້າວຫັນໃນການຈັດຕັ້ງປະຕິບັດໜ້າທີ່ວຽກງານ ແລະ ຜ່ານຜ່າບັນດາອຸປະສັກຕ່າງໆຈົນໄດ້ເຂົ້າເປັນສະມາຊິກພັກໃນຄັ້ງນີ້.

ພ້ອມນັ້ນ, ກໍໄດ້ເນັ້ນໜັກໃຫ້ສະມາຊິກພັກໃໝ່ ແລະ ສະມາຊິກພັກເກົ່າ ຈົ່ງສືບຕໍ່ຝຶກຝົນຫຼໍ່ຫຼອມຕົນເອງ ໃຫ້ກາຍເປັນສະມາຊິກພັກທີ່ປອດໃສເຂັ້ມແຂງ ແລະ ໜັກແໜ້ນ, ເຊື່ອໝັ້ນຕໍ່ອຸດົມການຂອງພັກ, ຮັກສາມູນເຊື້ອຄຸນສົມບັດສິນທຳປະຕິວັດ, ປັບປຸງແບບແຜນວິທີເຮັດວຽກສືບຕໍ່ຍົກລະດັບຄວາມຮູ້ຄວາມສາມາດຂອງຕົນຢ່າງຕໍ່ເນື່ອງ, ກ້າຄິດ, ກ້າເຮັດ ກ້າຮັບຜິດຊອບ ເພື່ອສືບຕໍ່ກໍ່ສ້າງ ແລະ ພັດທະນາໜ່ວຍພັກຂອງຕົນ ກໍຄືຄະນະພັກກະຊວງໃຫ້ມີຄວາມເຂັ້ມແຂງຂຶ້ນເລື້ອຍໆ. ພິທີດັ່ງກ່າວ, ຈັດຂຶ້ນໃນຕອນແລງວັນທີ 23 ມິຖຸນາ 2020 ທີ່ຫ້ອງປະຊຸມ ກະຊວງວິທະຍາສາດ ແລະ ເຕັກໂນໂລຊີ.