ຮອງເຈົ້າຄອງ ລົງຕິດຕາມເບິ່ງບັນຍາກາດການຊື້-ຂາຍສິນຄ້າຢູ່ຕະຫຼາດລາວອົດຊີ

763

ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ ໄດ້ເນັ້ນໃຫ້ຕະຫຼາດລາວອົດຊີ-ຢູໂຣບ ສືບຕໍ່ເອົາໃຈໃສ່ຫຼາຍບັນຫາ ໂດຍສະເພາະແມ່ນສືບຕໍ່ປ້ອງກັນພະຍາດໂຄວິດ-19, ກົນໄກການພັດທະນາຕະຫຼາດໃນອະນາຄົດໃຫ້ມີຄວາມຍືນຍົງ, ການຮັກສາໄດ້ມາດຕະຖານຕະຫຼາດທີ່ຂັ້ນເທິງວາງອອກໃຫ້ມີຄວາມສະອາດ-ປອດໄພ ແລະ ສະຫງົບ.

ທ່ານ ນາງ ສຸດາໄລ ສີຄຳແພງ ຕາງໜ້າເຈົ້າຂອງຕະຫຼາດ ລາວອົດຊີ-ຢູໂຣບ ບ້ານໜອງແຕ່ງໃຕ້ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ລາຍງານຫຍໍ້ຕໍ່ທ່ານຮອງເຈົ້າຄອງພ້ອມດ້ວຍຄະນະ ເນື່ອງໃນໂອກາດລົງມາຢ້ຽມຢາມຕະຫຼາດດັ່ງກ່າວ ກ່ຽວກັບມາດຕະການປ້ອງກັນພະຍາດໂຄວິດ-19, ການຄຸ້ມຄອງລາຄາສິນຄ້າ, ການຮັກສາມາດຕະຖານຂອງຕະຫຼາດ ລວມທັງແຜນການໃນອະນາຄົດວ່າ:

 ປັດຈຸບັນ ມີໂຕະຂາຍສິນຄ້າ 1.086, ແຕ່ນໍາໃຊ້ຕົວຈິງ 961 ແລະ ວ່າງ 125 ໂຕະ; ສ່ວນຫ້ອງຂາຍສິນຄ້າ 108 ຫ້ອງ ແລະ ນໍາໃຊ້ຕົວຈິງ 93 ຫ້ອງ. ສໍາລັບໄລຍະການລະບາດຂອງພະຍາດໂຄວິດ-19 ຕະຫຼາດໄດ້ມີການເຂັ້ມງວດຫຼາຍຢ່າງເປັນຕົ້ນ: ການວັດແທກອຸນຫະພູມ, ການໃສ່ຜ້າອັດປາກ, ຮັກສາໄລຍະຫ່າງ 1 ແມັດຂຶ້ນໄປ, ອະນາໄມສະຖານທີ່ ແລະ ປະຊາສໍາພັນເພື່ອໃຫ້ຜູ້ຂາຍ-ຜູ້ຊື້ເຂົ້າໃຈກ່ຽວກັບມາດຕະການດັ່ງກ່າວ.

ເນື່ອງຈາກໄລຍະໂຄວິດ-19 ໄດ້ເຮັດໃຫ້ຜູ້ຊື້-ຜູ້ຂາຍໄດ້ຮັບຜົນກະທົບຫຼາຍດ້ານລວມໄປເຖິງການສະໜອງສິນຄ້າບໍ່ພຽງພໍກັບຄວາມຕ້ອງການ ແລະ ເຮັດໃຫ້ລາຍຮັບຫຼຸດລົງກວ່າແຕ່ກອ່ນ. ສະນັ້ນ, ຈຶ່ງສະເໜີໃຫ້ພາກລັດພິຈາລະນາຫຼຸດພັນທະອາກອນ, ຄ່າກະແສໄຟຟ້າ, ຄ່ານໍ້າປະປາ ຈົນກວ່າສະພາບກັບມາເປັນປົກກະຕິ.

ຂະນະດຽວກັນ, ທ່ານ ນາງ ວັນມະນີ ພິມມະສານ ຫົວໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ກ່າວຕື່ມວ່າ: ຕະຫຼາດລາວອົດຊີ-ຢູໂຣບ ເປັນຕະຫຼາດສິນຄ້າຂາຍສົ່ງທີ່ສໍາຄັນແຫ່ງໜຶ່ງຂອງນະຄອນຫຼວງ ເຊິ່ງໄລຍະຜ່ານມາກໍ່ໄດ້ປະຕິບັດມາດຕະການຄຸ້ມຄອງລາຄາສິນຄ້າທີ່ລັດກໍານົດ, ທັງເປັນຕະຫຼາດຮອງຮັບສິນຄ້າທີ່ມາຈາກຕ່າງແຂວງ. ນອກນັ້ນ, ກໍ່ເປັນຕະຫຼາດຄໍ້າປະກັນດ້ານສະບຽງອາຫານໃຫ້ແກ່ນະຄອນຫຼວງໄດ້ຫຼາຍສົມຄວນ.

ໂອກາດນີ້, ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ ໄດ້ເນັ້ນໃຫ້ຕະຫຼາດລາວອົດຊີ-ຢູໂຣບສືບຕໍ່ເອົາໃຈໃສ່ຫຼາຍບັນຫາ ໂດຍສະເພາະແມ່ນສືບຕໍ່ປ້ອງກັນພະຍາດໂຄວິດ-19 ຈົນກວ່າສະພາບການກັບມາເປັນປົກະຕິ; ເບິ່ງບົດຮຽນຂອງຫຼາຍໆຕະຫຼາດເພື່ອເຮັດແນວໃດໃຫ້ມີຄວາມສະອາດ-ປອດໄພ ແລະ ມີຄວາມສະຫງົບ; ເພີ່ມຂີດຄວາມສາມາດໃນການຄຸ້ມຄອງ ແລະ ສະກັດກັ້ນສິນຄ້າເຖື່ອນທີ່ນໍາເຂົ້າມາຈາກຕ່າງປະເທດ ເພື່ອຕີຖອດປາກົດການຫຍໍ້ທໍ້ ແລະ ສົ່ງເສີມສິນຄ້າພາຍໃນຫຼາຍຂຶ້ນ.