ງານວາງສະແດງສິນຄ້າໂອດ໊ອບ ຈະໄດ້ຈັດຂຶ້ນລະຫວ່າງ 15 – 23 ສິງຫາ 2020 ທີ່ລາວ-ໄອເຕັກ

724

ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ຈັດງານຖະແຫຼງຂ່າວງານວາງສະແດງສິນຄ້າໜຶ່ງເມືອງໜຶ່ງຜະລິດຕະພັນ (ໂອດ໊ອບ) ແລະ ສິນຄ້າຄອບຄົວຕົວແບບ ຂອງນະຄອນຫຼວງວຽງຈັນ ຄັ້ງທີ VII.  ຈຸດປະສົງກໍ່ເພື່ອຊຸກຍູ້ສົ່ງເສີມດ້ານການຕະຫຼາດຂອງສິນຄ້າໂອດ໊ອບຂອງນະຄອນ ຫຼວງວຽງຈັນໃນຊ້ວງລັດຖະບານຜ່ອນຄາຍການແຜ່ລະບາດຂອງພະຍາດໂຄວິດ-19 ເຊິ່ງທີ່ຈະຈັດຂຶ້ນລະຫວ່າງວັນທີ 15 – 23 ສິງຫາ 2020 ຢູ່ທີ່ສູນການຄ້າ ລາວ-ໄອເຕັກ (ຕຶກເກົ່າ). ຂະນະທີ່ ມີ 153 ຫົວໜ່ວຍເຂົ້າຮ່ວມງານ.

ທ່ານ ວັນມະນີ ພິມມະສານ ຫົວໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນກ່າວວ່າ: ສໍາລັບສິນຄ້າທີ່ຈະມາຮ່ວມວາງສະແດງໃນຄັ້ງນີ້ໄດ້ແບ່ງອອກເປັນຫຼາຍປະເພດເຊັ່ນ: ສິນຄ້າໂອດ໋ອບ 89 ຫົວໜ່ວຍ ມີ 91 ຫ້ອງ; ຜະລິດຕະພັນຄອບຄົວຕົວແບບຂອງແຕ່ລະເມືອງ ລວມ 39 ຫົວໜ່ວຍ ມີ 41 ຫ້ອງ; ສິນຄ້າຄອບຄົວຕົວແບບປະເພດອຸດສາຫະກຳ – ຫັດຖະກຳ ແລະ ທ່ອງທ່ຽວ 25 ຫົວໜ່ວຍ ມີ 25 ຫ້ອງ ລວມທັງໝົດມີ 153 ຫົວໜ່ວຍ ມີ 157 ຫ້ອງ ໂດຍກຳນົດເອົາວັນທີ 03 ສິງຫາ 2010 ເວລາ 16:30 ເປັນພິທີເປີດງານວາງສະແດງຢ່າງເປັນທາງການ.

ສໍາລັບລາຄາຫ້ອງວາງສະແດງຂະໜາດ 3 x 3 ແມັດ ມີດັ່ງນີ້: ສິນຄ້າໂອດ໊ອບທີ່ເປັນຜະລິດຕະພັນທົ່ວໄປ 6 ແສນກີບ/ຫ້ອງ; ສິນຄ້າໂອດ໊ອບທີ່ເປັນຜະລິດຕະພັນໄມ້ 1 ລ້ານກີບ/ຫ້ອງ; ສິນຄ້າຄອບຄົວຕົວແບບທີ່ເປັນສິນຄ້າທົ່ວໄປ 1 ລ້ານ 1 ແສນກີບ/ຫ້ອງ; ຫົວໜ່ວຍທຸລະກິດທ່ອງທ່ຽວ 1 ລ້ານ 3 ແສນກີບ/ຫ້ອງ; ສິນຄ້າອຸດສາຫະກຳ 1 ລ້ານ 5 ກີບ/ຫ້ອງ; ສິນຄ້າກະສິກໍາ-ປ່າໄມ້ 5 ແສນກີບ/ເຕັ້ນ.

ພິທີຖະແຫຼງຂ່າວ ຈັດຂຶ້ນໃນວັນທີ 25 ມິຖຸນາ 2020 ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ໂດຍເປັນປະທານຮ່ວມຂອງທ່ານ ນາງ ວັນມະນີ ພິມມະສານ ຫົວໜ້າພະແນກ ອຄ.ນວ, ທ່ານ ສັງຄົມ ຈັນສຸກ, ປະທານ ສຄອ.ນວ, ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກ ຖວທ ນະຄອນຫຼວງວຽງຈັນ, ທ່ານ ສີບຸນທຳ ສີບຸນມີ ຜູ້ອໍານວຍການບໍລິສັດ ລາວເວີນ ມະຫາຊົນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.