ລັດຖະມົນຕີ ອຄ ເຂົ້າຮ່ວມປະຊຸມທາງໄກບັນດາລັດຖະມົນຕີອາເຊັບ ຄັ້ງທີ 10

554

ລັດຖະມົນຕີ ກະຊວງ ອຄ ໄດ້ເຂົ້າຮ່ວມກອງປະຊຸມກາງສະໄໝແບບທາງໄກຂອງບັນດາລັດຖະມົນຕີການເປັນຄູ່ຮ່ວມມືທາງເສດຖະກິດແບບຮອບດ້ານລະດັບພາກພື້ນ ຄັ້ງທີ 10 ເພື່ອແກ້ໄຂຂໍ້ຄົງຄ້າງຂອງບັນດາປະເທດທີ່ເຂົ້າຮ່ວມເຈລະຈາ ແລະ ກ້າວໄປສູ່ການລົງນາມໃນສັນຍາຂໍ້ຕົກລົງໃນທ້າຍປີ 2020 ນີ້.

ໃນວັນທີ 23 ມິຖຸນາ 2020 ນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ( ອຄ ), ທັງເປັນລັດຖະມົນຕີເສດຖະກິດອາຊຽນ ຂອງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມກາງສະໄໝແບບທາງໄກຂອງບັນດາລັດຖະມົນຕີການເປັນຄູ່ຮ່ວມມືທາງເສດຖະກິດແບບຮອບດ້ານລະດັບພາກພື້ນ ຄັ້ງທີ 10 ( The Virtual 10″ Regional Comprehensive Economic Partnership ( RCEP ) Intersessional Ministerial Meeting ( RCEP ISSL MM 10″ ) ທີ່ຫ້ອງປະຊຸມກະຊວງ ອຄ, ນະຄອນຫຼວງວຽງຈັນ.

ກອງປະຊຸມຄັ້ງນີ້ແມ່ນເພື່ອຕິດຕາມການຜັນຂະຫຍາຍຜົນຂອງກອງປະຊຸມສຸດຍອດບັນດາຜູ້ນໍາອາເຊັບ ຄັ້ງທີ 3 ໃນເດືອນພະຈິກ 2019 ທີ່ບາງກອກປະເທດໄທ ພ້ອມທັງໃຫ້ທິດຊີ້ນໍາໃນການແກ້ໄຂບັນຫາຂໍ້ຄົງຄ້າງຂອງບັນດາປະເທດເຂົ້າຮ່ວມເຈລະຈາ ໂດຍຢືນຢັນຄືນເຖິງຄວາມໝາຍໝັ້ນຂອງບັນດາຜູ້ນຳອາເຊັບ ເພື່ອກ້າວໄປສູ່ການລົງນາມໃນສັນຍາຂໍ້ຕົກລົງໃນທ້າຍປີ 2020 ທີ່ ສສ ຫວຽດນາມ.

ກອງປະຊຸມກາງສະໄໝແບບທາງໄກຄັ້ງນີ້ ໄດ້ສະແດງໃຫ້ເຫັນເຖິງຄວາມສໍາຄັນຂອງສັນຍາອາເຊັບ ທີ່ຄວນຈະຕ້ອງເລັ່ງລັດການເຈລະຈາໃຫ້ສໍາເລັດຕາມຄາດໝາຍ ເພື່ອຊຸກຍູ້ການຂະຫຍາຍຕົວຂອງເສດຖະກິດ ໂດຍສະເພາະຕ່ອງໂສ້ການສະໜອງ, ການຄ້າ ແລະ ການລົງທຶນຂອງພາກພື້ນທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ – 19.

ສັນຍາຂອງການເປັນຄູ່ຮ່ວມມືທາງເສດຖະກິດແບບຮອບດ້ານລະດັບພາກພື້ນ ຫຼື ອາເຊັບ ຖືໄດ້ວ່າເປັນຂໍ້ຕົກລົງທາງດ້ານເສດຖະກິດພາກພື້ນຂະໜາດໃຫຍ່ທີ່ສຸດຂອງໂລກ ກວມເອົາປະຊາກອນຫຼາຍ ກວ່າ 1/3 ຂອງໂລກ ໂດຍໄດ້ເລີ່ມຕົ້ນການເຈລະຈາ ແຕ່ປີ 2012 ເປັນຕົ້ນມາ. ສັນຍາອາເຊັບ ເປັນການເຈລະຈາຮ່ວມກັນລະຫວ່າງບັນດາປະເທດສະມາຊິກອາຊຽນ ກັບບັນດາປະເທດຄູ່ຮ່ວມເຈລະຈາ ຄື: ອົສຕຣາລີ, ສປ ຈີນ, ອິນເດຍ, ນູແວນເຊລັງ ແລະ ສ.ເກົາຫຼີ ລວມທັງໝົດ 16 ປະເທດ, ເປົ້າໝາຍຂອງສັນຍາອາເຊັບ ແມ່ນເພື່ອເຮັດໃຫ້ການເຊື່ອມໂຍງເສດຖະກິດພາກພື້ນໃຫ້ເປັນໄປໃນລວງກວ້າງ ແລະ ລວງເລິກຍິ່ງຂຶ້ນ. ພ້ອມດຽວກັນ, ກໍເປັນການສົ່ງເສີມການຂະຫຍາຍຕົວທາງດ້ານເສດຖະກິດ ໂດຍຜ່ານລະບົບການຄ້າແບບຫຼາຍຝ່າຍ, ການເຊື່ອມໂຍງໃນພາກພື້ນ ກໍຄືການພັດທະນາເສດຖະກິດທັງໃນພາກພື້ນ ແລະ ສາກົນ ເຮັດໃຫ້ການຮ່ວມມືທາງດ້ານເສດຖະກິດມີຄວາມກ້າວໜ້າ ໂດຍເນັ້ນໃສ່ຜັນຂະຫຍາຍສັນຍາທີ່ມີຢູ່ລະຫວ່າງອາຊຽນກັບຄູ່ເຈລະຈາອາຊຽນ ຫຼື ອາຊຽນ +1.