ຮ່ວມມືພັດທະນາລະບົບດິຈິຕອລຫັນເປັນທັນສະໄໝ

537

ກະຊວງວິທະຍາສາດ ແລະ ເຕັກໂນໂລຊີ ( ກວຕ ) ຮ່ວມມືກັບ ບໍລິສັດ ສະຕາໂທລະຄົມ ( Unitel ) ເຊັນບົດບັນທຶກ ຄວາມເຂົ້າໃຈເພື່ອສຶກສາຄວາມເປັນໄປໄດ້ໃນການຄົ້ນຄວ້າພັດທະນາບັນດາແອັບພລິເຄຊັນ ແລະ Digital Platform ຕ່າງໆ ແນໃສ່ເພື່ອຊຸກຍູ້, ສົ່ງເສີມການຄຸ້ມຄອງ, ການບໍລິຫານ ແລະ ບໍລິການ ໃຫ້ແກ່ລັດຖະບານໃນການຮອງຮັບການຫັນສູ່ເປັນອຸດສາຫະກຳ ແລະ ທັນສະໄໝ ໃນຍຸກດິຈິຕອລ 4.0 ນີ້.

ການຮ່ວມມືດັ່ງກ່າວ ທັງສອງຝ່າຍຈະໄດ້ຮ່ວມກັນດໍາເນີນການສຶກສາ – ຄົ້ນຄວ້າ, ພັດທະນາ ແລະ ບໍລິການດ້ານວິຊາການ – ເຕັກນິກກ່ຽວກັບລະບົບເຕັກໂນໂລຊີດິຈິຕອລ ເປັນຕົ້ນແມ່ນການພັດທະນາຊ໊ອຟແວຣ໌, ໂປຣແກຣມ, ແອັບພລິເຄຊັນ ແລະ Digital Platform ຕ່າງໆເພື່ອຊຸກຍູ້ ແລະ ສົ່ງເສີມການຄຸ້ມຄອງ, ບໍລິຫານ ແລະ ບໍລິການໃຫ້ແກ່ລັດຖະບານ ແລະ ທົ່ວສັງຄົມ ໃຫ້ມີປະສິດທິພາບສູງດ້ວຍລະບົບເຕັກໂນໂລຊີທີ່ທັນສະໄໝຕາມນະໂຍບາຍຫັນເປັນອຸດສາຫະກໍາ ແລະ ທັນສະໄໝຂອງພັກ – ລັດເຮົາວາງອອກ.

ในภาพอาจจะมี 15 คน, ผู้คนกำลังยืน

ຄຽງຄູ່ກັນນັ້ນ ທັງສອງຝ່າຍຈະສຸມໃສ່ດໍາເນີນການສຶກສາຄວາມເປັນໄປໄດ້ ກ່ຽວກັບໂຄງການຮ່ວມມືບັນດາກິດຈະກໍາຕ່າງໆ ເຊັ່ນ: ຄົ້ນຄວ້າພັດທະນາ Digital Platform ເພື່ອການຄຸ້ມຄອງ, ບໍລິຫານ ແລະ ບໍລິການຂອງລັດ ( Digital Government Platform ) ເພື່ອຍົກປະສິດທິພາບຂອງການປະຕິບັດວຽກງານຂອງລັດ; ຄົ້ນຄວ້າ – ພັດທະນາແອັບພລິເຄຊັນ ເພື່ອໃຫ້ບໍລິການສັງຄົມ ໂດຍນໍາໃຊ້ສູນຂໍ້ມູນດິຈິຕອລຂອງກະຊວງ ກວຕ ແລະ ສູນຂໍ້ມູນຂອງ ບໍລິສັດ ສະຕາໂທລະຄົມ; ຄົ້ນຄວ້າ – ພັດທະນາລະບົບຖານຂໍ້ມູນລັດຖະບານ ( Government Cloud ); ລະບົບກອງປະຊຸມ – ສໍາມະນາທາງໄກ ( Video Con-ferencing System ); ລະບົບຄຸ້ມຄອງບໍລິຫານເອກະສານ ( e-Office Management Platform ); ລະບົບການເຮັດທຸລະກໍາທາງເອເລັກໂຕຣນິກ ແລະ ລະບົບການຄ້າທາງເອເລັກໂຕຣນິກ ( e-Commerce Platform ); ລະບົບຄຸ້ມຄອງພາຫະນະ ແລະ ການຈະລາຈອນແບບທັນສະໄໝ ( Vehicle and Traffic Management Platform ) ແລະ ລະບົບຄຸ້ມຄອງຂໍ້ມູນດ້ານສຸຂະພາບປະຊາຊົນແບບທັນສະໄໝ ( Health Care Service and Management Platform ).

ພິທີເຊັນບົດບັນທຶກຄວາມເຂົ້າໃຈ ຈັດຂຶ້ນໃນວັນທີ 18 ມິຖຸນາ 2020 ທີ່ຫ້ອງປະຊຸມຂອງ ບໍລິສັດ ສະຕາໂທລະຄົມ ໃຫ້ກຽດລົງນາມຄັ້ງນີ້ມີ ທ່ານ ຄຳເພັດ ວົງດາລາ ຫົວໜ້າກົມແຜນການ ແລະ ຮ່ວມມື, ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕອລ ແລະ ທ່ານ ລິວ ແມ໋ງ ຮ່າ ຜູ້ອຳນວຍການໃຫຍ່ ບໍລິສັດ ສະຕາໂທລະຄົມ, ເຂົ້າຮ່ວມຂອງ ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງ ກວຕ, ທ່ານ ພົນຕີ ອ່ອນສີ ແສນສຸກ ຮອງລັດຖະມົນຕີ ກະຊວງປ້ອງກັນປະເທດ ມີບັນດາທ່ານຜູ້ຕາງໜ້າຈາກພາກສ່ວນຕ່າງໆເຂົ້າຮ່ວມ.

[ຂ່າວໜັງສືພິມເສດຖະກິດ-ການຄ້າ ຮູບ: ບຸນທັນ ]