ຈະປະຕິບັດນະໂຍບາຍໃຫ້ຜູ້ໃຊ້ໄຟຟ້າແຕ່ 151 – 461 ກິໂລວັດໂມງໃນໄລຍະພະຍາດໂຄວິດ – 19 ລະບາດ

547

ກອງປະຊຸມລັດຖະບານ ປະຈຳເດືອນມິຖຸນາ ໄດ້ຊີ້ນຳໃຫ້ໄຟຟ້າລາວປະຕິບັດນະໂຍບາຍ ຫຼຸດອັດຕາລາຄາໄຟຟ້າ ສຳລັບກຸ່ມຜູ້ໃຊ້ໄຟ ແຕ່ 151 – 461 ກິໂລວັດໂມງຕໍ່ເດືອນ ໃນໄລຍະການແຜ່ລະບາດຂອງພະຍາດໂຄວິດ – 19 ( ເດືອນເມສາ, ພຶດສະພາ ແລະ ມິຖຸນາ ); ສືບຕໍ່ຄົ້ນຄວ້າປັບປຸງສິ່ງທີ່ບໍ່ສອດຄ່ອງ ແລະ ປະເມີນການປະຕິບັດລາຄາໄຟຟ້າໃໝ່ ແລ້ວລາຍງານລັດຖະບານ ພິຈາລະນາ.

ຫຼ້າສຸດ, ໃນວັນທີ 18 ມິຖຸນາ 2020 ທີ່ຫ້ອງວ່າການສຳນັກງານນາຍົກລັດຖະມົນຕີ, ໄດ້ມີພິທີຖະແຫຼງຂ່າວ ກ່ຽວກັບທິດຊີ້ນຳຂອງກອງປະຊຸມລັດຖະບານສະໄໝສາມັນປະຈຳເດືອນມິຖຸນາ ຄັ້ງວັນທີ 17 ມິຖຸນາ 2020 ຕໍ່ກັບການຄົ້ນຄວ້າ ກວດກາຄືນ ການກໍານົດໂຄງສ້າງລາຄາໄຟຟ້າ ໃນໄລຍະ 2020 ຫາ 2025 ທີ່ໄດ້ປະກາດໃຊ້ໃນວັນທີ 1 ພຶດສະພາ 2020 ແລະ ປັບປຸງການປະຕິບັດນະໂຍບາຍລາຄາໄຟຟ້າຕໍ່ບາງກຸ່ມຜູ້ໃຊ້ໄຟຟ້າ ໃນໄລຍະການແຜ່ລະບາດຂອງພະຍາດໂຄວິດ – 19 ໂດຍການຖະແຫຼງຂອງ ທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ ທັງເປັນໂຄສົກລັດຖະບານ, ທ່ານ ຄຳມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ແລະ ທ່ານ ຈັນທະບູນ ສຸກອາລຸນ ຜູ້ວ່າການອຳນວຍການໃຫຍ່ ລັດວິສາຫະກິດໄຟຟ້າລາວ.

ในภาพอาจจะมี 1 คน, กำลังนั่ง, ห้องรับแขก, ตาราง และสถานที่ในร่ม

ທ່ານ ຈະເລີນ ເຢຍປາວເຮີ ຖະແຫຼງບາງຕອນວ່າ: ນັບແຕ່ທ້າຍປີ 2016 ເປັນຕົ້ນມາ ລັດຖະບານກໍໄດ້ເຫັນດີໃຫ້ປັບປຸງໂຄງສ້າງລາຄາໄຟຟ້າພາກທີ່ຢູ່ອາໄສ ທີ່ມີລັກສະນະເກື້ອກູນ ຈາກ 3 ຂັ້ນ ມາເປັນ 6 ຂັ້ນ, ຜ່ານການປະຕິບັດເຫັນວ່າການກຳນົດເປັນ 6 ຂັ້ນ ກໍມີທັງດ້ານດີ ແລະ ດ້ານຈຳກັດ. ສະນັ້ນ, ລັດຖະບານຈຶ່ງໄດ້ຊີ້ນໍາໃຫ້ຂະແໜງພະລັງງານ ແລະ ບໍ່ແຮ່ ກໍຄືລັດວິສາຫະກິດໄຟຟ້າລາວຄົ້ນຄວ້າຄືນໃໝ່ໃຫ້ສອດຄ່ອງກັບການຂະຫຍາຍຕົວຂອງເສດຖະກິດ – ສັງຄົມ ໃນໄລຍະແຕ່ປີ 2020 – 2025.

ປະຕິບັດຕາມຈິດໃຈຊີ້ນຳຂອງລັດຖະບານ ຂະແໜງກ່ຽວຂ້ອງ ກໍໄດ້ເອົາໃຈໃສ່ຄົ້ນຄວ້າ ແລະ ປັບປຸງໂຄງສ້າງລາຄາໄຟຟ້າຄືນໃໝ່ເປັນຫຼາຍທາງເລືອກ. ຜ່ານການທາບທາມ ຄວາມຄິດເຫັນຈາກພາກສ່ວນຕ່າງໆ ແລະ ຄົ້ນຄວ້າຢ່າງເລິກເຊິ່ງ ຫຼົບໄປຫຼົບມາຫຼາຍຄັ້ງ ລວມທັງໄດ້ຂໍຄຳເຫັນຈາກກົມການເມືອງສູນກາງພັກ ແລະ ຄະນະປະຈຳສະພາແຫ່ງຊາດ, ລັດຖະບານ ຈຶ່ງໄດ້ຮັບຮອງເອົາໂຄງສ້າງລາຄາໄຟຟ້າໃໝ່ ແຕ່ 2020 – 2025 ເປັນລາຄາດຽວ ຕາມທີ່ໄດ້ປະກາດໃຊ້ໃນວັນທີ 1 ພຶດສະພາ 2020 ເປັນຕົ້ນມາ ເຊິ່ງແມ່ນໄລຍະທີ່ລັດຖະບານປະກາດໃຊ້ມາດຕະການປ້ອງກັນ, ຄວບຄຸມ ແລະ ຕ້ານພະຍາດໂຄວິດ – 19 ທີ່ໄດ້ແຜ່ລະບາດໃນທົ່ວໂລກ ແລະ ປະເທດເຮົາ.

ในภาพอาจจะมี ท้องฟ้า, เมฆ, ต้นไม้, ต้นพืช, สถานที่กลางแจ้ง และธรรมชาติ

ພາຍຫຼັງປະກາດໃຊ້ນະໂຍບາຍໂຄງສ້າງລາຄາໄຟຟ້າໃໝ່ ລາຄາດຽວມານີ້ ກໍໄດ້ມີຫາງສຽງສັງຄົມທີ່ສະໜັບສະໜູນ ແລະ ຂັດຂ້ອງຈົ່ມວ່າຕ່າງໆນາໆ, ດ້ວຍຄວາມເປັນຫ່ວງເປັນໄຍຂອງສູນກາງພັກ, ລັດຖະບານ ແລະ ສະພາແຫ່ງຊາດ, ລັດຖະບານ ຈຶ່ງໄດ້ນຳເອົາບັນຫາດັ່ງກ່າວມາພິຈາລະນາກວດກາຄືນໃໝ່ ໃນກອງປະຊຸມລັດຖະບານ ຄັ້ງວັນທີ 17 ມິຖຸນາ 2020 ນີ້; ກອງປະຊຸມລັດຖະບານ ກໍໄດ້ຕີລາຄາສູງຕໍ່ຄວາມຄິດຄວາມເຫັນທີ່ສ້າງສັນ ແລະ ເປັນປະໂຫຍດຂອງສັງຄົມ, ພິຈາລະນາກວດກາຄືນ ແລະ ຊີ້ນຳໃຫ້ຂະແໜງການກ່ຽວຂ້ອງມີການຄົ້ນຄວ້າ, ປັບປຸງໂຄງສ້າງລາຄາໄຟຟ້າໃໝ່ຕື່ມໃຫ້ສອດຄ່ອງ ດັ່ງນີ້:

1) ໃຫ້ປະຕິບັດນະໂຍບາຍຫຼຸດອັດຕາລາຄາໄຟຟ້າ ສຳລັບກຸ່ມຜູ້ໃຊ້ໄຟ ແຕ່ 151 – 461 ກິໂລວັດໂມງຕໍ່ເດືອນ ດ້ວຍລະດັບແຕກຕ່າງກັນລາຍລະອຽດ ແມ່ນໃຫ້ໄຟຟ້າລາວ ເປັນຜູ້ຄິດໄລ່ຕົວຈິງ; ສ່ວນກຸ່ມອື່ນໃຫ້ປະຕິບັດຕາມອັດຕາທີ່ໄດ້ປະກາດໃຊ້ແລ້ວ ເພາະໄດ້ມີສ່ວນຫຼຸດຢູ່ແລ້ວ, ນະໂຍບາຍດັ່ງກ່າວໃຫ້ປະຕິບັດໃນໄລຍະການແຜ່ລະບາດຂອງພະຍາດໂຄວິດ – 19 ( ເດືອນເມສາ, ພຶດສະພາ ແລະ ມິຖຸນາ ) ໂດຍມອບໃຫ້ກະຊວງພະລັງງານ ແລະ ບໍ່ແຮ່ ຊີ້ນໍາລັດວິສາຫະກິດໄຟຟ້າໄລ່ລຽງຄືນ ແລະ ຈັດຕັ້ງປະຕິບັດໃຫ້ຖືກຕ້ອງສອດຄ່ອງ.

2). ມອບໃຫ້ກະຊວງພະລັງງານ ແລະ ບໍ່ແຮ່ ສົມທົບກັບພາກສ່ວນກ່ຽວຂ້ອງສືບຕໍ່ຄົ້ນຄວ້າປັບປຸງສິ່ງທີ່ບໍ່ສອດຄ່ອງ ແລະ ປະເມີນການປະຕິບັດລາຄາໄຟຟ້າໃໝ່ຕາມແຈ້ງການ ສະບັບເລກທີ 394/ຫສນຍ ລົງວັນທີ 19 ມີນາ 2020 ແລ້ວລາຍງານລັດຖະບານພິຈາລະນາ.

3) ໃຫ້ປະຕິບັດນະໂຍບາຍຫຼຸດຄ່າໄຟຟ້າ 15% ໃຫ້ແກ່ພະນັກງານແພດ – ໝໍທີ່ເຮັດວຽກປິ່ນປົວ ແລະ ໃກ້ຊິດ ໂດຍກົງກັບຜູ້ຕິດເຊື້ອພະຍາດໂຄວິດ – 19 ຕາມການຄົ້ນຄວ້າ ແລະ ສະເໜີຂອງກະຊວງສາທາລະນະສຸກ ໂດຍຈິດໃຈຂອງກອງປະຊຸມຢາກໃຫ້ຄິດໄລ່ເປັນເງິນສົດ ແລະ ມອບໃຫ້ກະຊວງສາທາລະນະສຸກເປັນຜູ້ມອບໃຫ້ແກ່ແພດ – ໝໍດັ່ງກ່າວ.

4) ມອບໃຫ້ກະຊວງພະລັງງານ ແລະ ບໍ່ແຮ່ ຊີ້ນຳລັດວິສາຫະກິດໄຟຟ້າລາວ ລົງກວດກາ ແລະ ຊຸກຍູ້ບັນດາໜ່ວຍງານທີ່ຂຶ້ນກັບຄວາມຮັບຜິດຊອບຂອງຕົນໃຫ້ຍົກສູງຄວາມຮັບຜິດຊອບໃນການປະຕິບັດໜ້າທີ່ວຽກງານຢ່າງເຂັ້ມງວດ, ບໍລິສຸດ, ສັດຊື່, ໂປ່ງໃສ. ພ້ອມນັ້ນ, ກໍຕ້ອງເດັດດ່ຽວແກ້ໄຂປາກົດການຫຍໍ້ທໍ້ທີ່ລະເມີດລະບຽບການ, ບໍ່ໂປ່ງໃສ ໃຫ້ທັນເວລາ, ຜູ້ຊົມໃຊ້ໄຟຟ້າ ທຸກຄົນ ທຸກຄົວເຮືອນ ກໍຕ້ອງຕື່ນຕົວເຄົາລົບລະບຽບ, ກົດໝາຍ, ປະຕິບັດສິດ ແລະ ພັນທະຂອງຕົນໃຫ້ຖືກຕ້ອງ ແລະ ຄົບຖ້ວນ, ເຂົ້າຮ່ວມຕິດຕາມກວດກາ, ການເຄື່ອນໄຫວປະຕິບັດໜ້າທີ່ຂອງພະນັກງານໄຟຟ້າລາວ, ຖ້າຫາກເຫັນວ່າມີປາກົດການບໍ່ໂປ່ງໃສ, ລະເມີດລະບຽບ – ກົດໝາຍກໍໃຫ້ນຳສະເໜີສ່ອງແສງແບບສ້າງສັນໃຫ້ອົງການກ່ຽວຂ້ອງຂັ້ນເທິງພິຈາລະນາແກ້ໄຂຢ່າງທັນການ.

ในภาพอาจจะมี ท้องฟ้า, เมฆ, ต้นพืช, ต้นไม้ และสถานที่กลางแจ้ง

ບັນດາເນື້ອໃນທີ່ກ່າວມານັ້ນແມ່ນຈິດໃຈຊີ້ນຳຂອງກອງປະຊຸມລັດຖະບານ ແລະ ທ່ານນາຍົກລັດຖະມົນຕີ ຕໍ່ການປັບປຸງ ແລະ ຈັດຕັ້ງປະຕິບັດໂຄງສ້າງລາຄາໄຟຟ້າໃໝ່ 2020 – 2025 ແລະ ນະໂຍບາຍລາຄາໄຟຟ້າໃນໄລຍະການແຜ່ລະບາດຂອງພະຍາດໂຄວິດ – 19. ສະນັ້ນ, ຂ້າພະເຈົ້າຈຶ່ງຂໍຮຽກຮ້ອງໃຫ້ພະນັກງານ, ສະມາຊິກພັກ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ກຳມະກອນ, ປະຊາຊົນບັນດາເຜົ່າ, ນັກທຸລະກິດທັງພາກລັດ ແລະ ເອກະຊົນ ລວມທັງຊາວຕ່າງດ້າວ ແລະ ຊາວຕ່າງປະເທດທີ່ດຳລົງຊີວິດຢູ່ ສປປ ລາວ ຈົ່ງຮັບຊາບ ແລະ ຮ່ວມມືປະຕິບັດໃຫ້ປາກົດຜົນເປັນຈິງ, ຖ້າຫາກມີບັນຫາໃດຍັງຂັດຂ້ອງໝອງໃຈ ຫຼື ເຫັນວ່າຍັງບໍ່ທັນສອດຄ່ອງ ກໍໃຫ້ສະເໜີຢ່າງຈິງໃຈຕໍ່ລັດຖະບານ, ຂະແໜງກ່ຽວຂ້ອງ ແລະ ອົງການປົກຄອງທ້ອງຖິ່ນຂັ້ນຕ່າງໆ ເພື່ອພິຈາລະນາແກ້ໄຂຕາມກົດໝາຍ, ລະບຽບການ ແລະ ນະໂຍບາຍຂອງພັກ ແລະ ລັດເຮົາ.

ในภาพอาจจะมี 1 คน, ต้นไม้, ท้องฟ้า และสถานที่กลางแจ้ง

ຂະນະທີ່, ທ່ານ ຄຳມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ໄດ້ກ່າວບາງຕອນວ່າ: ໂຄງສ້າງລາຄາເກົ່າໄດ້ຖືກນຳໃຊ້ມາແຕ່ປີ 2012; ມາໃນປີ 2016 ໄດ້ມີການປັບປຸງລາຄາສະເພາະແຕ່ພາກທີ່ຢູ່ອາໄສ ຈາກ 3 ຂັ້ນ ມາເປັນ 6 ຂັ້ນ. ເພື່ອປັບປຸງໃຫ້ສອດຄ່ອງກັບສະພາບການຂະຫຍາຍຕົວຂອງເສດຖະກິດ – ສັງຄົມ ຕັ້ງແຕ່ 2018 ເປັນຕົ້ນມາ ຈຶ່ງໄດ້ມີການສຶກສາໂຄງສ້າງລາຄາໄຟຟ້າຄືນໃໝ່ ໂດຍມີຈຸດປະສົງໃຫ້ກະຕຸ້ນການຜະລິດພາຍໃນຫັນເປັນສິນຄ້າ, ຜົນການສຶກສາໄດ້ນຳສະເໜີຕໍ່ກອງປະຊຸມຢູ່ຂັ້ນສູນກາງ ແລະ ທ້ອງຖິ່ນຫຼາຍຄັ້ງ ເພື່ອສັງລວມເອົາຄຳເຫັນຈາກຫຼາຍພາກສ່ວນ, ຫຼາຍຂະແໜງການ, ມາຮອດວັນທີ 19 ເດືອນມີນາ 2020 ຈຶ່ງໄດ້ມີແຈ້ງການໃຫ້ຈັດຕັ້ງປະຕິບັດລາຄາໃໝ່ ຕັ້ງແຕ່ເດືອນພຶດສະພາ 2020 ເປັນຕົ້ນໄປ.

ພວກເຮົາກໍໄດ້ຕີລາຄາໃສ່ຜູ້ທີ່ຊົມໃຊ້ໄຟຟ້າ ແຕ່ 0 – 150 ກິໂລວັດໂມງມີຈັກຄອບຄົວ ຕາມການເກັບກຳຕົວເລກໃນທ້າຍປີ 2019 ມີ 80% ຂອງຄອບຄົວທັງໝົດທີ່ຊົມໃຊ້ໄຟຟ້າລະ ຫວ່າງ 0 – 150 ກິໂລວັດໂມງ ແລະ ຢູ່ໃນລະຫວ່າງ 151 – 461 ກິໂລວັດໂມງ ມີ 13% ແລະ ລະຫວ່າງ 462 ກິໂລວັດໂມງຂຶ້ນໄປ ມີ 7%. ດັ່ງນັ້ນ, ພວກເຮົາຈະມາຄົ້ນຄວ້າຕື່ມວ່າຈະເຮັດແນວໃດໃຫ້ມັນສອດຄ່ອງ ເພື່ອບໍ່ໃຫ້ໄຟຟ້າລາວກະທົບກະເທືອນເຖິງການດຳເນີນທຸລະກິດ ແລະ ໃຫ້ທຸລະກິດຢູ່ໄດ້.

ພິທີຖະແຫຼງຂ່າວ ໄຟຟ້າ ທີ່ ສນຍ